ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا AWS Community Day Central Asia 2025 اتتى اۋقىمدى وڭىرلىك شارا باستالدى. فورۋمعا AWS Heroes, Community Builders ساراپشىلارى مەن كانادا، گەرمانيا، يسپانيا، قازاقستان جانە وزبەكستاننان كەلگەن ارنايى قوناقتار قاتىسۋدا. ءىس-شارا اياسىندا ينجەنەرلەر، ارحيتەكتۋرا ماماندارى، ستارتاپ وكىلدەرى، ستۋدەنتتەر مەن ءىت-سالا كوشباسشىلارى باس قوستى.
قازاقستاندا العاش رەت وفلاين-فورماتتا ۇيىمداستىرىلىپ وتىرعان بۇل شارا – ورتالىق ازيادا بۇلتتى تەحنولوگيالارعا دەگەن قىزىعۋشىلىقتىڭ ارتىپ كەلە جاتقانىن جانە وڭىرلىك ءىت-قاۋىمداستىقتىڭ دامۋ قارقىنىن كورسەتەدى.
فورۋمنىڭ اشىلۋ سالتاناتىندا ءال-فارابي اتىنداعى قازۇۋ-دىڭ عىلىمي-يننوۆاتسيالىق جۇمىس جونىندەگى پرورەكتورى مارعۇلان يبرايموۆ ءسوز سويلەپ، مۇنداي باستامالاردىڭ ماڭىزىن اتاپ ءوتتى.
«بۇگىنگى جاستار - تەحنولوگيانى تۇتىنۋشى عانا ەمەس، سونىمەن قاتار ونى جاسايتىن ۇرپاق. AWS Community Day سياقتى شارالار – ستۋدەنتتەر، سالا ماماندارى تاجىريبە الماسىپ، قازاقستان مەن بۇكىل ورتالىق ازيانىڭ تسيفرلىق بولاشاعىن قالىپتاستىراتىن ماڭىزدى الاڭ»، – دەدى پرورەكتور.
شارانى قازاقستان، قىرعىزستان جانە وزبەكستانداعى رەسمي AWS قاۋىمداستىقتارىنىڭ جەتەكشىلەرى ۇيىمداستىرۋدا. فورۋم بارىسىندا قاتىسۋشىلار ناقتى جوبالار مىسالىندا بۇلتتى شەشىمدەردى قۇرۋ تاجىريبەسىن تالقىلاپ، تسيفرلىق ترانسفورماتسيانىڭ وزەكتى ماسەلەلەرىن كوتەردى. سونىمەن قاتار، DevOps, ماشينالىق وقىتۋ، اۆتوماتتاندىرۋ جانە كيبەرقاۋىپسىزدىك سالالارىنداعى زاماناۋي ادىستەرمەن تانىستى.
فورۋمدا ەرەكشە قىزىعۋشىلىق تۋدىرعان سەسسيالاردىڭ ءبىرى – ناقتى جوبالار ارحيتەكتۋراسىن تالداۋ جانە جىبەرىلگەن قاتەلىكتەر تۋرالى اشىق پىكىرتالاستار بولدى. پراكتيكالىق شەبەرلىك- سىنىپتاردا قاتىسۋشىلار تەوريانى تاجىريبەمەن ۇشتاستىرۋ مۇمكىندىگىنە يە بولدى.
باعدارلامانىڭ ەڭ ماڭىزدى بولىگى – AWS GameDay اتتى كوماندالىق جارىس بولدى. بۇل بايقاۋدا قاتىسۋشىلار ناقتى ومىرلىك جاعدايلارعا ۇقساس ينجەنەرلىك تاپسىرمالاردى شەشىپ، كوماندالىق جۇمىس پەن شىنايى تاجىريبە ارقىلى بىلىمدەرىن جەتىلدىردى.
فورۋم بارىسىندا قاتىسۋشىلار بەلسەندى پىكىر الماسىپ، پراكتيك مامانداردان كەڭەس الىپ، جاڭا كاسىبي بايلانىستار ورناتتى. AWS Community Day Central Asia تەك ءبىلىم بەرۋ الاڭى عانا ەمەس، سونىمەن قاتار جاڭا يدەيالار مەن تەحنولوگيالىق سەرىكتەستىكتەر دۇنيەگە كەلەتىن ورتالىققا اينالدى.
شارا حالىقارالىق جانە جەرگىلىكتى ءىت-كومپانيالاردىڭ، جوعارى وقۋ ورىندارىنىڭ جانە تەحنيكالىق قاۋىمداستىقتاردىڭ قولداۋىمەن وتۋدە.
