تاجىكستان نەگىزىنەن رەسەي جەتكىزەتىن جانارماي يمپورتىنا تاۋەلدىلىكتى ازايتۋ ءۇشىن ەلدەگى مۇناي جانە گاز قورلارىن گەولوگيالىق بارلاۋمەن بەلسەندى تۇردە اينالىسىپ جاتىر. بۇل جونىندە ەل ۇكىمەتى جانىنداعى گەولوگيا باس باسقارماسىنىڭ جەتەكشىسى يلحوم ويمۋحاممادزودا مالىمدەدى، دەپ حابارلايدى «ادىرنا» ءتىلشىسى فەرعاناعا سىلتەمە جاساپ.
ونىڭ ايتۋىنشا، جوبالاردىڭ باسىم بولىگى تەحنيكالىق تۇرعىدان قىتايدىڭ ۇلتتىق مۇناي-گاز كورپوراتسياسى تاراپىنان جۇزەگە اسىرىلۋدا.
اتاپ ايتقاندا، بارلاۋ جۇمىستارى پامير، گيسسار-الاي جانە گيندۋكۋش تاۋ جۇيەلەرىنىڭ اراسىنداعى تاجىك ويپاتىندا جۇرگىزىلۋدە. قىتايلىق ماماندار مۇندا اۋقىمدى گەوفيزيكالىق زەرتتەۋلەر وتكىزىپ، ناتيجەلەرىن تاجىكستاندىق ءتيىستى مەكەمەلەرگە تاپسىرعان.
قازىرگى ۋاقىتتا قىتايلىق ماماندار سەيسميكالىق بارلاۋ جۇمىستارىن جۇرگىزىپ جاتىر. ونىڭ قورىتىندىسى بويىنشا بۇرعىلاۋ ءۇشىن ەڭ پەرسپەكتيۆالى قۇرىلىم انىقتالماق. بارلىق مالىمەت جىل سوڭىنا دەيىن تالدانادى. سونداي-اق تەرەڭدىگى 7 مىڭ مەترگە دەيىن جەتەتىن بارلاۋ ۇڭعىماسىن بۇرعىلاۋ جوسپارلانعان. وسى جۇمىستار اياقتالعاننان كەيىن عانا اتالعان اۋماقتا ونەركاسىپتىك كولەمدەگى مۇناي مەن گاز قورىنىڭ بار-جوعى بەلگىلى بولادى.
ويمۋحاممادزودا باسقا دا كەن ورىندارىنا قاتىستى اقپاراتپەن ءبولىستى. بۇرىن پەرسپەكتيۆالى دەپ سانالعان رانگون گاز كەن ورنىندا دا قىتايلىق كومپانيا جۇمىس ىستەپ جاتىر. كومپانيا بۇل اۋماقتى يگەرۋگە ليتسەنزيا العانىمەن، قوسىمشا گەولوگيالىق بارلاۋ جۇرگىزۋ تۋرالى شەشىم قابىلداعاندىقتان، ازىرگە ءوندىرىس باستالماعان.
ال سارىقامىس ۋچاسكەسىندە دايىندىق جۇمىستارىن رەسەيدىڭ «گازپروم» كورپوراتسياسى جۇرگىزگەن. مۇندا شامامەن 6,5 مىڭ مەتر تەرەڭدىكتە ۇڭعىما بۇرعىلانعانىمەن، كەيىن جوبا توقتاتىلعان. سەبەبى بىرنەشە ءونىمدى قابات انىقتالعانىمەن، ولار ونەركاسىپتىك كولەمدەگى گاز قورى بار دەگەن قورىتىندى جاساۋعا جەتكىلىكسىز بولعان.
گەولوگيا باسقارماسىنىڭ باسشىسى قازىرگى تاڭدا ەلدە تەك گەولوگيالىق بارلاۋ جۇمىستارى جۇرگىزىلىپ جاتقانىن اتاپ ءوتتى. ياعني ازىرگە تاجىكستاننىڭ ەشبىر اۋماعىندا ءىرى مۇناي نەمەسە گاز قورى رەسمي تۇردە راستالعان جوق.
ايتا كەتەيىك، تاجىكستان مۇناي ونىمدەرىنىڭ يمپورتىنا تولىقتاي دەرلىك تاۋەلدى. رەسەي – جانارمايدىڭ نەگىزگى جەتكىزۋشىسى. رەسمي ستاتيستيكاعا سايكەس، 2025 جىلى رەسەي تاجىكستان نارىعىنىڭ 84 پايىزىن باقىلاپ، 1,2 ميلليون توننادان استام مۇناي ونىمدەرى مەن سۇيىتىلعان گاز جەتكىزگەن. سونىمەن قاتار يمپورتتاعى ۇلەس وزبەكستاندا شامامەن 5 پايىز، قازاقستان مەن تۇرىكمەنستاندا 3 پايىزدان، بەلارۋستا 3 پايىزعا جۋىق، ال قىرعىزستاندا 0,5 پايىزدى قۇرايدى.
وتكەن جىلى تاجىكستان بەنزين مەن وزگە دە جانارماي تۇرلەرىن شەتەلدەن ساتىپ الۋعا 959 ميلليون دوللاردان استام قارجى جۇمساعان.
