Täjıkstan negızınen Resei jetkızetın janarmai importyna täueldılıktı azaitu üşın eldegı mūnai jäne gaz qorlaryn geologiialyq barlaumen belsendı türde ainalysyp jatyr. Būl jönınde el Ükımetı janyndaǧy Geologiia bas basqarmasynyŋ jetekşısı İlhom Oimuhammadzoda mälımdedı, dep habarlaidy «Adyrna» tılşısı Ferǧanaǧa sılteme jasap.
Onyŋ aituynşa, jobalardyŋ basym bölıgı tehnikalyq tūrǧydan Qytaidyŋ ūlttyq mūnai-gaz korporasiiasy tarapynan jüzege asyryluda.
Atap aitqanda, barlau jūmystary Pamir, Gissar-Alai jäne Gindukuş tau jüielerınıŋ arasyndaǧy Täjık oipatynda jürgızılude. Qytailyq mamandar mūnda auqymdy geofizikalyq zertteuler ötkızıp, nätijelerın täjıkstandyq tiıstı mekemelerge tapsyrǧan.
Qazırgı uaqytta qytailyq mamandar seismikalyq barlau jūmystaryn jürgızıp jatyr. Onyŋ qorytyndysy boiynşa būrǧylau üşın eŋ perspektivaly qūrylym anyqtalmaq. Barlyq mälımet jyl soŋyna deiın taldanady. Sondai-aq tereŋdıgı 7 myŋ metrge deiın jetetın barlau ūŋǧymasyn būrǧylau josparlanǧan. Osy jūmystar aiaqtalǧannan keiın ǧana atalǧan aumaqta önerkäsıptık kölemdegı mūnai men gaz qorynyŋ bar-joǧy belgılı bolady.
Oimuhammadzoda basqa da ken oryndaryna qatysty aqparatpen bölıstı. Būryn perspektivaly dep sanalǧan Rangon gaz ken ornynda da qytailyq kompaniia jūmys ıstep jatyr. Kompaniia būl aumaqty igeruge lisenziia alǧanymen, qosymşa geologiialyq barlau jürgızu turaly şeşım qabyldaǧandyqtan, äzırge öndırıs bastalmaǧan.
Al Saryqamys uchaskesınde daiyndyq jūmystaryn Reseidıŋ «Gazprom» korporasiiasy jürgızgen. Mūnda şamamen 6,5 myŋ metr tereŋdıkte ūŋǧyma būrǧylanǧanymen, keiın joba toqtatylǧan. Sebebı bırneşe önımdı qabat anyqtalǧanymen, olar önerkäsıptık kölemdegı gaz qory bar degen qorytyndy jasauǧa jetkılıksız bolǧan.
Geologiia basqarmasynyŋ basşysy qazırgı taŋda elde tek geologiialyq barlau jūmystary jürgızılıp jatqanyn atap öttı. Iаǧni äzırge Täjıkstannyŋ eşbır aumaǧynda ırı mūnai nemese gaz qory resmi türde rastalǧan joq.
Aita keteiık, Täjıkstan mūnai önımderınıŋ importyna tolyqtai derlık täueldı. Resei – janarmaidyŋ negızgı jetkızuşısı. Resmi statistikaǧa säikes, 2025 jyly Resei Täjıkstan naryǧynyŋ 84 paiyzyn baqylap, 1,2 million tonnadan astam mūnai önımderı men sūiytylǧan gaz jetkızgen. Sonymen qatar importtaǧy üles Özbekstanda şamamen 5 paiyz, Qazaqstan men Türıkmenstanda 3 paiyzdan, Belarusta 3 paiyzǧa juyq, al Qyrǧyzstanda 0,5 paiyzdy qūraidy.
Ötken jyly Täjıkstan benzin men özge de janarmai türlerın şetelden satyp aluǧa 959 million dollardan astam qarjy jūmsaǧan.
