28 ساۋىردەن باستاپ رەسەيدىڭ كەي وڭىرلەرىندە جانارماي تاپشىلىعى باستالدى. الىپساتارلار تاراپىنان جانارمايدى ساتپاي، وزىندە جيناي باستاۋ ارەكەتتەرى دە بايقالعان. ءبىرشاما مۇناي وڭدەۋ قۋاتتارى ىستەن شىققاننان كەيىن، گۋبەرناتورلار كرەملگە شاعىم ايتىپ، دابىل قاعۋدا. بۇل تۋرالى DALA INSIDE جازدى، دەپ حابارلايدى “ادىرنا” ۇلتتىق پورتالى
بۇگىندە ۋكراينانىڭ نەگىزگى نىسانى – رەسەيدىڭ مۇناي وڭدەۋ زاۋىتتارى.
DALA INSIDE دەرەككوزى بويىنشا، قاۋىپسىزدىك كەڭەسىنىڭ بولجامى كوڭىل كونشىتپەيدى. ەندى كيەۆ گيبريدتى سوققى - ياعني راكەتالار مەن درونداردى ارالاستىرىپ سوققى بەرە الادى. وعان مۇناي وڭدەۋ زاۋىتتارىن جاۋىپ تۇرعان اۋە قورعانىسىنىڭ شاماسى جەتپەۋى مۇمكىن.
“وسى ورايدا كرەمل ىشكى دەفيتسيتتى بولدىرماس ءۇشىن جانتالاسا جول ىزدەۋدە. باستى يدەيا - كورشىلەس ەاەس ەلدەرىندە رەسەيگە باعىنىشتى مۇناي وڭدەۋ زاۋىتىنىڭ بولۋى. ونىڭ الدىندا بەلارۋس باسشىلىعى موزىر مۇناي وڭدەۋ زاۋىتىنىڭ قۋاتى رەسەيدىڭ بۇكىل قاجەتتىلىگىن وتەۋگە جەتەدى دەپ سەندىرگەن بولاتىن. ءوز كەزەگىندە، ەگەر موزىر تازا رەسەي قاجەتى ءۇشىن جۇمىس ىستەيتىنى دالەلدەنسە، ۋكراينا بەلارۋستاعى ينفراقۇرىلىمعا دا سوققى بەرۋگە دايىن. جانە ول راكەتا الدە درونمەن ەمەس، ىشكى ديۆەرسيا، بايقاماي ورتەنىپ كەتۋ، تەحنوگەندىك اپات تۇرىندە ورىن الۋى ىقتيمال”، دەپ جازىلعان دەرەككوز مالىمەتىندە.
سونداي-اق، دەرەككوز بەلارۋستىڭ تاۋەكەلى جوعارى ەكەنىن بىلەتىن كرەمل جابىق وتىرىستا لۋكويلدى اتىراۋداعى ءموز ماسەلەسىن شەشۋ بويىنشا اسىقتىراتىنىن جازادى. لۋكويلدا ونداي اقشا بار.
ايتا كەتسەك، كومپانيا 2023 جىلى 790 ميلليارد رۋبل تازا كىرىس الدى. ءاموز قازمۇنايگازعا تيەسىلى. قازمۇنايگاز ونى ساتۋ بويىنشا ناقتى جوسپار دايىنداماعان بولاتىن. بۇل يدەيا تەك كونتسەپتۋالدى تۇردە تالقىلانىپ جۇرگەن. ازىرگە لۋكويل قازمۇنايگازعا شىققان جوق. ولار ماسەلەنى زەرتتەپ، قمگ-عا ۇنايتىن ۇسىنىس ازىرلەگىسى كەلەدى.
“وسى ۇسىنىس پاكەتىندە لۋكويلعا تيەسىلى بولگارياداعى بۋرگاس ءموز-ىنە قاتىستى تاراۋ دا بولىپ قالار دەپ ويلايدى. ءاموز-ءدى بۋرگاسقا الماستىرۋ، وعان قوسا باسقا دا وپتسيوندار بەرۋ تۋرالى ۇسىنىستار كەلسە، قازمۇنايگازدىڭ ويلانىپ قالارى بەلگىلى.
ەاەس-تەگى جانارمايدىڭ ورتاق نارىعى دەگەن دۇنيەنىڭ وزىنە قۇرىلعان قاقپان ەكەنىن قازاقستان ەندى تۇسىنە باستادى. ورتاق نارىق بولسا، رەسەيدەگى دەفيتسيت پەن قىمبات باعا قازاقستانعا دا كەلەتىنى ايدان انىق بولىپ تۇر. وندا بىزدەگى ساناۋلى ءموز-لار تولىق رەسەي نارىعىنا جۇمىس ىستەپ، ءوز نارىعىمىزدا ادام ايتقىسىز دەفيتسيت باستالادى. ال 2022 جىلى اۆتوگاز باعاسىنىڭ بىرنەشە ەسە ءوسۋى نەگە الىپ كەلگەندىگىن ۇكىمەت ۇمىتقان جوق. استانا ەۋرازيالىق كوميسسيانى الداپ-سۋلاپ، وسى ورتاق نارىقتىڭ ەنگىزىلۋىن 2025 جىلدان 2027 جىلعا دەيىن سوزدى. بىراق كرەمل تىزەدەن باسىپ، 2027 جىلدان كەيىن ءبىز جالتارا المايتىنداي قىلۋعا نيەتتى”، دەپ جازدى دەرەككوز.
ەسكە سالساق، بۇعان دەيىن رەسەي قاجەت جاعدايدا قازاقستاننان 100 000 توننا بەنزيندى رەزەرۆتە ۇستاۋىن سۇراعانىن حابارلاعان ەدىك. كرەمل ناۋرىزدان باستاپ التى ايعا دەيىن رەسەي اۋماعىنان بەنزيندى سىرتقا شىعارۋعا شەكتەۋ قويدى. قازىر ەلىمىزدە حالىق كوپ تۇتىناتىن اي-92 ماركالى بەنزيننىڭ 307 700 توننا قورى بار. ال اي-95 ماركالى بەنزين رەزەرۆى - 58 000 توننا، ديزەل رەزەرۆى - 435 300 توننا.
