تاجىكستاننىڭ دارۆاز اۋدانىندا اۋعانستان اۋماعىنداعى قارۋلى قاقتىعىس كەزىندە اتىلعان وقتان 21 جاستاعى ايەل قازا تاپتى، دەپ حابارلايدى “ادىرنا”.
شەتەلدىك باق حابارلاۋىنشا، وقيعا 13 تامىزدا دارۆاز اۋدانىنىڭ داشتاك اۋىلىندا بولعان.
الدىن الا مالىمەت بويىنشا، ايەل ءۇي شارۋاسىمەن اينالىسىپ جۇرگەن كەزدە وق تەرەزەدەن كىرىپ، ونىڭ باۋىر تۇسىنا تيگەن. جارالانعان ازاماتشا اۋرۋحاناعا جەتكىزۋ بارىسىندا كوز جۇمدى. ارتىندا كىشكەنتاي بالاسى قالدى.
تاجىكستان ءسىم مالىمەتىنشە، اۋعانستان اۋماعىنداعى قاقتىعىس كەزىندە «تاليبان» قوزعالىسىنا تيەسىلى تىكۇشاقتار تاجىكستاننىڭ اۋە كەڭىستىگىن بۇزعان. سونىمەن قاتار اتىس سالدارىنان شەكارا ماڭىنداعى تۇرعىن ۇيلەرگە زاقىم كەلگەن.
وسىعان بايلانىستى تاجىكستان ءسىم اۋعانستان تاراپىنا نارازىلىق نوتاسىن جولداپ، وقيعاعا قاتىستى جان-جاقتى تەرگەۋ جۇرگىزۋدى تالاپ ەتتى. قازىر ەلدىڭ ءتيىستى قاۋىپسىزدىك جانە اسكەري قۇرىلىمدارى وقيعانىڭ ءمان-جايىن انىقتاپ جاتىر.
قاقتىعىس اۋعانستاننىڭ باداحشان پروۆينتسياسىنداعى نۋساي اۋدانىندا «تاليبان» كۇشتەرى مەن كوماندير دجۋما حان فاتەحكە ادال قارۋلى توپتار اراسىندا بولعان. قارۋلى قاقتىعىس 11 تامىزدا باستالعان. تاراپتار اراسىنداعى تەكەتىرەسكە التىن وندىرەتىن نىسانداردى باقىلاۋ ماسەلەسى جانە فاتەحكە جاقىن ادامداردىڭ ۇستالۋىنا بايلانىستى داۋ سەبەپ بولعانى حابارلاندى.
13 تامىزدا «تاليبان» كۇشتەرى فاتەح جاقتاستارىنىڭ پوزيتسيالارىنا اۋەدەن سوققى جاساعان. قاقتىعىس بارىسىندا فاتەحكە قاراستى كۇشتەر «تاليباننىڭ» مي-17 تىكۇشاعىن اتىپ تۇسىرگەنى تۋرالى اقپارات تارادى. الايدا تىكۇشاقتاعى ادامداردىڭ تاعدىرى تۋرالى مالىمەت ازىرگە رەسمي تۇردە راستالعان جوق.
تاجىكستان پرەزيدەنتى ەمومالي راحمون 14 تامىزدا دارۆاز اۋدانىنىڭ باسشىسى ۋمەدجون نوسيرزودامەن تەلەفون ارقىلى سويلەستى. مەملەكەت باسشىسى قازا تاپقان ايەلدىڭ وتباسىنا كوڭىل ايتىپ، وتباسىعا قارجىلاي جانە مورالدىق قولداۋ كورسەتۋدى تاپسىردى. سونداي-اق مارقۇمنىڭ كىشكەنتاي بالاسىنىڭ تاربيەسى مەن ءبىلىم الۋىنا ەرەكشە نازار اۋدارۋدى تاپسىردى.
