تاجىكستاندا «ەشوني-كاراتە» لاقاپ اتىمەن تانىلعان سايداحمەد احمەدوۆ ۇستالدى، دەپ حابارلايدى «ادىرنا» ءتىلشىسى Avesta-عا سىلتەمە جاساپ.
ول امورالدىق ارەكەتتەر جاسادى جانە ءدىني بەدەلى مەن ادامداردىڭ سەنىمىن پايدالانىپ، ينتيمدىك قاتىناسقا ءتۇستى دەگەن كۇدىككە ىلىنگەن. تاجىكستان ءىىم مالىمەتىنشە، احمەدوۆ ءوز ءىزباسارلارى اراسىندا «ەشوني-كاراتە» دەگەن اتپەن بەلگىلى بولعان. الايدا ونىڭ ءدىني ءبىلىمى بولماعان، ول بال اشۋمەن، ماگيالىق راسىمدەر وتكىزۋمەن اينالىسىپ، جەكە جانە ىسكەرلىك ماسەلەلەردى شەشۋگە كومەكتەسەمىن دەپ ۋادە بەرگەن.
تەرگەۋ مالىمەتىنە سايكەس، سايداحمەد احمەدوۆ كومەك سۇراپ كەلگەن ايەلدەردى تۋىستارىنىڭ قاتىسۋىنسىز ءوز ۇيىندە قابىلداعان. دۇعا وقۋ جانە ءتۇرلى راسىمدەر كەزىندە ولاردىڭ ءدىني سەنىمىن پايدالانىپ، ايەلدەرگە قاتىستى ادەپسىز ارەكەتتەر جاساپ، جاقىن قاتىناسقا تۇسكەن. سونىمەن قاتار كەيبىرىن نەكەگە تۇرۋعا كوندىرىپ، كەيىن ولارمەن قارىم-قاتىناسىن توقتاتقان. كۇدىكتىنىڭ ءوزى ايەلدەرمەن جەكە قالاۋىن قاناعاتتاندىرۋ ءۇشىن نەكەگە تۇرعانىن مويىنداعان.
ۇيالى تەلەفونىن تەكسەرۋ بارىسىندا كوپتەگەن ايەلگە جەكە سيپاتتاعى حابارلامالار جىبەرگەنى انىقتالعان. جالپى العاندا، ول 11-دەن استام ايەلمەن وسىنداي قاتىناستا بولعانى حابارلاندى.
قازىرگى ۋاقىتتا ول ءۇش ايەلىمەن بىرگە تۇرادى، ال 10 ايەلدەن 20 بالاسى بار. بالالاردىڭ اۋىر تۇرمىستىق جاعدايدا ءومىر ءسۇرىپ جاتقانى ايتىلدى.
قۇقىق قورعاۋ ورگاندارىنىڭ مالىمەتىنشە، ول سەنىمگە كىرۋ ءۇشىن دەنە جاتتىعۋلارىن جانە «كاراتە» ەلەمەنتتەرىن كورسەتكەن. سول سەبەپتى وعان وسىنداي لاقاپ ات بەرىلگەن.
سونداي-اق ەر ادام راسىمدەر وتكىزۋ ءۇشىن ازاماتتاردان 100-دەن 200 اقش دوللارىنا دەيىن اقشا الىپ، كەي جاعدايدا ءبىر قوي تالاپ ەتكەن.
ول 20 جىل بويى مادانيات-2 مەشىتىندە يمام-حاتىب بولىپ قىزمەت اتقارعان. رەسمي تۇردە ادالدىق پەن يماندىلىققا شاقىرعانىمەن، تەرگەۋ دەرەگىنشە، زاڭعا قايشى ارەكەتتەر جاساعان. ەر ادامعا قاتىستى تاجىكستان رەسپۋبليكاسى قىلمىستىق كودەكسىنىڭ 142-بابى 1-بولىگى بويىنشا قىلمىستىق ءىس قوزعالدى. قازىرگى ۋاقىتتا تەرگەۋ امالدارى جۇرگىزىلىپ جاتىر.
بۇعان دەيىن دە احمەدوۆ قىلمىستىق كودەكستىڭ 170-بابى (ەكى نەمەسە كوپ ايەل الۋ) بويىنشا سوتتالعان.
