قازاقستاننىڭ ەنەرگەتيكا ءمينيسترى ەرلان اقكەنجەنوۆ «دوستىق» مۇناي قۇبىرى ارقىلى گەرمانياعا قازاقستاندىق مۇناي جەتكىزۋ ماسەلەسى بويىنشا ازىرگە ىلگەرىلەۋ جوق ەكەنىن ايتتى، دەپ حابارلايدى "ادىرنا" ۇلتتىق پورتالى.
ۇكىمەت كۋلۋارىندا جۋرناليستەردىڭ ساۋالىنا جاۋاپ بەرگەن ءمينيستردىڭ ايتۋىنشا، گەرمانيا تاراپى بۇل ماسەلەنى قازاقستانعا الداعى ساپار بارىسىندا كوتەرۋى مۇمكىن.
«مەنىڭ ويىمشا، گەرمانيانىڭ ەكونوميكا ءمينيسترى بۇل ماسەلەنى مىندەتتى تۇردە قوزعايدى. سەبەبى قازاقستان شۆەدت مۇناي وڭدەۋ زاۋىتىنا مۇناي جەتكىزەتىن نەگىزگى جەتكىزۋشىلەردىڭ ءبىرى بولدى. سوندىقتان بۇل تاقىرىپ نەمىس تاراپى ءۇشىن ماڭىزدى. الايدا قازىرگى ۋاقىتتا رەسەي تارابى بىزگە تەحنيكالىق مۇمكىندىك بار ەكەنىن راستاعان جوق. الداعى التى ايعا ارنالعان جوسپارلاردا بۇل باعىت بويىنشا ازىرگە نولدىك كورسەتكىش تۇر»، – دەدى ەرلان اقكەنجەنوۆ.
ءمينيستردىڭ سوزىنشە، شىلدە ايىندا دا «دوستىق» قۇبىرى ارقىلى مۇناي تاسىمالى جۇزەگە اسىرىلمايدى.
ەسكە سالايىق، ءساۋىر ايىندا بۇقارالىق اقپارات قۇرالدارىندا رەسەي تاراپىنىڭ شەشىمىمەن 1 مامىردان باستاپ قازاقستان مۇنايىن گەرمانياعا «دوستىق» قۇبىرى ارقىلى جەتكىزۋ ۋاقىتشا توقتاتىلۋى مۇمكىن ەكەنى تۋرالى اقپارات تاراعان. بۇل باعىت ارقىلى قازاقستان گەرمانياداعى مۇناي وڭدەۋ زاۋىتتارىنا تاۋلىگىنە 200 مىڭ باررەلگە دەيىن مۇناي ەكسپورتتاپ كەلگەن.
