قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ جۇبايى سارا الپىسقىزى الماتى وبلىسىنداعى شامالعان اۋىلىندا ورنالاسقان نازارباەۆتار اۋلەتىنىڭ قورىمىنا جەرلەنگەن بولۋى مۇمكىن، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
اۋلەتكە تيەسىلى قورىمدا جاڭا قابىر پايدا بولعان. جاڭا بەيىت مارقۇم بولات نازارباەۆتىڭ قابىرىنىڭ ءدال جانىندا ورنالاسقان. قابىردە ەشقانداي جازۋ، بەلگى جوق. بۇل جاعداي قوعامدا سارا نازارباەۆانىڭ قايتىس بولعانى تۋرالى بولجامداردى كۇشەيتىپ وتىر.
ەسكە سالا كەتەيىك، 14 مامىر كۇنى سارا نازارباەۆانىڭ قايتىس بولعانى تۋرالى اقپارات تاراعان ەدى. الايدا بۇل اقپاراتتى نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي رەسمي تۇردە جوققا شىعاردى.
سوعان قاراماستان، سوڭعى كۇندەرى الماتىدا بولعان وقيعالار بۇل مالىمدەمەگە كۇمان تۋعىزىپ وتىر.
سارسەنبى كۇنى تۇستەن كەيىن الماتىداعى پرەزيدەنت ىستەرى باسقارماسىنا قاراستى رەسپۋبليكالىق كلينيكالىق اۋرۋحاناداعى (كوپشىلىككە «سوۆمينكا» دەگەن اتاۋمەن تانىمال) كۇزەت الىنىپ تاستالعان.
16 مامىر كۇنى الماتى قالاسىنىڭ جوعارعى بولىگىندە ورنالاسقان نازارباەۆتار وتباسىنىڭ رەزيدەنتسياسى ماڭىندا پوليتسيا مەن كۇزەت قىزمەتى كۇشەيتىلگەن. مۇحاممەد حايدار دۋلاتي كوشەسى ۋاقىتشا جابىلىپ، عيماراتقا كىرىپ-شىعىپ جاتقان كولىكتەر، سونىڭ ىشىندە ءمايىت تاسيتىن كولىككە ۇقساس كولىك بايقالعان. بۇل جايت جۋرناليستەردىڭ نازارىنان تىس قالمادى.
وقيعا ورنىندا بولعان Orda.kz تىلشىلەرى ءمايىت تاسيتىن كولىككە ۇقساس بىرنەشە كولىكتى سۋرەتكە تۇسىرگەن. الايدا، بەيرەسمي كيىمدەگى كۇزەت قىزمەتكەرلەرى ولاردان بارلىق فوتو جانە ۆيدەو ماتەريالداردى ءوشىرۋدى تالاپ ەتكەن. كەيىن جۋرناليستەردى پوليتسيا ۇستاپ، بوستاندىق اۋداندىق پوليتسيا بولىمىنە جەتكىزگەن. ولار تۇسىنىكتەمە جازعان سوڭ، تەلەفوندارى تەكسەرىلىپ، ماتەريالداردىڭ جويىلعانىنا كوز جەتكىزىلگەننەن كەيىن عانا بوساتىلعان.
قازىرگى ساتتە سارا نازارباەۆانىڭ قايتىس بولعانى تۋرالى رەسمي مالىمدەمە جاسالعان جوق.
