بۇگىن قىزىلوردا وبلىسىنىڭ اكىمى مۇرات ەرگەشباەۆتىڭ توراعالىعىمەن وتكەن ماجىلىستە مەملەكەت باسشىسىنىڭ ساياسي-ەكونوميكالىق رەفورمالارىن ىسكە اسىرۋ جونىندەگى تاپسىرمالارىنىڭ ورىندالۋ بارىسى قارالدى.
«جاڭا كونستيتۋتسيادا ايقىندالعان قاعيداتتار مەملەكەتتىك بيلىكتىڭ بارلىق تارماعىنىڭ قىزمەتىنە تىڭ سەرپىن بەرەدى. مەملەكەتتىك باسقارۋدىڭ باستى ولشەمى حالىققا ادال قىزمەت ەتۋ، زاڭ تالاپتارىن مۇلتىكسىز ساقتاۋ بولۋى ءتيىس.
جاڭا ساياسي كەزەڭ بىزگە ۇلكەن جاۋاپكەرشىلىك جۇكتەيدى. ءبىزدىڭ مىندەتىمىز – جاڭا كونستيتۋتسيانىڭ قاعيداتتارىن حالىقتىڭ كۇندەلىكتى ومىرىندە ناقتى ناتيجە بەرەتىن ءتيىمدى مەملەكەتتىك ساياساتقا اينالدىرۋ. سىر وڭىرىندە دە جاڭا ساياسي رەفورمالاردىڭ تالاپتارىنا سايكەس كەشەندى جۇمىستار جۇرگىزىلۋى قاجەت»، – دەدى مۇرات نالقوجاۇلى.
كۇنى كەشە مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا ساياسي-ەكونوميكالىق رەفورمالاردىڭ، اۋقىمدى وزگەرىستەردىڭ جاڭا كەزەڭىنە ارنالعان تاپسىرمالار جۇكتەگەنى بەلگىلى.
ماجىلىستە بارلىق سالا باسشىلارى وسى مىندەتتەردى ورىنداۋدا اتقارىلاتىن ىستەردىڭ باستى باعدارى تۋرالى باياندادى.
جيىندا وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى ەرلان توراليەۆ مەملەكەت باسشىسىنىڭ قازاقستاندى ۇلكەن قۇرىلىس الاڭىنا اينالدىرۋ تاپسىرماسى ءوڭىردىڭ قۇرىلىس سالاسىنىڭ ودان ءارى وركەندەۋىنە وڭ اسەرىن تيگىزەتىنىن اتاپ ءوتتى.
ەسكە سالساق، 2022 جىلى قۇرىلىس سالاسىنا مەملەكەتتىك بيۋدجەت ەسەبىنەن 24,3 ملرد. تەڭگە، 2025 جىلى 138,3 ملرد. تەڭگە ءبولىنىپ، قارجى كولەمى 6 ەسە وسكەن. جالپى وسى جىلدار ارالىعىندا 272 الەۋمەتتىك نىسان جانە 1016 تۇرعىن ءۇي پايدالانۋعا بەرىلدى.
بيىل جىل سوڭىنا دەيىن تابىستالاتىن 3 685 پاتەر 15 مىڭعا جۋىق تۇرعىننىڭ باسپانا ماسەلەسىن شەشەدى.
وبلىستىق ءبىلىم باسقارماسىنىڭ باسشىسى اسقاربەك ەسجانوۆ مەملەكەت باسشىسى، ۇكىمەت، وبلىس اكىمدىگى بەلگىلەگەن باعىتتاردى ىسكە اسىرۋدا مەكتەپكە دەيىنگى تاربيەدەن باستاپ، جالپى ورتا، تەحنيكالىق جانە كاسىپتىك بىلىمگە دەيىنگى بارلىق دەڭگەيدە ساپانى ارتتىرۋعا باسىمدىق بەرىلەتىنىن اتاپ ءوتتى.
باسقارما باسشىسى تسيفرلىق ترانسفورماتسيانى جەدەلدەتۋ، تەحنيكالىق جانە كاسىپتىك ءبىلىم بەرۋ جۇيەسىن ەڭبەك نارىعىنىڭ سۇرانىسىنا بەيىمدەۋ، تاربيە جۇمىسىن جاڭا مازمۇندا كۇشەيتۋ ءۇشىن اتقارىلاتىن جۇمىس باعىتىنا دا توقتالدى.
وبلىستىق كاسىپكەرلىك جانە ونەركاسىپ باسقارماسىنىڭ باسشىسى ءمولدىر تاۋىپباەۆا كەيىنگى ءتورت جىلدا ءوڭىر ەكونوميكاسىنا 2,4 ترلن تەڭگەگە جۋىق ينۆەستيتسيا تارتىلعانىن اتاپ ءوتتى. جۇزەگە اسقان 72 يندۋستريالىق جوبانىڭ قۇنى 400 ملرد تەڭگەدەن اسادى.
الداعى ءۇش جىلدا 1,9 ترلن. تەڭگەگە 48 ينۆەستيتسيالىق جوبا جۇزەگە اسىرىلىپ، 10 مىڭنان اسا جاڭا جۇمىس ورىندارى اشىلادى.
بۇگىندە 14 ءىرى جوبا، ونىڭ ىشىندە 4 جوبانىڭ قۇرىلىسى جۇرگىزىلۋدە جانە 2-ەۋىنىڭ كاپسۋلاسى سالىندى. جىل سوڭىنا دەيىن تاعى 8 جوبانىڭ قۇرىلىسى باستالادى، 100 ملرد. تەڭگەنىڭ 21 جوباسى جوسپارلانعان.
«قىزىلوردا ەلەكتر تاراتۋ توراپتارى» كومپانياسىنا ەلەكتر جەلىلەرىنىڭ تەحنيكالىق جاي-كۇيىن كەشەندى زەردەلەۋ، ماتەريالدىق-تەحنيكالىق دايىندىقتى كۇشەيتۋ جانە توتەنشە جاعدايلاردىڭ الدىن الۋ شارالارىن جەتىلدىرۋ تاپسىرىلدى. بارلىق جىلۋ كوزىندەگى رەزەرۆتىك ەلەكتر ستانتسيالارىنىڭ تۇراقتى ءارى ۇزدىكسىز جۇمىسىن قامتاماسىز ەتۋ مىندەتى قويىلدى.
الداعى جىلۋ بەرۋ ماۋسىمىنا قاجەتتى كومىر قورىن الدىن الا جاساقتاۋ كەرەك. وسىعان بايلانىستى قالا جانە اۋدان اكىمدەرىنە وپەراتورلارمەن، «قازاقستان تەمىر جولى» كومپانياسىمەن ءوزارا ۇيلەسىمدى جۇمىستى ۇيىمداستىرىپ، تۇرعىنداردى قاتتى وتىنمەن قامتاماسىز ەتۋ تاپسىرىلدى.
مەملەكەت باسشىسىنىڭ تاپسىرماسىنا سايكەس «اكسا ەنەردجي» تۇرىك كومپانياسى جاڭا جىلۋ ەلەكتر ورتالىعىن سالدى. بۇگىندە ورتالىق ىسكە قوسىلىپ، جوبادا قارالعان ەلەكتر ەنەرگياسىن وندىرۋدە. الداعى جىلۋ بەرۋ ماۋسىمىندا تولىق ىسكە قوسىلىپ، تۇرعىنداردى ۇزدىكسىز، ساپالى جىلۋ جانە ەلەكتر ەنەرگياسىمەن قامتاماسىز ەتەدى.
وبلىسقا جىلۋ بەرۋ ماۋسىمىندا 80 مىڭ توننا كومىر كەرەك. ونىڭ 68,3 مىڭ تونناسى تۇرعىندار، 11,7 مىڭ تونناسى الەۋمەتتىك نىساندار قاجەتتىلىگى كەستەگە سايكەس قور جاساقتالۋدا. وڭىردەگى ەلەكتر جەلىلەرى مەن قوندىرعىلارىنىڭ توزۋ دەڭگەيى 60,8%، بيىل قايتا جاڭعىرتۋعا 10,5 ملرد.تەڭگە قارجى جوسپارلانعان.
بۇل جۇمىستاردان كەيىن توزعان جەلىلەر 59 پايىزعا ازايادى. جالپى الداعى جىلۋ بەرۋ ماۋسىمىنا دايىندىق تۇراقتى باقىلاۋدا.
ۇقساس جاڭالىقتار
