بەلگىلى جۋرناليست بەكزات ءجۇسىپ ماڭعىستاۋ وبلىسى اكىمىنىڭ كەڭەسشىسى قىزمەتىنە تاعايىندالدى، دەپ حابارلايدى «ادىرنا» ءتىلشىسى.
«اقتاۋ قالاسى اكىمىنىڭ الەۋمەتتىك ماسەلەلەر جونىندەگى ورىنباسارى قىزمەتىنەن كەلەسى كەزەڭگە اياق باستىم. مەن ءۇشىن تۋعان قالامدا ەڭبەك ەتۋ مول ءارى ماڭىزدى تاجىريبە بولدى. قولىمنان كەلگەنشە مىندەتىمدى مۇلتىكسىز اتقارۋعا تىرىستىم. وسى رەتتە اۋەل باستا سەنىم بىلدىرگەن ايماق باسشىسى نۇرداۋلەت يگىلىكۇلىنا، شاھار اكىمى ابىلقايىر جاڭايۇلىنا العىسىمدى ايتامىن.
قويان-قولتىق جۇمىس ىستەگەن ارىپتەستەرىمە راحمەت. الىسقا ۇزاعانىم جوق. ءارى قاراي قىزمەتىمدى ماڭعىستاۋ وبلىسى اكىمنىڭ كەڭەسشىسى رەتىندە جالعاستىرامىن»،–دەپ جازدى ول جەلىدەگى پاراقشاسىندا.
بەكزات باقبەرگەنۇلى 1989 جىلى ماڭعىستاۋ وبلىسى، ماڭعىستاۋ اۋدانى، ۇشتاعان اۋىلىندا دۇنيەگە كەلگەن.
ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن، قازاق ەكونوميكا، قارجى جانە حالىقارالىق ساۋدا ۋنيۆەرسيتەتىن، ۇلىبريتانياداعى شىعىس انگليا ۋنيۆەرسيتەتىنىڭ ماگيستراتۋراسىن تامامداعان. «بولاشاق» حالىقارالىق باعدارلاماسىنىڭ تۇلەگى.
ەڭبەك جولىن 2006 جىلى «قازاقستان» رترك» اق ماڭعىستاۋ وبلىستىق فيليالىندا رەداكتور قىزمەتىنەن باستاعان. 2009-2013 جىلدارى رەسپۋبليكالىق تەلەارنالاردا جۇمىس ىستەگەن. 2013-2016 جىلدارى – قىزىلوردا وبلىسى اكىمىنىڭ ءباسپاسوز حاتشىسى – باس ينسپەكتور، 2019-2021 جىلدارى – «قازاقستان» رترك» اق ماڭعىستاۋ وبلىستىق فيليالىنىڭ ديرەكتورى، 2021-2022 جىلدارى قازاقستان رەسپۋبليكاسى مەملەكەتتىك حاتشىسىنىڭ حاتشىلىعى مەڭگەرۋشىسىنىڭ ورىنباسارى بولعان.
2022–2023 — قر پرەمەر-ءمينيسترى كەڭسەسى باسشىسىنىڭ ورىنباسارى، 2023–2024 — «Qazcontent» اق باسقارما توراعاسى لاۋازىمدارىنىن اتقارعان. بىلتىر ول اقتاۋ قالاسى اكىمىنىڭ ورىنباسارى بولىپ تاعايىندالعان ەدى.
