ماڭعىستاۋ وبلىسىندا نوسەر جاۋىن سالدارىنان جىلقىلار جاپپاي قىرىلىپ قالدى. بۇل تۋرالى Lada.kz باسىلىمى جازدى، دەپ حابارلايدى "ادىرنا".
اقپاراتقا سايكەس، جاڭبىردان كەيىن جىلقىلار باتپاققا باتىپ، قىرىلىپ قالعان. مال شىعىنى تۋرالى اقپاراتتى جەرگىلىكتى تۇرعىندار الەۋمەتتىك جەلىلەردە جاريالادى. ولاردىڭ ايتۋىنشا، ءار شاڭىراق بىرنەشە باستان ون باسقا دەيىن مالىنان ايىرىلعان.
"ماڭعىستاۋداعى نوسەردەن كەيىن اقشىمىراۋ اۋىلى ماڭىنداعى مالدى سۋ اعىزىپ اكەتىپ، سورتاڭعا تۇسىرگەن. كوپتەگەن جىلقى تۇزدى باتپاققا باتىپ ءولدى، تاعى ءبىر بولىگى ءالى كۇنگە شىعا الماي جاتىر. ەگەر تجم مەن جەرگىلىكتى بيلىك دەر كەزىندە كومەك كورسەتپەسە، جاعداي ءتىپتى كۇردەلەنە ءتۇسۋى مۇمكىن", – دەپ جازدى اۋىل تۇرعىندارى.
ولار بۇل ماسەلەگە زاڭ شىعارۋشىلار مەن جانۋارلاردى قورعاۋشىلاردىڭ نازار اۋدارۋىن سۇرادى.
ماڭعىستاۋ اۋدانى اكىمدىگىنىڭ مالىمەتىنشە، جاعدايدى باعالاۋ ءۇشىن مەملەكەتتىك ورگاندار وكىلدەرىنىڭ قاتىسۋىمەن ارنايى كوميسسيا قۇرىلعان.
الدىن الا دەرەك بويىنشا، 100-دەن اسا جىلقى تابىلعان. قازىر جەرگىلىكتى اتقارۋشى ورگاندار شىعىنعا ۇشىراعان مالدىڭ ناقتى سانىن انىقتاپ جاتىر. سەبەبى مال يەلەرى ازىرگە تۇلىكتى تولىق تۇگەندەپ ۇلگەرمەگەن.
بولجام بويىنشا، مال شىعىنىنا اۋا رايىنىڭ كۇرت بۇزىلۋى - ەكپىندى جەل مەن نوسەر جاۋىن سەبەپ بولعان. باعدارىنان جاڭىلعان جانۋارلار جەتۋى قيىن اۋماقتارعا كىرىپ كەتىپ، باتپاقتا قىرىلىپ قالعان. كەيبىر ءۇيىر ەلدى مەكەندەردەن 60–80 شاقىرىمعا دەيىنگى قاشىقتا قىرىلۋى مۇمكىن.
"سالداردى جويۋ ءۇشىن بارلىق كۇش پەن قۇرال جۇمىلدىرىلدى. وڭىردەگى ءىرى كاسىپورىنداردىڭ تەحنيكاسى، توتەنشە جاعدايلار قىزمەتى جانە جەرگىلىكتى اتقارۋشى ورگاندار ىسكە تارتىلدى. سۋدى سورۋ جانە قالپىنا كەلتىرۋ جۇمىستارى كۇشەيتىلگەن رەجيمدە جالعاسىپ جاتىر. جاعداي ەرەكشە باقىلاۋدا. مال يەلەرىمەن جۇمىس جۇرگىزىلىپ جاتىر، زاماناۋي باقىلاۋ قۇرالدارى مەن ارنايى تەحنيكا قولدانىلىپ جاتىر", – دەپ حابارلادى ماڭعىستاۋ اۋدانى اكىمدىگى وكىلدەرى.
