قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قازاقستان حالىق پارتياسى فراكتسياسىنىڭ جەتەكشىسى ماگەررام ماگەرراموۆ كونستيتۋتسيالىق رەفورما جونىندەگى كوميسسيانىڭ 12-ءشى وتىرىسىندا جاڭا كونستيتۋتسيا جوباسىنىڭ ماڭىزدىلىعى تۋرالى ايتىپ، قۇجاتتىڭ وڭىرلەردە كەڭىنەن قولداۋ تاپقانىن جەتكىزدى.
دەپۋتات قۇجاتتا «ادىلەتتى قازاقستان» قاعيداتىنىڭ ايقىندالعانىن اتاپ ءوتتى.
«قازاقستان رەسپۋبليكاسىنىڭ جاڭا كونستيتۋتسياسىنىڭ جوباسى العاش رەت پرەامبۋلا مەن جالپى ەرەجەلەر دەڭگەيىندە مەملەكەتتىك دامۋدىڭ ىرگەلى باعدارى رەتىندە «ادىلەتتى قازاقستان» قۇندىلىعىن بەلگىلەدى. ادىلەتتى قازاقستان قاعيداتى قازاقستان حالىق پارتياسى تولىق قولدايتىن الەۋمەتتىك ادىلەتتىلىكتى بىلدىرەدى. ادىلەتتى قازاقستان – «زاڭ مەن ءتارتىپ» قاعيداتىن ءسوزسىز ۇستاناتىن ەل; تەڭ مۇمكىندىكتەر ەلى، كەپىلدەندىرىلگەن قۇقىقتار مەن بوستاندىقتار ەلى»، – دەدى دەپۋتات.
سونداي-اق، ول تاريحي ساباقتاستىق پەن ۇلتتىق قۇندىلىقتارعا نازار اۋداردى. ونىڭ ايتۋىنشا، جاڭا كونستيتۋتسيانىڭ پرەامبۋلاسىندا قوعامدىق بەيبىتشىلىك پەن ورنىقتى دامۋدىڭ جالعىز قولايلى نەگىزى رەتىندە ەتنوسارالىق جانە كونفەسسياارالىق كەلىسىمگە ايتارلىقتاي كوڭىل بولىنگەن. ونىڭ سوزىنشە، ەڭبەك ەتۋگە قۇقىعى تۋرالى نورما ەرەكشە قولداۋ تاپتى.
ينستيتۋتسيونالدىق وزگەرىستەر تۋرالى ايتا كەلە، ماگەرراموۆ مەملەكەتتىك بيلىكتىڭ جاڭا قۇرىلىمى جايىندا ءسوز قوزعادى. ءبىرپالاتالى پارلامەنتتى، «حالىق كەڭەسى» جوعارى كونسۋلتاتيۆتىك ورگانىن قۇرۋ، سونداي-اق كونستيتۋتسيا جوباسىنىڭ تۇبەگەيلى جاڭالىقتارى جاڭا باعدار بەرەدى. دەپۋتاتتىڭ ايتۋىنشا، قازىر مەملەكەت تەك پروتسەستەردى باسقارۋعا عانا ەمەس، ازاماتتارعا قىزمەت ەتۋگە نەگىزدەلگەن.
ماگەرراموۆ جوبانىڭ كەڭىنەن قولداۋ تاپقانىنا توقتالىپ، ونى رەفەرەندۋمعا شىعارۋدى ۇسىندى.
«مەن قازاقستاندىقتاردىڭ باسىم كوپشىلىگىنىڭ جاڭا كونستيتۋتسيا جوباسىن تولىق قولدايتىنىن سەنىممەن ايتا الامىن. مۇنى تەك كوميسسيانىڭ عانا ەمەس، سونىمەن قاتار ەلىمىزدىڭ بارلىق وڭىرلەرىندەگى جاڭا كونستيتۋتسيا جوباسىن ءارتۇرلى قوعامدىق، الەۋمەتتىك توپتارمەن، قوعامدىق ۇيىمدارمەن جانە ەڭبەك ۇجىمدارىمەن تالقىلاۋ اياسىندا كەزدەسۋلەردى وتكىزگەن حالىق پارتياسى فيليالدارىنىڭ جۇمىسىنا بايلانىستى ايتىپ وتىرمىن»،– دەدى ول.
ءماجىلىس دەپۋتاتى قازاقستان حالىق پارتياسىنىڭ فراكتسياسى تاراپىنان پارلامەنت ماجىلىسىندە بارلىق فيليالدارىنىڭ، ساراپشىلاردىڭ، عىلىمي جانە زاڭ قوعامداستىعى وكىلدەرىنىڭ، كاسىپكەرلەردىڭ، ۇكىمەتتىك ەمەس ۇيىمداردىڭ قاتىسۋىمەن كەڭەيتىلگەن وتىرىس وتكىزىلگەنىن اتاپ ءوتتى. وتىرىسقا 100-گە جۋىق ادام قاتىسىپ، ازاماتتار جاڭا كونستيتۋتسيا جوباسىنا ءبىراۋىزدان قولداۋ ءبىلدىردى.
«جاڭا كونستيتۋتسيانىڭ جوباسى – وتكەن كەزەڭ مەن بۇگىنگى باسىمدىقتاردى تۇسىنە وتىرىپ، قازاقستاننىڭ بولاشاقتاعى جاڭا باعدارى تۋرالى شەشىم قابىلداعان حالىقتىڭ بىرلىگى مەن بىرتۇتاستىعىنىڭ بەلگىسى دەپ ايتۋعا بولادى. جوعارىدا ايتىلعانداردى ەسكەرە وتىرىپ، ءبىز جاڭا كونستيتۋتسيانىڭ جوباسىن جالپىحالىقتىق رەفەرەندۋمعا شىعارۋدى ۇسىنامىز»، – دەپ قورىتىندىلادى ءسوزىن ماگەررام ماگەرراموۆ.
