قىتاي جازۋشىسى، نوبەل سىيلىعىنىڭ لاۋرەاتى مو يان ۇلتتىق اكادەميالىق كىتاپحانادا قازاق قالامگەرلەرىمەن كەزدەستى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
كەزدەسۋ بارىسىندا جازۋشى ءوز ءسوزىن قازاق ادەبيەتىن جەتكىلىكتى دەڭگەيدە وقىماعانى ءۇشىن كەشىرىم سۇراۋدان باستادى. ونىڭ ايتۋىنشا، بۇعان قازاق ادەبيەتىنىڭ قىتاي تىلىنە اۋدارىلعان نۇسقالارىنىڭ ازدىعى سەبەپ بولعان. ول ساپاردان كەيىن قازاق جازۋشىلارىنىڭ شىعارمالارىن قىتاي تىلىنە اۋدارىلعان ەڭبەكتەر ارقىلى ىزدەپ، تانىسۋدى جوسپارلايتىنىن جەتكىزدى.
شارا بارىسىندا مو يان ادەبي ورتادا كەڭ تالقىلانعان «سالپى كەۋدە، ۇلكەن بوكسە» شىعارماسى بويىنشا ءدارىس وقىدى. جازۋشى تۋىندىدا ءداستۇرلى قىتاي قوعامىنداعى وتباسىلىق كوزقاراستار، ايەل تاعدىرى جانە الەۋمەتتىك ادىلەتسىزدىك ماسەلەلەرى كوتەرىلەتىنىن اتاپ ءوتتى.
اۆتوردىڭ ايتۋىنشا، شىعارمانىڭ باس كەيىپكەرى كۇيەۋىنەن اجىراسقاننان كەيىن بىرنەشە ەر ادامنان توعىز بالا دۇنيەگە اكەلىپ، قوعامداعى ايەلگە قاتىستى بىرجاقتى كوزقاراستارعا قارسى تۇرادى. تۋىندىدا كەيىپكەردىڭ سەگىز قىز، ءبىر ۇل تاربيەلەيتىنى باياندالادى.
سونداي-اق جازۋشى كەيىپكەردىڭ قىزدارىنىڭ ءارتۇرلى الەۋمەتتىك جانە ساياسي ورتا وكىلدەرىنە تۇرمىسقا شىعۋى ارقىلى قوعامداعى قايشىلىقتار مەن سوعىس جاعدايلارى سۋرەتتەلەتىنىن ايتتى. ونىڭ پىكىرىنشە، شىعارمادا انانىڭ قۇدىرەتى مەن وتباسىلىق بايلانىستاردىڭ ماڭىزى ايقىن كورىنىس تابادى.
مو ياننىڭ ايتۋىنشا، كەيىپكەردىڭ جالعىز ۇلى ارالاس نەكەدەن تۋعان، بۇل ارقىلى اۆتور مادەني جانە ۇلتتىق بىرەگەيلىك ماسەلەسىن دە كوتەرەدى.
كەزدەسۋ سوڭىندا جازۋشى قاتىسۋشىلاردىڭ سۇراقتارىنا جاۋاپ بەردى. ول جاس كەزىندە تۇندە جازىپ، كۇندىز ۇيىقتاعانىن، قازىرگى ۋاقىتتا كۇن ءتارتىبىن وزگەرتىپ، كۇندىز جۇمىس ىستەيتىنىن ايتتى.
سونىمەن قاتار مو يان ادەبيەتتەگى «كوركەم شىندىق» پەن «ناقتى ءومىر شىندىعىنان» بولەك، ء«ۇشىنشى شىندىقتى» قالىپتاستىرۋ قاجەتتىگىن اتاپ ءوتتى. ول جاس قالامگەرلەرگە ۇلتتىق بولمىس پەن داستۇرگە سۇيەنە وتىرىپ، جاڭا ادەبي فورما ىزدەۋگە كەڭەس بەردى.
جازۋشى ءوز شىعارماشىلىعىندا ماگيالىق رەاليزم ەلەمەنتتەرى بار ەكەنىن ايتىپ، گابريەل گارسيا ماركەس شىعارماشىلىعىنىڭ ىقپالىن مويىندادى. سونىمەن قاتار ول ءاربىر قالامگەردىڭ ءوز ۇلتتىق تانىمىنا سۇيەنە وتىرىپ، الەمدىك ادەبيەتكە جاڭا ۇلەس قوسۋى قاجەت ەكەنىن اتاپ ءوتتى
