Qytai jazuşysy, Nobel syilyǧynyŋ laureaty Mo Iаn Ūlttyq akademiialyq kıtaphanada qazaq qalamgerlerımen kezdestı, dep habarlaidy "Adyrna" ūlttyq portaly QazAqparatqa sıltep.
Kezdesu barysynda jazuşy öz sözın qazaq ädebietın jetkılıktı deŋgeide oqymaǧany üşın keşırım sūraudan bastady. Onyŋ aituynşa, būǧan qazaq ädebietınıŋ qytai tılıne audarylǧan nūsqalarynyŋ azdyǧy sebep bolǧan. Ol sapardan keiın qazaq jazuşylarynyŋ şyǧarmalaryn qytai tılıne audarylǧan eŋbekter arqyly ızdep, tanysudy josparlaitynyn jetkızdı.
Şara barysynda Mo Iаn ädebi ortada keŋ talqylanǧan «Salpy keude, ülken bökse» şyǧarmasy boiynşa därıs oqydy. Jazuşy tuyndyda dästürlı qytai qoǧamyndaǧy otbasylyq közqarastar, äiel taǧdyry jäne äleumettık ädıletsızdık mäselelerı köterıletının atap öttı.
Avtordyŋ aituynşa, şyǧarmanyŋ bas keiıpkerı küieuınen ajyrasqannan keiın bırneşe er adamnan toǧyz bala düniege äkelıp, qoǧamdaǧy äielge qatysty bırjaqty közqarastarǧa qarsy tūrady. Tuyndyda keiıpkerdıŋ segız qyz, bır ūl tärbieleitını baiandalady.
Sondai-aq jazuşy keiıpkerdıŋ qyzdarynyŋ ärtürlı äleumettık jäne saiasi orta ökılderıne tūrmysqa şyǧuy arqyly qoǧamdaǧy qaişylyqtar men soǧys jaǧdailary suretteletının aitty. Onyŋ pıkırınşe, şyǧarmada ananyŋ qūdıretı men otbasylyq bailanystardyŋ maŋyzy aiqyn körınıs tabady.
Mo Iаnnyŋ aituynşa, keiıpkerdıŋ jalǧyz ūly aralas nekeden tuǧan, būl arqyly avtor mädeni jäne ūlttyq bıregeilık mäselesın de köteredı.
Kezdesu soŋynda jazuşy qatysuşylardyŋ sūraqtaryna jauap berdı. Ol jas kezınde tünde jazyp, kündız ūiyqtaǧanyn, qazırgı uaqytta kün tärtıbın özgertıp, kündız jūmys ısteitının aitty.
Sonymen qatar Mo Iаn ädebiettegı «körkem şyndyq» pen «naqty ömır şyndyǧynan» bölek, «üşınşı şyndyqty» qalyptastyru qajettıgın atap öttı. Ol jas qalamgerlerge ūlttyq bolmys pen dästürge süiene otyryp, jaŋa ädebi forma ızdeuge keŋes berdı.
Jazuşy öz şyǧarmaşylyǧynda magiialyq realizm elementterı bar ekenın aityp, Gabriel Garsia Markes şyǧarmaşylyǧynyŋ yqpalyn moiyndady. Sonymen qatar ol ärbır qalamgerdıŋ öz ūlttyq tanymyna süiene otyryp, älemdık ädebietke jaŋa üles qosuy qajet ekenın atap öttı
