انكارا ۋنيۆەرسيتەتى الەۋمەتتىك عىلىمدار ينستيتۋتىنىڭ جۋرناليستيكا ماماندىعىنىڭ PhD دوكتورانتى، تۇركيانىڭ “Türkiye Bursları” شاكىرتاقىسىنىڭ ەكى مارتە جەڭىمپازى نارگيز بەكەن «قازاقستان مەدياسىندا ايەل بولۋ» اتتى مونوگرافيا-كiتابىن جارىققا شىعاردى.
عىلىمي ەڭبەك قازاقستانداعى ايەل جۋرناليستەردىڭ كاسىبي ومىرىندە كەزدەسەتىن گەندەرلىك تەڭسىزدىكتەردى، قۇرىلىمدىق جانە مادەني كەدەرگىلەردى، سونداي-اق وسى قيىندىقتارعا قارسى قالىپتاسقان جەكە جانە ۇجىمدىق ارەكەت ەتۋ تاجىريبەلەرىن تالداۋعا ارنالعان. كىتاپتا الەۋمەتتىك گەندەرلىك رولدەر، جالاقى تەڭدىگى، قىزمەتتىك ءوسۋ، باسقارۋشى لاۋازىمدارعا قول جەتكىزۋ، جۇمىس پەن جەكە ءومىر اراسىنداعى تەڭدىك سياقتى ماسەلەلەر جان-جاقتى قاراستىرىلعان.
زەرتتەۋ ساپالىق ادىستەرگە نەگىزدەلىپ، قازاقستاننىڭ ءارتۇرلى وڭىرلەرىندە قىزمەت اتقاراتىن 10 ايەل جۋرناليستپەن تەرەڭدەتىلگەن سۇحبات جۇرگىزۋ ارقىلى دايىندالعان. اۆتور ايەل جۋرناليستەردىڭ دەموكراتيالىق قوعامداعى ءرولىن اتاپ كورسەتىپ، ولاردىڭ ەڭبەك جاعدايىنداعى تەڭسىزدىكتەردى ناقتى مىسالدارمەن دالەلدەگەن.
نارگيز بەكەننىڭ ايتۋىنشا، كىتاپ تەك اكادەميالىق زەرتتەۋ ەمەس، جەكە تاجىريبە مەن ومىرلىك ۇندەۋدىڭ ناتيجەسى:
«بۇل كىتاپتى زەرتتەۋ رەتىندە ەمەس، پارىز رەتىندە جازدىم. انامنىڭ جانە انام سياقتى تاعدىرلاس ايەلدەردىڭ ەڭبەگىنە، سابىرىنا، كۇشىنە دەگەن قۇرمەتتى بيىكتەتۋ ءۇشىن جازدىم»، – دەيدى اۆتور.
مونوگرافيا مەديا سالاسىنداعى گەندەرلىك تەڭدىكتى نىعايتۋعا باعىتتالعان ناقتى ۇسىنىستار مەن پراكتيكالىق شەشىمدەردى قامتيدى جانە قازاقستانداعى ايەل جۋرناليستەر تاقىرىبىنداعى زەرتتەۋلەردى تولىقتىرادى.
