17 ماۋسىمدا ءماجىلىس حالىقارالىق قايتا قۇرۋ جانە دامۋ بانكى مەن ازيا ينفراقۇرىلىمدىق ينۆەستيتسيالار بانكىنەن قارىز الۋ تۋرالى كەلىسىمدەردى ماقۇلدادى، دەپ حابارلايدى «ادىرنا» ءتىلشىسى.
بيۋدجەت شىعىستارىن قارجىلاندىرۋعا تارتىلاتىن قارىزداردىڭ جالپى كولەمى شامامەن 964 ملن اقش دوللارىن قۇراپ وتىر.
«20 مامىردا استانادا قول قويىلعان ءبىرىنشى كەلىسىم قازاقستانعا بەس جىلدىق جەڭىلدىكتى كەزەڭدى قوسا العاندا، 11 جىل مەرزىمگە 92,3 ملرد يەن سوماسىندا قارىز بەرۋدى كوزدەيدى. ازيا ينفراقۇرىلىمدىق ينۆەستيتسيالار بانكىمەن كەلىسىم 15 ماۋسىمدا استانادا جاسالعان، ونىڭ اياسىندا قازاقستانعا 5 جىلدىق جەڭىلدىكتى كەزەڭدى قوسا العاندا وتەۋ مەرزىمى 11 جىل بولاتىن 62,4 ملرد يەن سوماسىندا قارىز بەرۋ قاراستىرىلىپ وتىر»،– دەلىنگەن حابارلامادا.
ەكى كەلىسىم بويىنشا دا قارجىلاندىرۋ جوسپارلى كەزەڭگە بەكىتىلگەن رەسپۋبليكالىق بيۋدجەت تاپشىلىعى شەڭبەرىندە ەل ەكونوميكاسىنىڭ ورنىقتىلىعىن قولداۋعا باعىتتالعان. قارىزدار بويىنشا سىياقى مولشەرلەمەسى TONA + اۋىسپالى سپرەد فورمۋلاسى بويىنشا ايقىندالادى. سونداي-اق قارىز سوماسىنىڭ 0,25%-ى مولشەرىندە بىرجولعى كوميسسيا جانە يگەرىلمەگەن قاراجات قالدىعىنا جىلىنا 0,25% مولشەرىندە رەزەرۆتەۋ كوميسسياسى كوزدەلگەن.
2026 جىلعى 1 ساۋىردەگى جاعداي بويىنشا قازاقستاننىڭ جالپى مەملەكەتتىك بورىشى 36,84 ترلن تەڭگەنى قۇراعان ەدى.
