ايگىلى جازۋشى، نوبەل سىيلىعىنىڭ يەگەرى مو ءياننىڭ قازاق تىلىندە قوس بىردەي كىتابى جارىق كوردى. بۇل تۋرالى 17 ماۋسىمدا جازۋشىلار وداعىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قازاقتىلدى وقىرمانعا الەم ادەبيەتىنىڭ كورنەكتى وكىلى، 2012 جىلعى نوبەل سىيلىعىنىڭ لاۋرەاتى، قىتاي جازۋشىسى مو ءياننىڭ قازاق تىلىندەگى ەكى بىردەي كىتابى تانىستىرىلادى. قازاقستان جازۋشىلار وداعىنان جارىق كورگەن بۇل ەڭبەكتەر – جازۋشىنىڭ ايگىلى «سارىمساق جىرى» رومانى مەن ء«حالىڭىز قالاي، فولكنەر اعاي؟» اتتى پۋبليتسيستيكالىق جيناعى»،– دەلىنگەن حابارلامادا.
كىتاپتاردىڭ تۇساۋكەسەرى مەن رەسمي تانىستىرىلىمى 22 ماۋسىم كۇنى الماتى قالاسىندا اۆتوردىڭ قاتىسۋىمەن وتەدى. بۇل قازاق ادەبيەتى مەن الەم ادەبيەتى اراسىنداعى مادەني بايلانىستاردى نىعايتاتىن ماڭىزدى وقيعا بولماق.
«سارىمساق جىرى» – مو يان شىعارماشىلىعىنداعى ەڭ تانىمال تۋىندىلاردىڭ ءبىرى. جازۋشىنىڭ وزىنە ءتان ماگيالىق رەاليزم ەلەمەنتتەرى مەن وتكىر الەۋمەتتىك سىنعا قۇرىلعان بۇل رومان كوپتەگەن تىلدەرگە اۋدارىلىپ، الەم وقىرماندارىنىڭ جوعارى باعاسىنا يە بولعان. كىتاپتى قازاق تىلىنە اۋدارعان - تولەگەن مەللات.
ء«حالىڭىز قالاي، فولكنەر اعاي؟» – قازاق تىلىندە جارىق كورىپ وتىرعان مو ءياننىڭ تۇڭعىش پۋبليتسيستيكالىق جيناعى. كىتاپقا جازۋشىنىڭ ءار جىلدارى جازىلعان ەسسەلەرى، ادەبي تولعانىستارى، سۇحباتتارى مەن پۋبليتسيستيكالىق ماقالالارى توپتاستىرىلعان. جيناقتا اۆتوردىڭ ادەبيەت پەن ونەر تۋرالى كوزقاراستارى، شىعارماشىلىق زەرتحاناسى، زاماناۋي قوعام جايلى پايىمدارى، سونداي-اق الەم ادەبيەتىنىڭ ءىرى تۇلعالارىنا قاتىستى وي-تولعامدارى قامتىلعان. كىتاپ اتاۋىنىڭ ءوزى مو يان شىعارماشىلىعىنا ەلەۋلى ىقپال ەتكەن امەريكالىق جازۋشى ۋيليام فولكنەرگە دەگەن رۋحاني قۇرمەت پەن ادەبي ساباقتاستىقتى اڭعارتادى. جيناقتى قازاق تىلىنە اۋدارعاندار - ەدىلبەك دۇيسەن، ءاليحان ماحاش.
قازاق تىلىندە جارىق كورگەن قوس كىتاپ قازاقستان مەن قىتاي اراسىنداعى مادەني-گۋمانيتارلىق بايلانىستاردىڭ دامۋىنا دا وزىندىك ۇلەس قوسپاق.
بۇعان دەيىن نوبەل يەگەرى مو ءياننىڭ العاش رەت قازاقستانعا كەلەتىنىن جازعان ەدىك.
