ءتىل جاناشىرى تولقىن مۇحتارحانوۆا قازاق ءتىلىنىڭ قۇقىعىن شەكتەگەن “Miele” جشس جانە "مەچتا" كومپانياسىمەن سوتتاستى، دەپ حابارلايدى "ادىرنا" ءتىلشىسى Dalanews.kz اگەنتتىگىنە سىلتەپ.
ءتىل جاناشىرى ازاماتتىق سوتتا جەڭىپ شىقتى. تولقىن مۇحتارحانوۆا قازاق ءتىلى ءۇشىن تارتىستى كۇرەس ءبىر جىل بۇرىن باستاۋ العانىن ايتادى.
“كەزەكتە تۇرعاندا ساتۋشى ءبىر كىسىگە: “يا ۆاس نە پونيمايۋ. گوۆوريتە نا رۋسسكوم، ليبو ۋحوديتە س وچەرەدي” دەدى. ماعان سول كەزدە: “مەن ءوز ەلىمدە تۇرامىن، بىراق نەگە قازاق ءتىلىمىز قورعالماعان” دەگەن وي كەلدى. ءسويتىپ زاڭدى adilet.kz-تەن قاراي باستادىم. مەملەكەتتىك ءتىلىمىزدى قورعايتىن زاڭدار كوپ ەكەن. بىراق ءبىز ونى بىلە بەرمەيدى ەكەنبىز. ەگەر مەن سول جەردە زاڭدى بىلگەنىمدە، ساتۋشىنى ورنىنا قويار ەدىم” ، - دەيدى تولقىن حانىم.
وسىلايشا زاڭمەن تولىققاندى تانىسىپ شىققاننان كەيىن، ول بۇل وقيعانى ءبىر كونستيتۋتسيامەن قورعاپ شىعۋعا بولاتىنىن تۇسىنگەن كوپبالالى انا “Miele” كومپانياسىمەن ءتىل ماسەلەسىنە بايلانىستى كەلەڭسىز جاعدايدىڭ ورىن العانىن ايتتى. ول جاڭا پاتەرگە قونىس اۋدارعاندا تۇرمىستىق تەحنيكانى دۇكەندەردەن ساتىپ العان.
“زاتتارىمىزدى “Miele” كومپانياسىنان الدىرتىپ، ورناتتىق. سودان كوپبالالى بولعان سوڭ، ءبىرىنشى قاجەت نارسە كىر ماشينا بولدى. سونى ورناتىپ، قولدانا باستادىق. الايدا مەن نۇسقاۋلىقتان قازاقشا ءماتىن تابا المادىم. ءاربىر العان زاتىمىزدا، قازاقشا نۇسقاۋلىعى مۇلدەم بولمادى. سودان مەن “Miele” كومپانياسىنا حابارلاسىپ، ولاردان قازاقشا نۇسقاۋلىقتى سۇرادىم. ولار بىزگە ۋاقىت كەرەك دەپ جاۋاپ قاتتى. سودان مەن جاقسى دەپ ءوز تالابىمدى سوت ارقىلى شەشەتىنىمدى ايتتىم”، - دەيدى تولقىن حانىم.
دەگەنمەن ساتىپ الۋشىعا قازاق ءتىلدى اقپارات تەك ەكى اپتادان كەيىن عانا كەلگەن.
“ايتا كەتەتىن جايت، “Miele” كومپانياسى ءبىر اي نەمەسە ەكى اپتا بۇرىن اشىلعان كومپانيا ەمەس. قازاقستاندا 15 جىلدان بەرى جۇمىس ىستەپ كەلەدى. وسىنشا جىل نارىقتا بولىپ، قازاقشا نۇسقاسى بولسا، ولار مەنىڭ سول مەزەتتە ەلەكتروندى پوشتاما اقپارات جىبەرەتىن ەدى. بىراق ولار قوڭىراۋ شالعاننان كەيىن اراعا ەكى اپتا سالىپ، ەلەكتروندى نۇسقاسىن جىبەردى جانە پوشتا ارقىلى قولىما اكەلدى. “مiele مەن "مەچتا" كومپانيالارىن تۇتىنۋشى رەتىندە “تۇتىنۋشى قۇقىعىم بۇزىلدى دەپ” ازاماتتىق سوتقا بەردىم.بىرىنشىدەن، مەنىڭ تۇتىنۋشى رەتىندە سۇراعان نۇسقاۋلىقتىڭ جانە “Miele” كومپانياسىندا قازاقشا اقپاراتتىڭ جوق ەكەنىن ايتتىم. سونىمەن قاتار Miele كومپانياسىنىڭ سايتىندا ءتىلدى تاڭدايتىن كەزدە قازاقشا باتىرمانىڭ جوق ەكەنىن دە اتاپ ءوتتىم. سوت پروتسەسىندە ولار “kz” دەپ قازاقشا باتىرمانى ەنگىزدى. بىراق قازاقشا دەگەن باتىرمانى باسساڭىز، اقپارات جوق. سولاردىڭ ءبارىن اۋدارۋ كەرەك دەپ تالاپ قويدىم جانە تۇتىنۋشى رەتىندە قۇقىعىمنىڭ بۇزىلعانىن قوستىم”، - دەيدى ءتىل جاناشىرى.
ناتيجەسىندە ءتىل جاناشىرى “Miele” كومپانياسىن سوت بارىسىندا جەڭىپ شىققان.
“مەنىڭ ءبىر تانىسىم شاڭسورعىش ساتىپ الدى. ول جەردە دە تەك ورىسشا نۇسقاۋلىق بولدى. مەن ونى دالەل رەتىندە قوسقىم كەلدى. الايدا سوت ءبىر تۇتىنۋشى بولعاندىقتان، ونى بولەك تۇتىنۋشى رەتىندە جازسىن دەپ ايتتى. سوتتىڭ شەشىمى بويىنشا، “Miele” كومپانياسىن پروكۋراتۋراعا كورنەكى اقپارات تۋرالى 455-باپ بويىنشا جىبەرۋىم كەرەك بولدى. سونداي-اق “Miele” كومپانياسى ماعان تۇتىنۋشى قۇقىعىم بۇزىلعانى ءۇشىن مورالدىق شىعىن رەتىندە 100.000 تەڭگە تولەيتىن بولدى جانە تولەنگەن باجىمدى قايتاراتىن بولدى”، - دەيدى ول.
ءتىل جاناشىرى قازاق ءتىلىنىڭ قۇقىعىنا قاتىستى ارمانىن ايتتى.
“مەنىڭ تاعى ءبىر ارمانىم - مەملەكەتتىك ءتىل تۋرالى زاڭ شىعىپ، سول زاڭدى قاداعالايتىن بولىمشە بولسا ەكەن دەيمىن. ويتكەنى مەملەكەتتىك ءتىل تەك تۇتىنۋشىعا عانا ەمەس، جالپى قازاق بولىپ قالۋىمىزدىڭ ماڭىزدى بولشەگى” – دەپ ءسوزىن قورىتىندىلادى.
