كوكشەنىڭ كوگىلدىر بەلدەرى مەن كۇمىس كولدەرىنىڭ اراسىنان تالاي تارلان تالانت تۇلەپ ۇشقانى بەلگىلى. سولاردىڭ ءبىرى عانا ەمەس، بىرەگەيى – قازاق ءسوز ونەرىنىڭ كورنەكتى وكىلى جاقان سىزدىقوۆ. بيىل اردا اقىننىڭ تۋعانىنا 125 جىل تولۋىنا وراي كوكشەتاۋ تورىندە وتكەن «كوكشەنىڭ كورنەكتى اقىنى جاقان سىزدىقوۆ – 125 جىل» اتتى ادەبي-تانىمدىق كەش – رۋحانياتقا دەگەن قۇرمەتتىڭ، وتكەنگە تاعزىمنىڭ ايقىن كورىنىسى بولدى.
ماعجان رۋحى ماڭگىلىك مەكەن ەتكەن قاسيەتتى شاھاردا، وبلىستىق امبەباپ-عىلىمي كىتاپحانانىڭ كەڭ زالىندا كوكشەتاۋ قالاسىنىڭ تاريحى مۋزەيىنىڭ ۇيىمداستىرۋىمەن وتكەن كەشكە جينالعان جۇرتشىلىقتىڭ قاراسى قالىڭ بولدى. زيالى قاۋىم وكىلدەرى، اقىن-جازۋشىلار، عالىمدار مەن ونەر ادامدارى، سونداي-اق قالامگەردىڭ ۇرپاقتارى ءبىر شاڭىراق استىندا باس قوسىپ، جاقان سىزدىقوۆتىڭ ءومىر جولى مەن شىعارماشىلىق مۇراسىن تاعى ءبىر زەردەلەدى.
كەش شىمىلدىعىن اشقان ايتىسكەر اقىن مۇحاممەد قوڭقاەۆ ءسوزدىڭ تيەگىن اعىتىپ، جاقان اقىننىڭ تاعدىرلى عۇمىرى مەن ادەبيەتتەگى ورنىنا توقتالدى. ونىڭ ايتۋىنشا، جاقان سىزدىقوۆ – تەك ءوز ءداۋىرىنىڭ عانا ەمەس، بۇگىنگى ۇرپاق ءۇشىن دە رۋحاني باعدار بولا الاتىن تۇلعا.
جيىن بارىسىندا ءسوز العان اقمولا وبلىسى ىشكى ساياسات باسقارماسى باسشىسىنىڭ ورىنباسارى گۇلميرا سابىروۆا، وبلىستىق ارداگەرلەر كەڭەسىنىڭ توراعاسى ەرمەك نۇعىمانوۆ قالامگەردىڭ شىعارماشىلىعىنا، ەڭبەك جولىنا توقتالدى.
«جالپى، بۇل تاعىلىمدى باسقوسۋ – تەك ءبىر تۇلعانى ەسكە الۋ عانا ەمەس، ۇلتتىق ادەبيەتكە دەگەن قۇرمەتتىڭ، رۋحاني ساباقتاستىقتىڭ كورىنىسى بولدى. وسىنداي شارالار ارقىلى ءبىز وتكەننىڭ ونەگەسىن بۇگىنگە جەتكىزىپ، كەلەر ۇرپاقتىڭ بويىنا وتانشىلدىق رۋح پەن ادامگەرشىلىك قۇندىلىقتاردى سىڭىرەمىز»، – دەدى ەرمەك نۇعىمانوۆ.
سونداي-اق ادەبيەتتانۋشى عالىم، فيلولوگيا عىلىمدارىنىڭ كانديداتى نۇرتاس احاتۇلى، فيلولوگيا عىلىمدارىنىڭ كانديداتى، دوتسەنت امانجول ەسماعۇلوۆ، پروفەسسور ءسابيت جامبەك سياقتى تانىمال عالىمدار ءسوز سويلەپ، اقىننىڭ قازاق پوەزياسىنا قوسقان ۇلەسىن عىلىمي تۇرعىدان باعامداپ، ونىڭ ەڭبەكتەرىنىڭ ۋاقىت سىنىنان سۇرىنبەي وتكەنىن اتاپ ءوتتى.
اسىرەسە، اقىن ۇرپاقتارىنىڭ ساحنا تورىنە شىعىپ، ەستەلىك ايتۋى كەشتىڭ اسەرىن ەسەلەي ءتۇستى. نەمەرەلەرى مەن تۋىستارىنىڭ جۇرەكجاردى لەبىزدەرى ارقىلى جينالعاندار جاقان سىزدىقوۆتى تەك اقىن رەتىندە ەمەس، قاراپايىم ادام، قامقور اكە، ادال ازامات رەتىندە دە تاني ءتۇستى.
كەش اياسىندا ۇيىمداستىرىلعان كورمە دە كوپشىلىكتىڭ نازارىن اۋداردى. اقىننىڭ سيرەك كەزدەسەتىن كىتاپتارى، ارحيۆتىك قۇجاتتار مەن فوتوسۋرەتتەرى – وتكەننىڭ ءۇنسىز كۋاسىندەي سىر شەرتتى.
جالپى، بۇل تاعىلىمدى باسقوسۋ – تەك ءبىر تۇلعانى ەسكە الۋ عانا ەمەس، ۇلتتىق ادەبيەتكە دەگەن قۇرمەتتىڭ، رۋحاني ساباقتاستىقتىڭ كورىنىسى بولدى. وسىنداي شارالار ارقىلى ءبىز وتكەننىڭ ونەگەسىن بۇگىنگە جەتكىزىپ، كەلەر ۇرپاقتىڭ بويىنا وتانشىلدىق رۋح پەن ادامگەرشىلىك قۇندىلىقتاردى سىڭىرەمىز.
جاقان سىزدىقوۆتىڭ جىرلارىنداعى ومىرشەڭ وي، تەرەڭ سەزىم ءالى تالاي بۋىننىڭ جۇرەگىنە جول تابارى انىق. دەمەك، كوكشەنىڭ كورنەكتى اقىنىنا كورسەتىلگەن بۇل قۇرمەت – ۇلت رۋحانياتىنا كورسەتىلگەن قۇرمەت.
اۆتور اسلان وسپانوۆ.
