كوكشەتاۋ قالاسىنىڭ ورتالىق الاڭىندا، ابىلاي حان ەسكەرتكىشى ماڭىندا بولعان وقيعاعا بايلانىستى قىلمىستىق ءىس قوزعالىپ، تەرگەۋ باستالدى، دەپ حابارلايدى "ادىرنا" ۇلتتىق پورتالى.
اقمولا وبلىسى پوليتسيا دەپارتامەنتىنىڭ مالىمەتىنشە، 12 ماۋسىمعا قاراعان ءتۇنى ساعات 01:05 شاماسىندا ماس كۇيدە بولعان شەتەل ازاماتى قوعامدىق ءتارتىپتى بۇزىپ، اينالاسىنداعىلارعا قاۋىپ توندىرەتىن ارەكەتتەر جاساعان. الدىن الا مالىمەت بويىنشا، ول ورتالىق مادەنيەت جانە دەمالىس ساياباعىنداعى مۇلىكتى ورتەمەك بولعان.
الايدا ارەكەت بارىسىندا ەر ادام ابايسىزدا ءوزى وتقا ورانىپ، دەنەسىنىڭ شامامەن 80 پايىزى كۇيىپ قالعان. ول اۋىر حالدە مەديتسينالىق مەكەمەگە جەتكىزىلگەن.
پوليتسيانىڭ حابارلاۋىنشا، اتالعان ازامات وقيعاعا دەيىن ءبىر كۇن بۇرىن، 11 ماۋسىمدا قوعامدىق ورىندا ماس كۇيدە جۇرگەنى ءۇشىن اكىمشىلىك جاۋاپكەرشىلىككە تارتىلعان. سونداي-اق ونىڭ بۇعان دەيىن دە قوعامدىق ءتارتىپتى بۇزعانى ءۇشىن قۇقىق قورعاۋ ورگاندارىنىڭ نازارىنا بىرنەشە رەت ىلىككەنى ايتىلدى.
تەرگەۋ اياسىندا وقيعانىڭ ءتۇرلى نۇسقالارى قاراستىرىلىپ جاتىر. سونىڭ ءبىرى بويىنشا، شەتەل ازاماتى بۇرىن پوليتسيا بولىمشەسىنە بىرنەشە رەت جەتكىزىلگەنى ءۇشىن كەك الۋ ماقساتىندا ساياباق مۇلكىن ورتەمەك بولعان بولۋى مۇمكىن. الايدا بۇل نۇسقا ازىرگە رەسمي تۇردە راستالعان جوق.
