وڭىردە 2025–2026 جىلدارداعى جىلىتۋ ماۋسىمىنىڭ قورىتىندىسى بويىنشا جىلۋ جەتكىلىكسىز بەرىلگەنىنە بايلانىستى تۇتىنۋشىلاردىڭ جىلۋمەن جابدىقتاۋ قىزمەتىنە تولەمى قايتا ەسەپتەلەدى.
ەسەپتەۋ جىلۋ ەنەرگياسىن ەسەپكە الۋ قۇرالدارى جوق تۇرمىستىق تۇتىنۋشىلار ءۇشىن سىرتقى اۋانىڭ ناقتى تەمپەراتۋراسى ەسكەرىلىپ جۇرگىزىلدى. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە قر ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ اقمولا وبلىسى بويىنشا دەپارتامەنتى باسشىسىنىڭ ورىنباسارى اندرەي شەۆچەنكو مالىمدەدى.
بيىل قايتا ەسەپتەلەتىن سوما وتكەن جىلمەن سالىستىرعاندا شامامەن 70%-عا تومەن بولدى. سونىمەن قاتار دەپارتامەنت رەتتەلەتىن 150 قىزمەتتى كورسەتەتىن 69 تابيعي مونوپوليا سۋبەكتىسىنىڭ جۇمىسىن باقىلاۋدى جالعاستىرۋدا. ولاردىڭ قاتارىندا جىلۋمەن جابدىقتاۋ، سۋمەن جابدىقتاۋ جانە سۋ بۇرۋ، سونداي-اق ەلەكتر ەنەرگياسىن بەرۋ قىزمەتتەرى بار.
ء«بىز كورسەتىلگەن قىزمەتتەردىڭ ناقتى كولەمىن بەلگىلەنگەن نورماتيۆتەرمەن سالىستىرامىز. ەگەر جىلۋدىڭ جەتكىلىكسىز بەرىلگەنىن انىقتاساق، تۇتىنۋشىلارعا قايتا ەسەپتەۋ جۇرگىزىلەدى. بۇل تەك ەسەپتەلگەن تولەمدى عانا ەمەس، كورسەتىلگەن قىزمەتتىڭ ناقتى ساپاسىن دا ەسكەرۋگە مۇمكىندىك بەرەدى»، - دەدى اندرەي شەۆچەنكو.
سونىمەن قاتار وبلىستا توزۋ دەڭگەيى جوعارى كوممۋنالدىق ينفراقۇرىلىمدى جاڭارتۋ جۇمىستارى جۇرگىزىلۋدە. ەلەكترمەن جابدىقتاۋ جەلىلەرىنىڭ توزۋى ورتا ەسەپپەن 59%، سۋمەن جابدىقتاۋدا 53%، سۋ بۇرۋ جۇيەلەرىندە 61%، ال جىلۋمەن جابدىقتاۋدا 53% قۇرايدى. بيىل 2,2 مىڭ شاقىرىمنان استام جەلى مەن 600-گە جۋىق جابدىقتى جوندەۋ جوسپارلانعان.
ء«بىز ءۇشىن تاريفتىك قاراجاتتىڭ تۇتىنۋشىنىڭ يگىلىگىنە ناقتى جۇمىس ىستەۋى ماڭىزدى. ياعني قاراجات جەلىلەردى جوندەۋگە، جابدىقتاردى جاڭارتۋعا جانە كوممۋنالدىق قىزمەتتەردىڭ سەنىمدىلىگىن ارتتىرۋعا باعىتتالۋى كەرەك. سوندىقتان كاسىپورىنداردىڭ شىعىندارىن مۇقيات قاراپ، قابىلدانعان باعدارلامالاردىڭ ورىندالۋىن باقىلاۋدا ۇستايمىز»، - دەپ اتاپ ءوتتى سپيكەر.
بيىل سونداي-اق 2022–2026 جىلدارعا بەكىتىلگەن ۇزاق مەرزىمدى تاريفتەردىڭ قولدانىلۋ مەرزىمى اياقتالادى. قازىر ماماندار ينفراقۇرىلىمنىڭ جاعدايى مەن تۇتىنۋشىلاردىڭ مۇددەلەرىن ەسكەرە وتىرىپ، كاسىپورىنداردىڭ كەلەسى بەس جىلدىق كەزەڭگە ارنالعان جاڭا وتىنىمدەرىن قاراستىرۋدا.
