مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس «قازاقستان تەمىر جولى» ۇلتتىق كومپانياسىنىڭ ۆوكزال ينفراقۇرىلىمىن جاڭعىرتۋ باعدارلاماسى اياسىندا رەسپۋبليكا بويىنشا 124 ۆوكزالدى جاڭعىرتۋ جۇمىسى باستالعان بولاتىن. بۇگىن بورودۋليحا اۋدانىنىڭ اۋىل جانە بەلاعاش اۋىلدارىنداعى تەمىرجول ۆوكزالدارى قايتا جاڭعىرتۋدان كەيىن ەلىمىزدە العاش بولىپ پايدالانۋعا بەرىلدى. اشىلۋ راسىمىنە وبلىس اكىمى بەرىك ءۋالي، قازاقستان رەسپۋبليكاسى كولىك ۆيتسە-ءمينيسترى جانىبەك تايجانوۆ، «قازاقستان تەمىر جولى» ۇك» اق قۇرىلىس جونىندەگى باسقارۋشى ديرەكتورى مارات يسقاليەۆ قاتىستى.
اۋىل ستانتسياسىندا 600-دەن استام تۇرعىن بار. مۇنداعى تەمىرجول ۆوكزالى 1929 جىلى سالىنعان. سوڭعى رەت 2011 جىلى كۇردەلى جوندەۋدەن وتكەن. اۋىل ستانتسياسى ءوڭىردىڭ كولىك جۇيەسىندە ماڭىزدى ورىن الادى. ستانتسيا ارقىلى حالىقارالىق باعىتتاعى «نوۆوسيبيرسك – الماتى» پويىزى قاتىنايدى. بەلاعاش اۋىلىندا 900-دەن استام حالىق تۇرادى.
ەلدى مەكەندەگى تەمىرجول ۆوكزالى 1914 جىلى بوي كوتەرگەن. عيماراتقا سوڭعى رەت 2013 جىلى كۇردەلى جوندەۋ جۇرگىزىلگەن.
رەكونسترۋكتسيا بارىسىندا اۋىل ستانتسياسىنداعى تەمىرجول ۆوكزالى عيماراتىنىڭ اۋماعى 240,9 شارشى مەتردەن 272,89 شارشى مەترگە، بەلاعاش تەمىرجول ۆوكزالى اۋماعى 208 شارشى مەتردەن 264,55 شارشى مەترگە دەيىن كەڭەيتىلدى. ەكى نىساندا دا شاتىر تولىق اۋىستىرىلىپ، ىشكى جانە سىرتقى ارلەۋ جۇمىستارى جۇرگىزىلدى. سۋ، كارىز، جىلۋ، ەلەكترمەن جابدىقتاۋ، جەلدەتۋ جانە كونديتسيونەرلەۋ جۇيەلەرى جاڭارتىلدى. پەرروندار قايتا جوندەلىپ، ىرگەلەس اۋماقتار اباتتاندىرىلدى. ۆوكزالدار جاڭا جيھازدارمەن جانە قاجەتتى جابدىقتارمەن قامتاماسىز ەتىلدى.
سونداي-اق، مۇمكىندىگى شەكتەۋلى ازاماتتارعا، قارت ادامدار مەن كىشكەنتاي بالالارى بار انالارعا قولايلى جاعداي جاساۋعا ەرەكشە كوڭىل ءبولىندى. عيماراتتاردا ارنايى سانيتارلىق توراپتار، انا مەن بالا بولمەلەرى، پاندۋستار مەن تاكتيلدى باعىتتاۋشى ەلەمەنتتەر قاراستىرىلعان.
ايماق باسشىسى قايتا جاڭعىرتىلعان ۆوكزالداردىڭ ەلدى مەكەن تۇرعىندارى ءۇشىن ماڭىزى زور ەكەنىن اتاپ ءوتتى.
«مەملەكەت باسشىسى ەلىمىزدىڭ كولىك-لوگيستيكا الەۋەتىن ارتتىرۋ، تەمىرجول ينفراقۇرىلىمىن جاڭعىرتۋ جانە حالىققا كورسەتىلەتىن قىزمەت ساپاسىن جاقسارتۋ جونىندە ناقتى مىندەتتەر جۇكتەگەن بولاتىن. وسى تاپسىرمالاردى جۇزەگە اسىرۋ اياسىندا اباي وبلىسىندا 10 تەمىرجول ۆوكزالىن رەكونسترۋكتسيالاۋ قولعا الىندى. بۇگىن مىنە، ەكى بىردەي تەمىر جول ۆوكزالىن قايتا جاڭعىرتىپ، ەل يگىلىگىنە بەرىپ وتىرمىز. جارما، ۇشبيىك، اقتوعاي، دەگەلەڭ، جالاڭاشكول، شار ۆوكزالدارىن قىركۇيەك ايىنا دەيىن كەستەگە ساي اياقتاۋدى جوسپارلاپ وتىرمىز. سەمەي مەن اياگوز قالاسىنداعى ۆوكزالدار جىلدىڭ سوڭىندا دەيىن پايدالانۋعا بەرىلەدى. بۇل جۇمىستاردىڭ باستى ماقساتى – تۇرعىندار مەن جولاۋشىلار ءۇشىن قولايلى جاعداي قالىپتاستىرۋ، قاۋىپسىزدىك تالاپتارىن كۇشەيتۋ جانە تەمىرجول قىزمەتىنىڭ ساپاسىن جاڭا دەڭگەيگە كوتەرۋ. جاڭارتىلعان ۆوكزالدار اۋىل تۇرعىندارى مەن ءوڭىر قوناقتارىنا ساپالى قىزمەت كورسەتىپ، حالىق يگىلىگىنە اينالادى دەپ سەنەمىن. وسى يگى ىسكە اتسالىسىپ، قولداۋ كورسەتكەن ازاماتتارعا العىسىمدى بىلدىرەمىن»، – دەدى بەرىك ءۋالي.
قازاقستان رەسپۋبليكاسى كولىك ۆيتسە-ءمينيسترى جانىبەك تايجانوۆ ءوز سوزىندە رەسپۋبليكا بويىنشا 124 ۆوكزالدىڭ جاڭعىرتىلىپ جاتقانىن، سونىڭ ىشىندە ەكى نىسان العاش بولىپ اباي وبلىسىندا پايدالانۋعا بەرىلىپ وتىرعانىن اتاپ ءوتتى.
«مەملەكەت باسشىسىنىڭ تاپسىرماسىمەن ەلىمىزدە 2025 جىلى باستالعان، تاۋەلسىزدىك جىلدارىنداعى ەڭ ءىرى 124 تەمىرجول ۆوكزالىن جاڭعىرتۋ باعدارلاماسى جۇزەگە اسىرىلۋدا. اۋقىمدى جوبا ەلىمىزدىڭ كولىك ينفراقۇرىلىمىن كەشەندى جاڭارتۋعا، جولاۋشىلارعا قىزمەت كورسەتۋ ساپاسىن ارتتىرۋعا جانە ساياحات ءۇشىن زاماناۋي، جايلى ءارى قاۋىپسىز جاعدايلار جاساۋعا باعىتتالعان»، – دەدى ول.
قازىرگى ۋاقىتتا اباي وبلىسىندا «قازاقستان تەمىر جولى» ۇلتتىق كومپانياسىنىڭ ۆوكزال ينفراقۇرىلىمىن جاڭعىرتۋ باعدارلاماسى اياسىندا 8 تەمىرجول ۆوكزالىن (سەمەي، اياگوز، شار، اقتوعاي، جالاڭاشكول، دەگەلەڭ، ۇشبيىك جانە جارما ستانتسيالارى) جاڭعىرتۋ جۇمىستارى جالعاسۋدا.
