Memleket basşysy Qasym-Jomart Toqaevtyŋ tapsyrmasyna säikes «Qazaqstan temır joly» ūlttyq kompaniiasynyŋ vokzal infraqūrylymyn jaŋǧyrtu baǧdarlamasy aiasynda respublika boiynşa 124 vokzaldy jaŋǧyrtu jūmysy bastalǧan bolatyn. Bügın Boroduliha audanynyŋ Auyl jäne Belaǧaş auyldaryndaǧy temırjol vokzaldary qaita jaŋǧyrtudan keiın elımızde alǧaş bolyp paidalanuǧa berıldı. Aşylu räsımıne oblys äkımı Berık Uäli, Qazaqstan Respublikasy Kölık vise-ministrı Jänıbek Taijanov, «Qazaqstan temır joly» ŪK» AQ qūrylys jönındegı basqaruşy direktory Marat İsqaliev qatysty.
Auyl stansiiasynda 600-den astam tūrǧyn bar. Mūndaǧy temırjol vokzaly 1929 jyly salynǧan. Soŋǧy ret 2011 jyly kürdelı jöndeuden ötken. Auyl stansiiasy öŋırdıŋ kölık jüiesınde maŋyzdy oryn alady. Stansiia arqyly halyqaralyq baǧyttaǧy «Novosibirsk – Almaty» poiyzy qatynaidy. Belaǧaş auylynda 900-den astam halyq tūrady.
Eldı mekendegı temırjol vokzaly 1914 jyly boi kötergen. Ǧimaratqa soŋǧy ret 2013 jyly kürdelı jöndeu jürgızılgen.
Rekonstruksiia barysynda Auyl stansiiasyndaǧy temırjol vokzaly ǧimaratynyŋ aumaǧy 240,9 şarşy metrden 272,89 şarşy metrge, Belaǧaş temırjol vokzaly aumaǧy 208 şarşy metrden 264,55 şarşy metrge deiın keŋeitıldı. Ekı nysanda da şatyr tolyq auystyrylyp, ışkı jäne syrtqy ärleu jūmystary jürgızıldı. Su, kärız, jylu, elektrmen jabdyqtau, jeldetu jäne kondisionerleu jüielerı jaŋartyldy. Perrondar qaita jöndelıp, ırgeles aumaqtar abattandyryldy. Vokzaldar jaŋa jihazdarmen jäne qajettı jabdyqtarmen qamtamasyz etıldı.
Sondai-aq, mümkındıgı şekteulı azamattarǧa, qart adamdar men kışkentai balalary bar analarǧa qolaily jaǧdai jasauǧa erekşe köŋıl bölındı. Ǧimarattarda arnaiy sanitarlyq toraptar, ana men bala bölmelerı, pandustar men taktildı baǧyttauşy elementter qarastyrylǧan.
Aimaq basşysy qaita jaŋǧyrtylǧan vokzaldardyŋ eldı meken tūrǧyndary üşın maŋyzy zor ekenın atap öttı.
«Memleket basşysy elımızdıŋ kölık-logistika äleuetın arttyru, temırjol infraqūrylymyn jaŋǧyrtu jäne halyqqa körsetıletın qyzmet sapasyn jaqsartu jönınde naqty mındetter jüktegen bolatyn. Osy tapsyrmalardy jüzege asyru aiasynda Abai oblysynda 10 temırjol vokzalyn rekonstruksiialau qolǧa alyndy. Bügın mıne, ekı bırdei temır jol vokzalyn qaita jaŋǧyrtyp, el igılıgıne berıp otyrmyz. Jarma, Üşbiık, Aqtoǧai, Degeleŋ, Jalaŋaşköl, Şar vokzaldaryn qyrküiek aiyna deiın kestege sai aiaqtaudy josparlap otyrmyz. Semei men Aiagöz qalasyndaǧy vokzaldar jyldyŋ soŋynda deiın paidalanuǧa berıledı. Būl jūmystardyŋ basty maqsaty – tūrǧyndar men jolauşylar üşın qolaily jaǧdai qalyptastyru, qauıpsızdık talaptaryn küşeitu jäne temırjol qyzmetınıŋ sapasyn jaŋa deŋgeige köteru. Jaŋartylǧan vokzaldar auyl tūrǧyndary men öŋır qonaqtaryna sapaly qyzmet körsetıp, halyq igılıgıne ainalady dep senemın. Osy igı ıske atsalysyp, qoldau körsetken azamattarǧa alǧysymdy bıldıremın», – dedı Berık Uäli.
Qazaqstan Respublikasy Kölık vise-ministrı Jänıbek Taijanov öz sözınde respublika boiynşa 124 vokzaldyŋ jaŋǧyrtylyp jatqanyn, sonyŋ ışınde ekı nysan alǧaş bolyp Abai oblysynda paidalanuǧa berılıp otyrǧanyn atap öttı.
«Memleket basşysynyŋ tapsyrmasymen elımızde 2025 jyly bastalǧan, Täuelsızdık jyldaryndaǧy eŋ ırı 124 temırjol vokzalyn jaŋǧyrtu baǧdarlamasy jüzege asyryluda. Auqymdy joba elımızdıŋ kölık infraqūrylymyn keşendı jaŋartuǧa, jolauşylarǧa qyzmet körsetu sapasyn arttyruǧa jäne saiahat üşın zamanaui, jaily ärı qauıpsız jaǧdailar jasauǧa baǧyttalǧan», – dedı ol.
Qazırgı uaqytta Abai oblysynda «Qazaqstan temır joly» ūlttyq kompaniiasynyŋ vokzal infraqūrylymyn jaŋǧyrtu baǧdarlamasy aiasynda 8 temırjol vokzalyn (Semei, Aiagöz, Şar, Aqtoǧai, Jalaŋaşköl, Degeleŋ, Üşbiık jäne Jarma stansiialary) jaŋǧyrtu jūmystary jalǧasuda.
