«بايقوڭىردا» زاقىمدانعان ۇشىرۋ كەشەنى قالپىنا كەلتىرىلدى، دەپ حابارلايدى "ادىرنا" ۇلتتىق پورتالى.
بايقوڭىر عارىش ايلاعى اۋماعىنداعى 31-ءشى ۇشىرۋ الاڭىنداعى قىزمەت كورسەتۋ كابيناسى جوندەلىپ، تولىق قالپىنا كەلتىرىلدى. بۇل تۋرالى روسكوسموس حابارلادى.
اتالعان نىسان وتكەن جىلدىڭ قاراشا ايىندا سويۋز مس‑28 زىمىران-تاسىعىشى ۇشىرىلعاننان كەيىن زاقىمدانعان. ۇشۋ ءساتتى وتكەنىمەن، ستارت ۇستەلىنىڭ كەيبىر ەلەمەنتتەرىنىڭ بۇلىنگەنى انىقتالعان.
ۆەدومستۆو مالىمەتىنشە، جوندەۋ بارىسىندا بارلىق بەكىتۋ توراپتارى جاڭاسىنا اۋىستىرىلىپ، ەلەكتر جابدىقتارى تولىق جاڭارتىلىپ جانە رەتتەلگەن. سونىمەن قاتار قىزمەت كورسەتۋ كابيناسىنىڭ مەحانيزمدەرى تەكسەرىلىپ، تەحنيكالىق قىزمەت كورسەتىلگەن. جوندەۋ كەزىندە 250 مەتردەن استام دانەكەرلەۋ جۇمىستارى جۇرگىزىلگەن.
قازىر كەشەن كەلەسى ۇشىرىلىمعا دايىندالىپ جاتىر. 22 ناۋرىزدا پروگرەسس مس‑33 جۇك عارىش كەمەسىن ۇشىرۋ جوسپارلانعان.
