بۇگىن قىزىلوردادا «دوستىق ۇيىندە» كورنەكتى مەملەكەت جانە قوعام قايراتكەرى بەردىبەك ماشبەكۇلى ساپارباەۆتىڭ ءومىرى مەن ەڭبەك جولىنا ارنالعان «ساپارباەۆ تۇلعاسى» كىتابىنىڭ تانىستىرىلىمى ءوتتى.
وعان وبلىس اكىمى مۇرات ەرگەشباەۆ، قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى، زيالى قاۋىم وكىلدەرى، جاس مەملەكەتتىك قىزمەتشىلەر، ازاماتتىق قوعام جانە بۇقارالىق اقپارات قۇرالدارىنىڭ وكىلدەرى، كىتاپتىڭ قۇراستىرۋشىسى اباي سەيفۋللاۇلى، اعايىن-تۋىس قاتىستى.
ايماق باسشىسى بەردىبەك ساپارباەۆتىڭ ەل دامۋىنا سىڭىرگەن ەڭبەگىنە توقتالىپ، ونىڭ مەملەكەتتىك قىزمەتتەگى ونەگەلى جولى جاس ۇرپاققا ۇلگى ەكەنىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس جۇزەگە اسىپ جاتقان «اكىمدەر مەكتەبى» جوباسى اياسىندا مەملەكەتتىك قىزمەت ىستەرى اگەنتتىگىنىڭ ۇيىمداستىرۋىمەن استانا قالاسىندا «ساپارباەۆ تۇلعاسى» اتتى كىتاپتىڭ تۇساۋكەسەرى وتكەن بولاتىن.
بۇل – ەلگە قىزمەت ەتۋدى ومىرلىك مۇراتىنا اينالدىرعان ارداقتى ازاماتتىڭ ونەگەلى جولىن بەينەلەيتىن تاعىلىمدى تۋىندى. قاراپايىمدىلىق پەن ادامگەرشىلىكتى، كىسىلىك پەن كىشىلىكتى، تالاپشىلدىق پەن ادىلدىكتى ءبىر بويىنا سىيدىرعان ارداقتى ازاماتتىڭ ەسىمى تاۋەلسىز قازاقستاننىڭ تاريحىنا التىن ارىپپەن جازىلدى.
ۋاقىت ونى ارامىزدان الىستاتقانىمەن، رۋحاني مۇراسى ەشقاشان جوعالمايدى»، – دەدى مۇرات نالقوجاۇلى.
باسقوسۋدا كىتاپتىڭ قۇراستىرۋشىسى اباي سەيفۋللاۇلى، ەل اعالارى سامۇرات يماندوسوۆ، بەكمىرزا ەلامانوۆ، مۇرات باقتيارۇلى، وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ ءسوز سويلەدى.
بەردىبەك ماشبەكۇلى مەملەكەتتىك قىزمەتتىڭ ءتۇرلى ساتىلارىندا ابىرويلى ەڭبەك ەتىپ، سىندارلى كەزەڭدە حالىق پەن بيلىك اراسىنداعى ءوزارا تۇسىنىستىك پەن سەنىمدى نىعايتتى. ەڭبەك جانە حالىقتى الەۋمەتتىك قورعاۋ ءمينيسترى، پرەمەر-ءمينيستردىڭ ورىنباسارى، قىزىلوردا، وڭتۇستىك جانە شىعىس قازاقستان، اقتوبە، جامبىل وبلىستارىنىڭ اكىمى رەتىندە ەل دامۋىنا زور ۇلەس قوستى.
