بۇگىن وبلىس اكىمى مۇرات ەرگەشباەۆ، «قازاقستان تەمىر جولى» ۇلتتىق كومپانياسىنىڭ قۇرىلىس جونىندەگى باسقارۋشى ديرەكتورى مارات يسكاليەۆ، وبلىستىق ءماسليحات توراعاسى مۇرات تلەۋمبەتوۆ، قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى-رەكتور ناۋرىزباي بايقاداموۆ، زيالى قاۋىم وكىلدەرى مەن ەل اعالارى قايتا جاڭعىرتۋدان وتكەن قازالى تەمىرجول ۆوكزالىنىڭ سالتاناتتى اشىلۋ راسىمىنە قاتىستى.
ايماق باسشىسى اۋدان تۇرعىندارىن قۇتتىقتاپ، جول-كولىك ينفراقۇرىلىمىن دامىتۋداعى باستامالار، ولاردى جۇزەگە اسىرۋدىڭ ماڭىزدىلىعى تۋرالى ايتتى.
«سىر ءوڭىرى توعىز جولدىڭ تورابىندا ورنالاسقاندىقتان ايماعىمىزدان حالىقارالىق جانە وڭىرارالىق تەمىرجول باعىتتارىمەن مىڭداعان جولاۋشى، شەتەلدىك تۋريستەر قاتىنايدى.
بۇگىن ءبىز عاسىردان استام تاريحى بار قازالى تەمىرجول ۆوكزالىن رەسمي تۇردە ىسكە قوسامىز. كۇنىنە 350 جولاۋشى كەلىپ-كەتەتىن، اۋماعى 8 860 شارشى مەتر عيمارات 1 ملرد. 290 ملن.تەڭگەدەن استام قارجىعا قايتا جاڭعىرتىلدى. جاڭا نىساندا اۋدان تۇرعىندارى مەن قوناقتارىنا ساپالى قىزمەت كورسەتىلەدى دەپ سەنەمىن»، - دەدى مۇرات نالقوجاۇلى. 
اشىلۋ سالتاناتىندا مارات يسكاليەۆ پەن قازالى اۋداندىق ارداگەرلەر كەڭەسىنىڭ توراعاسى ورازعالي بەكبانوۆ ءسوز سويلەپ، تەمىرجول سالاسىندا ەڭبەك ەتىپ جۇرگەن قىزمەتكەرلەر مەن مەردىگەر مەكەمە وكىلدەرى وبلىس اكىمىنىڭ العىس حاتىمەن ماراپاتتالدى.
ايتا كەتەيىك، مەملەكەت باسشىسىنىڭ تاپسىرماسىمەن ەلىمىزدەگى 124 ۆوكزال جاڭعىرتىلىپ جاتىر.
قىزىلوردا وبلىسىنىڭ اۋماعىنداعى ۆوكزالدار وتكەن عاسىردىڭ باسىنداعى "ورىنبور-تاشكەنت" ماگيسترالى جۇرگىزىلگەن كەزەڭدە سالىنعان. تاريحي عيماراتتاردى جاڭعىرتىلاتىن نىساندار تىزىمىنە ەنگىزۋ سول كەزدەگى وبلىس اكىمى نۇرلىبەك ماشبەكۇلىنىڭ باستاماسىمەن جۇزەگە استى. بارلىق اۋدان ورتالىعىنداعى جانە تورەتام، سەكسەۋىل ستانتسيالارىنداعى ۆوكزالداردى، جاڭاقورعان اۋدانىنداعى تالاپ بەكەتىنىڭ پلاتفورماسىن جاڭعىرتۋعا 10 ملرد. تەڭگەگە جۋىق قارجى ءبولىندى.
قازالى تەمىرجول ۆوكزالى – جاي نىسان ەمەس، عاسىرلىق تاريحتىڭ كۋاسى، اۋداننىڭ ءوسىپ-وركەندەۋ جولىنداعى ماڭىزدى سيمۆولداردىڭ ءبىرى. ىرگەتاسى حح عاسىردىڭ باسىندا اقيرەك تاۋىنان قاشالىپ، تۇيە كەرۋەنىمەن جەتكىزىلگەن تاستان قالانعان ەكەن. قابىرعاسى كۇيدىرىلگەن كىرپىشتەن ورىلگەن. ەرەكشە ساۋلەتىمەن دارالانعان بۇل عيمارات 1980 جىلى ارحيتەكتۋرالىق ەسكەرتكىش رەتىندە ارنايى ەسەپكە الىنعان.
بۇگىندە قازالى اۋدانىنىڭ اۋماعىندا 91 شاقىرىم تەمىرجول جەلىسى بار، تاۋلىگىنە 12 جولاۋشىلار پويىزى وتەدى.
سوڭعى رەت 2013 جىلى جوندەۋدەن وتكەن. بىلتىر ءساۋىر ايىندا «قازاقستان تەمىر جولى» ۇلتتىق كومپانياسىنىڭ قارجىلاندىرۋىمەن «باق بەرەكە» جشس عيماراتتىڭ ىرگەتاسى مەن قابىرعالارىن كۇشەيتىپ، شاتىرىن تولىق جاڭارتتى. ەسىك-تەرەزەلەرىن اۋىستىرىپ، كۇتۋ زالدارىن زاماناۋي تالاپتارعا ساي جابدىقتادى. مۇمكىندىگى شەكتەۋلى ازاماتتارعا قولايلى ورتا جاسالىپ، قاۋىپسىزدىك جۇيەلەرى ورناتىلدى. انا مەن بالا بولمەسى، مەديتسينالىق پۋنكت بار. اۋماعى اباتتاندىرىلىپ، جاڭا كەلبەتكە يە بولدى. ماڭىنداعى ينفراقۇرىلىمدى جاقسارتۋ باعىتىندا دا اۋقىمدى جۇمىستار اتقارىلدى. بيىل قاڭتار ايىندا تەمىرجول ۇستىندەگى جاياۋ جۇرگىنشىلەر كوپىرى پايدالانۋعا بەرىلدى.
وسىلايشا ايتەكە بي كەنتىنىڭ تەمىرجولدىڭ ارعى بەتىندە تۇراتىن 13 مىڭنان استام تۇرعىنى ءۇشىن قاۋىپسىز ءارى ىڭعايلى قاتىناۋ مۇمكىندىگى جاسالدى.
