وتباسى كۇنى قارساڭىندا «وتباسى ورتالىعىندا» تاعىلىمدى ءىس-شارا ۇيىمداستىرىلىپ، وبلىس اكىمى مۇرات ەرگەشباەۆ «گاۋھار توي»، «التىن توي»، «لاعىل توي»، ء«ىنجۋ توي»، «كۇمىس تويعا» جەتكەن وتباسىلارمەن جانە جاس شاڭىراق يەلەرىمەن كەزدەستى.
وندا قۇندىلىقتاردى دارىپتەۋگە، ۇرپاق تاربيەسىنە، ەرلى-زايىپتىلار اراسىنداعى سىيلاستىقتى نىعايتۋعا قاتىستى اڭگىمە ءوربىپ، ونەگەلى وتباسىلارعا قۇرمەت كورسەتىلدى.
«مەملەكەت باسشىسى قاسىم-جومارت كەمەلۇلىنىڭ «ەلىمىزدەگى ءاربىر شاڭىراق قازاق وتباسىنىڭ ۇلگىسىنە اينالۋى كەرەك» دەگەن ءسوزى ۇيدەگى تاربيەنىڭ قوعام دامۋىنداعى ايرىقشا ءرولىن ايقىن كورسەتەدى.
جاڭا كونستيتۋتسيامىزدا مەملەكەت بەرىك وتباسى ينستيتۋتىن قالىپتاستىرۋعا جانە ۇرپاق تاربيەسىنە قولايلى ورتا قۇرۋعا باسىمدىق بەرەتىنى ناقتىلانعان.
وڭىرىمىزدە حالىقتىڭ ءال-اۋقاتى مەن الەۋمەتتىك تۇراقتىلىعىن قامتاماسىز ەتۋگە ەرەكشە ءمان بەرىلۋدە. 17 500-گە جۋىق كوپبالالى وتباسى مەملەكەتتىڭ تۇراقتى قولداۋىنا يە.
سىزدەر ونەگەلى ۇرپاق تاربيەلەۋ ارقىلى ەلىمىزدىڭ دامۋى مەن وركەندەۋىنە ولشەۋسىز ۇلەس قوسىپ كەلەسىزدەر. بارلىعىڭىز دا شىنايى قۇرمەت پەن ماقتاۋعا لايىقتىسىزدار. شاڭىراقتىڭ بەرىكتىگىن ساقتاپ، سىيلاستىق پەن مەيىرىمدىلىكتى ءومىر وزەگىنە اينالدىرعان بارشا وتباسىلارعا شىنايى ريزاشىلىعىمدى بىلدىرەمىن»، – دەدى مۇرات نالقوجاۇلى.
كەزدەسۋگە قاتىسۋشىلار بەرەكە-بىرلىكتىڭ، ءوزارا سىيلاستىق، ۇلكەنگە قۇرمەت، كىشىگە ىزەت كورسەتۋدىڭ ماڭىزىنا توقتالىپ، وزدەرىنىڭ ومىرلىك تاجىريبەلەرىن ءبولىستى.
اتاپ ايتقاندا، اۋىل شارۋاشىلىعى سالاسىنىڭ ارداگەرى، 6 بالا، 24 نەمەرە جانە 4 شوبەرە تاربيەلەپ، «التىن تويعا» جەتكەن شىندالى ءابدىرامانوۆ تاتۋلىق پەن بالا تاربيەسى تۋرالى ويىن ورتاعا سالدى.
ال 5 بالانىڭ اناسى، 8 نەمەرەنىڭ اجەسى مارحابات شىنارباەۆا ۇرپاق ساباقتاستىعى جونىندەگى پىكىرىن ايتتى. سونداي-اق جاس وتباسىلار اتىنان التىنبەك ءلازي ءسوز الىپ، ءوزارا تۇسىنىستىك پەن جاۋاپكەرشىلىكتىڭ ماڭىزىنا توقتالدى.
ءىس-شارا بارىسىندا ءان شىرقالىپ، قاتىسۋشىلارعا وبلىس اكىمىنىڭ قۇتتىقتاۋ حاتتارى، سىيلىقتار مەن گۇل شوقتارى تابىستالدى.
ەسكە سالساق، بۇگىندە وبلىسىمىزدا 141 مىڭنان استام وتباسى بار، ونىڭ 48 مىڭنان استامى كوپبالالى. كەيىنگى ءتورت جىلدا ءۇي كەزەگىندەگى ازاماتتارعا 8 مىڭعا جۋىق پاتەر بەرىلدى. 2026-2027 جىلدارى 6200-دەن استام پاتەر تابىستالىپ، 25 مىڭعا جۋىق تۇرعىننىڭ باسپانا ماسەلەسىن شەشۋ جوسپارلانۋدا.
ۇرپاق تاربيەسىنە ەرەكشە ءمان بەرۋ، قۇندىلىقتاردى دارىپتەۋ باعىتىندا «اناعا تاعزىم»، «وتباسى ورتالىعى» جۇيەلى جۇمىس جۇرگىزىپ كەلەدى. اۋداندارداعى «رۋحانيات ورتالىقتارى» جاس وتباسىلارعا قولداۋ كورسەتۋگە جانە ماڭىزدى باستامالاردى جۇزەگە اسىرۋعا باعىتتالعان رۋحاني- الەۋمەتتىك الاڭعا اينالدى.
