Bügın Qyzylordada «Dostyq üiınde» körnektı memleket jäne qoǧam qairatkerı Berdıbek Maşbekūly Saparbaevtyŋ ömırı men eŋbek jolyna arnalǧan «Saparbaev tūlǧasy» kıtabynyŋ tanystyrylymy öttı.
Oǧan oblys äkımı Mūrat Ergeşbaev, qūqyq qorǧau organdarynyŋ bırınşı basşylary, mäslihat deputattary, ziialy qauym ökılderı, jas memlekettık qyzmetşıler, azamattyq qoǧam jäne būqaralyq aqparat qūraldarynyŋ ökılderı, kıtaptyŋ qūrastyruşysy Abai Seifullaūly, aǧaiyn-tuys qatysty.
Aimaq basşysy Berdıbek Saparbaevtyŋ el damuyna sıŋırgen eŋbegıne toqtalyp, onyŋ memlekettık qyzmettegı önegelı joly jas ūrpaqqa ülgı ekenın atap öttı.
«Memleket basşysynyŋ tapsyrmasyna säikes jüzege asyp jatqan «Äkımder mektebı» jobasy aiasynda Memlekettık qyzmet ısterı agenttıgınıŋ ūiymdastyruymen Astana qalasynda «Saparbaev tūlǧasy» atty kıtaptyŋ tūsaukeserı ötken bolatyn.
Būl – elge qyzmet etudı ömırlık mūratyna ainaldyrǧan ardaqty azamattyŋ önegelı jolyn beineleitın taǧylymdy tuyndy. Qarapaiymdylyq pen adamgerşılıktı, kısılık pen kışılıktı, talapşyldyq pen ädıldıktı bır boiyna syidyrǧan ardaqty azamattyŋ esımı Täuelsız Qazaqstannyŋ tarihyna altyn ärıppen jazyldy.
Uaqyt ony aramyzdan alystatqanymen, ruhani mūrasy eşqaşan joǧalmaidy», – dedı Mūrat Nälqojaūly.
Basqosuda kıtaptyŋ qūrastyruşysy Abai Seifullaūly, el aǧalary Samūrat İmandosov, Bekmyrza Elamanov, Mūrat Baqtiiarūly, oblystyq qoǧamdyq damu basqarmasynyŋ basşysy Ruslan Kaiupov söz söiledı.
Berdıbek Maşbekūly memlekettık qyzmettıŋ türlı satylarynda abyroily eŋbek etıp, syndarly kezeŋde halyq pen bilık arasyndaǧy özara tüsınıstık pen senımdı nyǧaitty. Eŋbek jäne halyqty äleumettık qorǧau ministrı, Premer-ministrdıŋ orynbasary, Qyzylorda, Oŋtüstık jäne Şyǧys Qazaqstan, Aqtöbe, Jambyl oblystarynyŋ äkımı retınde el damuyna zor üles qosty.
