اقش پرەزيدەنتى دونالد ترامپ NBC News تەلەارناسىنىڭ ءجۋرناليسى كريستەن ۋەلكەرمەن بولعان سۇقبات كەزىندە ونى «اقىماق» دەپ اتاپ، اڭگىمەنى مەرزىمىنەن بۇرىن اياقتاپ كەتتى. وقيعانىڭ بەينەجازباسى YouTube-تە جاريالاندى، دەپ حابارلايدى «ادىرنا» ءتىلشىسى.
اق ءۇي باسشىسى مەن تەلەجۇرگىزۋشى اقش-تاعى سايلاۋ تاقىرىبىن قىزۋ تالقىلاعان. ترامپ دەموكراتتاردى «سايلاۋ ۇدەرىستەرىن بۇرمالادى» دەپ ايىپتاپ، مۇنداي ارەكەتتەردىڭ اسىرەسە كاليفورنيا شتاتىندا بولعانىن مالىمدەدى. سونىمەن قاتار ول دەموكراتيالىق پارتيا وكىلدەرىن جانە ولاردى قولدايتىن باق-تى الاياقتار دەپ اتاپ، NBC تەلەارناسىن جانە كريستەن ۋەلكەردىڭ ءوزىن دە سىنعا الدى.
جۋرناليست ترامپتىڭ سوزدەرىنە قارسىلىق بىلدىرگەننەن كەيىن ساياساتكەر ونى دەموكراتتارعا جاقتاسىپ، ەلدەگى وقيعالاردى بىرجاقتى ءارى بۇرمالانعان تۇردە كورسەتەدى دەپ ايىپتادى. ونىڭ ايتۋىنشا، جۇرگىزۋشى «نە الاياق، نە اقىماق».
ء«سىز بۇل سايلاۋدىڭ (2020 جىلعى پرەزيدەنت سايلاۋى – رەد.) بۇرمالانعانىن بىلەسىز. ءسىزدىڭ تەلەارناڭىز دا مۇنى بىلەدى (…) ءسىز – الاياقسىز، ABC, CBS جانە CNN دە سونداي. ءسىزدىڭ تەلەارناڭىز بىرجاقتى ءارى ادىلەتسىز. وسى جەردەن اياقتايىق، ماعان جەتەدى. راقمەت، ساۋ بولىڭىز»، – دەدى ترامپ سۇحباتتى اياقتاي وتىرىپ.
5 ماۋسىم كۇنى رەسەي پرەزيدەنتى ۆلاديمير پۋتين 2020 جىلعى اقش پرەزيدەنتتىك سايلاۋىندا ترامپتى «الداپ كەتتى» دەگەن پىكىر بىلدىرگەن. سونداي-اق ول سول كەزدە رەسپۋبليكاشىل كانديدات جەڭىسكە جەتكەن جاعدايدا ۋكرايناداعى قاقتىعىس بولماۋى مۇمكىن ەكەنىن ايتقان.
