تۇركىستان وبلىسىندا تۇرعىنداردى ساپالى ينفراقۇرىلىممەن قامتۋ ماقساتىندا 220 نىساننىڭ قۇرىلىسى جۇرگىزىلۋدە

تۇركىستان وبلىسىندا كوممۋنالدىق سالادا 2025 جىلى 220 نىساننىڭ قۇرىلىسى ىسكە اسىرىلۋدا. ونىڭ ىشىندە، 121 نىسان بيىل اياقتالۋى قاجەت. تۇركىستان وبلىسىنىڭ اكىمى نۇرالحان كوشەروۆتىڭ توراعالىعىمەن وتكەن اپپارات ماجىلىسىندە كوممۋنالدىق نىسانداردىڭ قۇرىلىس بارىسى قارالىپ، اتقارىلىپ جاتقان جۇمىستار پىسىقتالدى.

وبلىس باسشىسى جاۋاپتى تۇلعالارعا قۇرىلىس جۇمىستارىنىڭ بارىسىن تۇراقتى باقىلاۋدا ۇستاۋدى تاپسىرىپ، جۇمىس ساپاسىنا ەرەكشە ءمان بەرۋدى ەسكەرتتى.

– بيىل پايدالانۋعا بەرىلەتىن نىسانداردىڭ قۇرىلىس قارقىنىن كۇشەيتىڭىزدەر. جۇمىس بارىسىن قاتاڭ باقىلاۋعا الۋدى، ساپالى ءارى ۋاقىتىلى اياقتالۋىن قامتاماسىز ەتۋدى تاپسىرامىن، – دەدى نۇرالحان ورالبايۇلى. 

ماجىلىستە جىل سوڭىنا دەيىن قۇرىلىسى اياقتالاتىن نىساندار تۋرالى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارما باسشىسىنىڭ ورىنباسارى روزا ولجابايقىزى باياندادى. ونىڭ مالىمدەۋىنشە، كوممۋنالدىق نىسانداردىڭ قۇرىلىس بارىسى قاتاڭ باقىلاۋعا الىنىپ، تۇراقتى شتاب وتىرىستارىندا قارالۋدا. 2025 جىلى ءوڭىر تۇرعىندارىن ساپالى اۋىز سۋمەن قامتۋ ماقساتىندا 66 نىساننىڭ قۇرىلىسى باستالدى. سونىڭ ىشىندە، بيىل 38 نىساندى اياقتاۋ جوسپارلانسا، قالعان 28 نىسان كەلەسى جىلى تاپسىرىلماق. وسى جوبالاردىڭ ىشىندە ينديكاتورعا 30,8 مىڭ حالقى بار 30 ەلدى مەكەن ەنگىزىلگەن. قالعان 8 ەلدى مەكەندە (حالىق سانى – 0,6 مىڭ) كەشەندى-بلوك مودۋلدەرىن ورناتۋ جۇمىستارى جۇرگىزىلۋدە. بۇگىنگى تاڭدا 30 ەلدى مەكەننىڭ 15 ەلدى مەكەنىندە (سارىاعاش-5, كەلەس-4, قازىعۇرت-1, ورداباسى-3, وتىرار-1, بايدىبەك-1) نىساننىڭ قۇرىلىسى اياقتالعان. ال، قالعان 15 ەلدى مەكەندە قۇرىلىس جۇمىستارى جالعاسۋدا. 
 
وبلىستى كارىز جۇيەلەرىمەن قامتۋ ماقساتىندا 16 جوبانىڭ قۇرىلىسى قولعا الىنعان. جىل سوڭىنا دەيىن 10 نىساننىڭ قۇرىلىسى اياقتالادى. اتاپ ايتقاندا، بيىل تۇركىستان قالاسىندا 7 نىسان، ارىس قالاسىندا 1 نىسان، لەنگىردە 1 نىسان، ورداباسى اۋدانىندا 1 نىسان پايدالانۋعا تاپسىرىلماق. 

2025 جىلى ءوڭىردى گازداندىرۋ ءۇشىن 80 نىساننىڭ قۇرىلىسىنا ءتيىستى قارجى ءبولىندى. وسى جىلى 46 جوبانىڭ قۇرىلىسى اياقتالىپ، 73 مىڭ حالقى بار 43 ەلدى مەكەن تابيعي گازعا قوسىلماق. ال، 34 جوبانى كەلەسى جىلى پايدالانۋعا تاپسىرۋ كوزدەلگەن. قازىرگى تاڭدا 32 نىسان پايدالانۋعا تاپسىرىلدى. جىل قورىتىندىسىمەن 73 مىڭ حالقى بار 43 ەلدى مەكەن تابيعي گازبەن قامتىلادى. ناتيجەسىندە، گازداندىرۋ دەڭگەيى 75,1%-عا جەتىپ، وبلىس اۋماعىندا 1,9 ملن. تۇرعىنى بار 606 ەلدى مەكەن تولىق «كوگىلدىر وتىنعا» قوسىلادى. 

ودان بولەك، بيىل 110,4 مىڭ حالقى بار 53 ەلدى مەكەندى ساپالى ەلەكتر قۋاتىمەن قامتۋ ماقساتىندا 47 نىساننىڭ قۇرىلىسى قولعا الىندى. ونىڭ ىشىندە، 25 نىساننىڭ قۇرىلىس وسى جىلى اياقتالسا، 22 نىساننىڭ قۇرىلىسى 2026 جىلعا وتپەلى. بۇگىنگى تاڭدا 17 نىساننىڭ قۇرىلىسى اياقتالىپ، 14 ەلدى مەكەندە تۇراتىن 32,5 مىڭ ادام تۇراقتى ءارى ساپالى ەلەكتر ەنەرگياسىمەن قامتاماسىز ەتىلدى. قالعان 5 نىسان قۇرىلىسى جىل سوڭىنا دەيىن اياقتالادى. سونىڭ ىشىندە، تولەبي اۋدانىندا 110 كۆ «الاتاۋ» قوسالقى ستانتسياسى ىسكە قوسىلدى. جەتىساي اۋدانىنداعى 110 كۆ «جەتىساي» قوسالقى ستانتسياسىنىڭ قۇرىلىسى اياقتالدى، ىسكە قوسۋ جۇمىستارى جۇرگىزىلۋدە.

جىلۋمەن قامتۋ سالاسىندا بيىل 3 نىسانعا وبلىستىق بيۋدجەتتەن قارجى قارالىپ، 40,2 شاقىرىم جىلۋ جەلىلەرى تولىعىمەن قايتا قۇرىلدى. ناتيجەسىندە، 2024-2025 جىلدارى كەنتاۋداعى جىلۋ ەنەرگو ورتالىعىندا 6 قازاندىقتا تولىعىمەن قايتا قۇرۋ جۇمىستارى جۇرگىزىلىپ، 8 قازاندىققا باسقارۋدىڭ اۆتوماتتاندىرىلعان جۇيەسى ورناتىلدى. سونىمەن قاتار ستانتسياداعى تۋربواگرەگاتتار اعىمداعى جوندەۋ جۇمىستارى جۇرگىزىلىپ، ناتيجەسىندە ەلەكتر قۋاتىن ءوندىرۋ كورسەتكىشى 5 مۆت-تان 10 مۆت-قا ۇلعايدى. 

سونىمەن قاتار جيىندا وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قۋاتجان جۋماتاەۆتىڭ ەسەبى تىڭدالدى. بيىل وبلىس اۋماعىنداعى اۆتوموبيل جولدارى ساپاسىن ارتتىرۋ ماقساتىندا قۇرىلىس-جوندەۋ جۇمىستارىمەن جالپى 288 نىسان نەمەسە 1241,5 شاقىرىم جولدار مەن كوشەلەر قامتىلۋدا. جىل سوڭىنا دەيىن ۇزىندىعى 951,4 شاقىرىمدى قۇرايتىن 233 نىساندى پايدالانۋعا بەرۋ كوزدەلۋدە. اتقارىلعان جۇمىستاردىڭ ناتيجەسىندە جەرگىلىكتى ماڭىزى بار جولداردىڭ جاقسى جانە قاناعاتتى جاعدايداعى ۇلەسى 94,7%-عا جەتپەك.