مەملەكەت باسشىسى قاسىم-جومارت توقاەۆ جۇمىس ساپارىمەن الماتى وبلىسىنا بارىپ، الاتاۋ قالاسىنىڭ دامۋ جوسپارىمەن تانىستى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى. پرەزيدەنتتىڭ الماتى وبلىسىنا جۇمىس ساپارى الاتاۋ قالاسىن دامىتۋ تۇجىرىمداماسىنىڭ تانىستىرىلىمىنان باستالدى. قازىرگى ۋاقىتتا قالانىڭ اۋماعى 88 مىڭ گەكتاردى قۇرايدى. ول 2050 جىلعا دەيىن كەزەڭ-كەزەڭىمەن داميتىن ءتورت فۋنكتسيونالدىق ايماققا بولىنگەن.
اقوردانىڭ مالىمەتىنشە، بۇگىندە قالانىڭ نەگىزگى ءوسۋ نۇكتەلەرى مەن باسىم دامۋ اۋماقتارى ايقىندالعان. ماگيسترالدىق ينفراقۇرىلىمدى دامىتۋ بويىنشا جول كارتاسى جۇزەگە اسىرىلىپ جاتىر. سونىمەن قاتار باسقارۋدىڭ جاڭا مودەلىن قالىپتاستىراتىن كونستيتۋتسيالىق زاڭ قابىلدانعان.
قازىر Gate City تۇرعىن اۋدانىندا بەلسەندى قۇرىلىس جۇمىستارى جۇرگىزىلۋدە. مۇندا ءبىر جايلى مەكتەپ پايدالانۋعا بەرىلگەن. سونداي-اق قالا اۋماعىندا «مارەۆەن فۋد»، «كناۋف»، Fruit Art, Dolce Pharm جانە الماتى جەلدەتكىش زاۋىتى سەكىلدى بەس جۇيە قۇراۋشى كاسىپورىن جۇمىس ىستەپ تۇر.
بۇدان بولەك، جالپى قۇنى 2 تريلليون تەڭگەدەن اساتىن 53 ينۆەستيتسيالىق جوبادان تۇراتىن پۋل قالىپتاستىرىلعان.
ولاردىڭ قاتارىندا PepsiCo كومپانياسىنىڭ ورتالىق ازياداعى ەڭ ءىرى كارتوپ وڭدەۋ زاۋىتىنىڭ قۇرىلىسى، Mars Petcare كومپانياسىنىڭ ءۇي جانۋارلارىنا ارنالعان جەم وندىرەتىن زاماناۋي كاسىپورنى، KHAN TENGRI BIOPHARMA كومپانياسىنىڭ دارىلىك زاتتار مەن مەديتسينالىق جابدىقتار ءوندىرىسى جوباسى بار. ال «يستكومترانس» پەن G-Trans كومپانيالارى لوگيستيكالىق كلاستەر قالىپتاستىرۋ جۇمىستارىن جۇرگىزىپ جاتىر. ساپار بارىسىندا مەملەكەت باسشىسىنا الاتاۋ قالاسىنىڭ فلاگماندىق جوبالارىنىڭ ءبىرى سانالاتىن Iconic Complex كوپفۋنكتسيونالدى كەشەنىنىڭ تۇجىرىمداماسى تانىستىرىلدى. جوبانى Gate District اۋدانىندا سالۋ جوسپارلانعان.
