Iran International تەلەارناسى يران پرەزيدەنتى ماسۋد پەزەشكياننىڭ ەلدىڭ جوعارعى كوشباسشىسى مودجتابا حامەنەيءدىڭ اتىنا وتستاۆكاعا كەتۋ تۋرالى ءوتىنىش جازعانىن مالىمدەدى. تەگەران بۇل اقپاراتتى جوققا شىعاردى دەپ حابارلايدى «ادىرنا» ءتىلشىسى ربك-عا سىلتەمە جاساپ.
تەلەارنا بۇل مالىمەتتى جاعدايدان حاباردار دەرەككوزدەرگە سۇيەنە وتىرىپ جاريالاعان. حابارلاماعا سايكەس، پەزەشكيان حاتىندا ەلدى باسقارۋ رەسمي مەملەكەتتىك ينستيتۋتتاردىڭ شەڭبەرىنەن شىعىپ كەتكەنىن جانە بيلىكتىڭ نەگىزگى تەتىكتەرى تولىقتاي يسلام رەۆوليۋتسياسى ساقشىلارى كورپۋسى (يرسك) قۇرامىنداعى بەلگىلى ءبىر قولباسشىلار توبىنىڭ باقىلاۋىنا وتكەنىن ەسكەرتكەن. ونىڭ ايتۋىنشا، يرسك ىقپالىنىڭ كۇشەيۋى سالدارىنان پرەزيدەنت پەن ۇكىمەت ماڭىزدى شەشىمدەر قابىلداۋ پروتسەسىنەن شەتتەتىلگەن. سوندىقتان مۇنداي جاعدايدا ۇكىمەتتى باسقارۋ جانە زاڭمەن جۇكتەلگەن مىندەتتەردى ورىنداۋ مۇمكىن ەمەس ەكەنىن ايتىپ، شۇعىل تۇردە وتستاۆكاعا جىبەرۋدى سۇراعان.
سونداي-اق تەلەارنا يرسك پرەزيدەنت اكىمشىلىگىنىڭ وكىلەتتىكتەرىن بىرتىندەپ قىسقارتىپ، ءىس جۇزىندە بيلىكتىڭ نەگىزگى سەكتورلارىن ءوز باقىلاۋىنا العانىن حابارلادى. بۇل جاعداي پەزەشكيان ۇكىمەتىن ساياسي تىعىرىققا تىرەپ، اقش-پەن اراداعى شيەلەنىستى رەتتەۋگە باعىتتالعان ديپلوماتيالىق قادامداردى جۇزەگە اسىرۋعا كەدەرگى كەلتىرگەنى ايتىلعان.
يران پرەزيدەنتى اكىمشىلىگىنىڭ كوممۋنيكاتسيالار جونىندەگى ءبولىم باسشىسىنىڭ ورىنباسارى مەحدي تاباتاباي X الەۋمەتتىك جەلىسىندە بۇل اقپاراتتى جوققا شىعاردى.
«شەتەلدىك اقپاراتتىق جەلى تاراتقان قاۋەسەتتەر – بۇرىننان كەلە جاتقان ماعىناسىز اقپاراتتىق ويىنداردىڭ جالعاسى. ولار شىندىقتىڭ ورنىنا وزدەرىنىڭ قالاۋىن جاريالادى. پرەزيدەنت حالىققا قىزمەت ەتۋدەن باس تارتپايدى، ءدال سول سياقتى يران حالقى دا بىرلىك پەن قارسىلىق جولىنان تايمايدى»، – دەپ جازدى ول.
ءوز كەزەگىندە يران ۇكىمەتى جانىنداعى اقپاراتتىق ساياسات جونىندەگى كەڭەس توراعاسى ەلياس حازراتي دا پەزەشكياننىڭ وتستاۆكاسى تۋرالى مالىمەتتى تەرىسكە شىعاردى.
«كەيبىر شەتەلدىك بۇقارالىق اقپارات قۇرالدارى مەن ولارمەن بايلانىستى جەلىلەر تاعى دا پرەزيدەنتتىڭ قىزمەتىنەن كەتۋى تۋرالى قاۋەسەتتەردى تاراتتى. بۇل اقپاراتتىڭ شىندىققا ەش قاتىسى جوق جانە بۇعان دەيىن بىرنەشە رەت جوققا شىعارىلعان»، – دەدى ول.
Iran International جاريالانىمىنان كەيىن يران ۇكىمەتىنىڭ رەسمي وكىلى فاتيمە موحەدجەراني دە X جەلىسىندە پەزەشكيان كابينەتى «ەلدەگى ماسەلەلەردى شەشۋ باعىتىنداعى جۇمىسىن جالعاستىرىپ جاتقانىن» جازدى.
پەزەشكيان يران پرەزيدەنتى بولىپ 2024 جىلدىڭ شىلدە ايىندا سايلانعان.
