قورعانىس ءمينيسترىنىڭ ورىنباسارى دارىن تۇياقوۆ الەۋمەتتىك جەلىدە تاراعان ۆيدەوعا قاتىستى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
بەينەروليكتە اسكەريلەر مەن قۇقىق قورعاۋشىلار ويىن-ساۋىق ورىندارىن ارالاپ، اسكەرگە شاقىرىلعان ازاماتتاردى انىقتاپ ءجۇر. رەيد كەزىندە جاستاردىڭ جەكە قۇجاتتارى تەكسەرىلەدى.
"ونداي رەيدتەر كوپ جاعدايدا اسكەرگە شاقىرىلعان ادام ۋاقىتىندا كەلىپ، تىركەۋگە تۇرماعان كەزدە بولىپ جاتادى. زاڭ بويىنشا ءتيىستى راسىمدەر بار. سودان ءوتۋ كەرەك. ارينە، جەرگىلىكتى اسكەري ورگاندارعا ناقتى مىندەت جۇكتەلگەن. ولار سول قىزمەتتىك مىندەتىن ورىندايدى", - دەدى تۇياقوۆ جۋرناليستەرگە بەرگەن سۇحباتىندا.
ءمينيستردىڭ ورىنباسارى تسيفرلاندىرۋ اياسىندا اقپاراتتىق بازالاردى ينتەگراتسيالاۋ جۇمىستارى اتقارىلىپ جاتقانىن دا ەسكە سالدى. سونىڭ ارقاسىندا شۇعىل شەشىمدەر قابىلدانىپ، قىسقا ۋاقىتتىڭ ىشىندە تەكسەرىستەر باستالادى.
"تسيفرلاندىرۋدىڭ ارقاسىندا اسكەري باسقارمامىز جاقسى جۇمىس ىستەي باستادى", - دەپ اتاپ ءوتتى تۇياقوۆ.
سونداي-اق دارىن تۇياقوۆ قازىر اسكەرگە شاقىرىلۋشىلار تاپشىلىعى جوق ەكەنىن ايتا كەتتى.
"اسكەرگە شاقىرىلۋشىلار بار، ولار ءوز مىندەتتەرىن سايكەسىنشە ورىنداۋى كەرەك. وتاندى قورعاۋ مىندەتى بارىن ۇمىتپاۋى ءتيىس", - دەدى ول.
بۇنىمەن قوسا مينيستردىڭ ورىنباسارى مۇنداي رەيدتەر اسكەر قاتارىنا الىنۋشىلار اراسىندا كەزەڭ-كەزەڭىمەن جۇرگىزىلەتىنىن اتاپ ءوتتى.
ايتا كەتەرى، بۇعان دەيىن الەۋمەتتىك جەلىدە اسكەرگە شاقىرىلعانداردى انىقتاۋعا ارنالعان رەيدتىڭ ۆيدەوسى تاراعان بولاتىن.
اسكەرگە شاقىرۋدان جالتارعان ازاماتتارعا قاتىستى رەيدتەر "اسكەري قىزمەت جانە اسكەري قىزمەتشىلەردىڭ مارتەبەسى تۋرالى" زاڭنىڭ 30-بابىنا سايكەس جۇرگىزىلەدى. شاقىرۋ قاعازىن اسكەرگە شاقىرىلۋشىعا تاپسىرۋ مۇمكىن بولماعان جاعدايدا پوليتسيا جىگىتتى شاقىرۋ ۋچاسكەسىنە اپارۋىنا بولادى.
ايتا كەتەرى، بۇعان دەيىن الەۋمەتتىك جەلىدە اسكەرگە شاقىرىلعانداردى انىقتاۋ جۇمىستارى تۇنگى كلۋبتاردا جۇرگىزىلىپ، ولاردى سول جەردەن الىپ كەتكەنى تۋرالى ۆيدەو داۋ تۋعىزعان بولاتىن.
“ادىرنا” ۇلتتىق پورتالى
