ءماجىلىس دەپۋتاتى ايدوس سارىم ەكس-پرەزيدەنتتىڭ ءىنىسى بولات نازارباەۆتىڭ تۋعان قىزى اقبوتا نازارباەۆاعا قاتىسى بار «تولاعاي-2050» كومپانياسىمەن جاسالعان ميللياردتاردى سىنادى، دەپ حابارلايدى "ادىرنا" ۇلتتىق پورتالى.
«قازاقستان رەسپۋبليكاسىنىڭ اۋماقتىق قاۋىپسىزدىگىن قامتاماسىز ەتۋ ماقساتىندا 50 شەكارا زاستاۆاسىن سالۋ جوسپارلانعان بولاتىن. 2022 جىلى 20 شەكارا زاستاۆاسىن سالۋ بويىنشا جۇمىستاردى ساتىپ الۋعا تەندەر جاريالاندى جانە 53 894 ميلليارد تەڭگە سوماسىنا مەردىگەرلىك ۇيىمدار «Kapital construction» جشس-مەن جانە «TOLAGAI-2050» جشس-مەن جالپى شارتتار جاسالدى. جاسالعان شارتقا سايكەس «TOLAGAI-2050» جشس 40 350 ميلليارد تەڭگە سوماسىنداعى 15 شەكارا زاستاۆاسىن سالۋعا ءتيىس ەدى. جۇمىستى ورىنداۋ مەرزىمى 2023 جىلعى 31 جەلتوقسانعا دەيىن»، - دەدى سارىم سارسەنبى كۇنى ءماجىلىس وتىرىسىندا.
ول جىل سوڭىنا دەيىن 17 كۇن قالعانىن اتاپ ءوتتى.
«الايدا، جوعارىدا كورسەتىلگەن شارت بويىنشا مەرزىم ورەسكەل بۇزىلدى. بۇدان باسقا، جۇرگىزىلەتىن جۇمىستاردىڭ ساپاسىنا شاعىمدار تۇسۋدە. قولدا بار اقپارات بويىنشا اعىمداعى جىلدىڭ 1 قازانىندا «TOLAGAI-2050» جشس تەك 13 960 ميلليارد تەڭگەنى يگەردى، بۇل شارتتىڭ جالپى سوماسىنىڭ 35 %-ى يگەرىلدى دەگەن ءسوز. وسى وبەكتىلەر بويىنشا «TOLAGAI-2050» جشس شارتتى ورىنداۋ مەرزىمىن تاعى 9 ايعا ۇزارتۋدى سۇرايدى، بۇل جوبانىڭ ايتارلىقتاي قىمباتتاۋىنا الىپ كەلۋى مۇمكىن» – دەپ باسا ايتتى دەپۋتات.
ول «تولاعاي-2050» كومپانياسى سۋارۋ جۇيەلەرىن قايتا جاڭعىرتۋ، سايران سۋ قويماسىن مەحانيكالىق تازالاۋ جوبالارى، سونداي-اق الماتى مەن پاۆلودار وبلىسىنداعى باسقا دا جوبالار ءۇشىن باق-تا بىرنەشە رەت سىنعا ۇشىراعانىنا» نازار اۋداردى.
«كومپانيا 80-نەن استام ازاماتتىق جانە اكىمشىلىك سوت تەرگەپ-تەكسەرۋىنە قاتىستى، ونىڭ 10-نان استامى 2023 جىلى ءوتتى، ونىڭ ىشىندە مەملەكەتتىك ساتىپ الۋ راسىمىندە مىندەتىن ادال ورىنداماۋشى دەپ تانىلدى (پاۆلودار وبلىسىنىڭ سوتى)»، - دەدى پارلامەنتاري.
ونىڭ ايتۋىنشا، «وسىعان وراي، كولىك مينيسترلىگىنىڭ اۆتوموبيل جولدارى كوميتەتى جوباعا تاپسىرىس بەرۋشى بولا وتىرىپ، كەلىسىم-شارتتى بۇزۋعا بارلىق زاڭدى نەگىز بولعانىمەن، بۇگىنگى كۇنگە دەيىن ەشقانداي شارا قولدانباعان».
«2022 جىلدىڭ 3 اقپانىنا دەيىن بۇل كومپانيانىڭ قۇرىلتايشىلارى اراسىندا مارقۇم بولات نازارباەۆتىڭ قىزى (نۇرسۇلتان نازارباەۆتىڭ ءىنىسى - "ادىرنا") اقبوتا نازارباەۆ بولعانىن اتاپ وتەمىز»، - دەپ ناقتىلادى ماجىلىسمەن.
ول سونداي-اق شەكارا زاستاۆالارىن سالۋ وڭىرلىك قاۋىپسىزدىكتى قامتاماسىز ەتۋدىڭ ىرگەلى قۇرامداس بولىكتەرىنىڭ ءبىرى بولىپ تابىلاتىنىنا ەرەكشە نازار اۋداردى.
«قۇرىلىس مەرزىمدەرىنىڭ بۇزىلۋى ەلدىڭ اۋماقتىق تۇتاستىعىن بۇزۋ، ەسىرتكى تاسىمالى مەن باسقا دا تىيىم سالىنعان ونىمدەردىڭ زاڭسىز اينالىمى، جەكە تۇلعالاردىڭ قازاقستان رەسپۋبليكاسىنىڭ اۋماعىنا زاڭسىز كوشىپ-قونۋ قاۋپىنىڭ ارتۋىنا الىپ كەلۋى مۇمكىن. وسىعان بايلانىستى، سىزدەن وسى جوبا بويىنشا «TOLAGAI-2050» جشس-قا قاتىستى تەرگەپ-تەكسەرۋ جۇرگىزۋدى جانە قازاقستان رەسپۋبليكاسىنىڭ قولدانىستاعى زاڭناماسىنا سايكەس قاجەتتى شارالاردى قابىلداۋدى سۇرايمىز»، - دەپ تۇيىندەدى ءسوزىن سارىم.
