نازارباەۆ زياتكەرلىك مەكتەبىندەگى 11-سىنىپ وقۋشىسى مەن مۇعالىم داۋىنا قاتىستى وقۋ-اعارتۋ مينيسترلىگىنىڭ وكىلى مەرەكە امانگەلدىقىزى رەسمي پىكىر ءبىلدىردى، بۇل تۋرالى ول Facebook جەلىسىندەگى پاراقشاسىندا جازدى، دەپ حابارلايدى “ادىرنا”.
ۆەدومستۆو وكىلى ەلىمىزدە ۇستازدار مارتەبەسى زاڭمەن بەكىتىلگەنىن ەسكە سالىپ، ونىڭ قوعامداعى ورنى ەرەكشە ەكەنىن اتاپ ءوتتى.
"ۇستاز – بالا تاربيەلەپ، ۇرپاققا جول كورسەتەتىن ارداقتى جان. سوندىقتان اتا-انا مەن وقۋشى تاراپىنان مۇعالىمگە قۇرمەتپەن قاراۋ – ەڭ الدىمەن ادامگەرشىلىكتىڭ بەلگىسى. بىلىمگە سەنىم – سول ءبىلىمدى بەرىپ وتىرعان ۇستازعا سەنۋدەن باستالادى. مۇعالىمنىڭ ابىرويىنا كۇمان كەلتىرۋ – بۇكىل جۇيەنىڭ بەدەلىن تۇسىرۋمەن بىردەي.
وسى رەتتە وقۋ-اعارتۋ مينيسترلىگى پەداگوگتىڭ قادىر-قاسيەتىن تومەندەتەتىن كەز كەلگەن ارەكەتكە قاتاڭ سىن كوزقاراسپەن قارايدى.
سونىمەن قاتار، بۇل وقيعادا وقۋشى ءوز قاتەلىگىن ءتۇسىنىپ، وكىنىش ءبىلدىرىپ وتىر. ەندى نزم بۇل جاعدايدى تەك ىشكى تارتىپپەن عانا ەمەس، سونداي-اق ادامگەرشىلىك، كەشىرىمدىلىك پەن ناعىز ۇستازدىق ۇستانىمدارعا سۇيەنە وتىرىپ شەشەدى دەپ ۇمىتتەنەمىز", - دەلىنگەن جازبادا.
سونداي-اق وقۋ-اعارتۋ ءمينيسترى عاني بەيسەمباەۆ بۇل ماسەلەگە ءوزى ءجىتى نازار اۋدارىپ، ءتيىستى تاپسىرمالار بەرگەنى بەلگىلى بولدى.
ءمينيستردىڭ نۇسقاۋىنا سايكەس اتالعان ماسەلەمەن بالالاردىڭ قۇقىقتارىن قورعاۋ كوميتەتىنىڭ جانە ايماقتىق دەپارتامەنتتىڭ وكىلدەرى اينالىسادى.
مينيستر نزم باسقارما توراعاسى انۋار جانعوزينمەن سويلەسكەن. باسقارما توراعاسى ماسەلەنى جەكە قولعا العاندىعىن، جاعدايدى جان-جاقتى قاراپ، نە بولعانىن ءادىل باعالاپ، دۇرىس شەشىم قابىلدايتىنىنا سەندىرگەن.
ەسكە سالا كەتەيىك، 23 مامىردا الماتىداعى نازارباەۆ زياتكەرلىك مەكتەبىنىڭ 11-سىنىپ وقۋشىسى وقۋدان شىعارىلعان. نزم باسقارما توراعاسىنىڭ ايتۋىنشا، مەكتەپتەگى توقساندىق قورىتىندى باعالاۋ كەزىندە 11-سىنىپ وقۋشىسى اكادەميالىق ادالدىق ەرەجەسىن بۇزىپ، ەمتيحان كەزىندە ۇيالى تەلەفون قولدانعان. بۇل مەكتەپتە قاتاڭ تىيىم سالىنعان ارەكەت. تەلەفون تارتىپكە ساي تاركىلەنگەن ساتتە وقۋشى اگرەسسيا تانىتىپ، مۇعالىمگە بەيادەپ ءسوز ايتىپ، بالاعاتتاعان.
