بۇگىن قىزىلوردادا الەمگە ايگىلى يسپاندىق «Roca Group» كومپانياسىنىڭ سانيتارلىق-تەحنيكالىق جابدىقتار زاۋىتىنىڭ ىرگەتاسى قالاندى.
وعان وبلىس اكىمى مۇرات ەرگەشباەۆ، «Roca Group» كومپانياسىنىڭ باس ديرەكتورى دانيەل حۋرادو ەرناندەس، يسپانيا ەلشىلىگىنىڭ ساۋدا-ەكونوميكالىق كەڭەسشىسى حەسۋس ۆيدال بوررەليا، قۇقىق قورعاۋ ورگاندارىنىڭ ءبىرىنشى باسشىلارى، قۇرىلىس كومپانيالارىنىڭ ديرەكتورلارى، زيالى قاۋىم وكىلدەرى مەن ەل اعالارى قاتىستى.
«Roca Group» – ءجۇز جىلدان استام تاريحى بار، سانتەحنيكالىق جابدىقتار ءوندىرۋ سالاسىنداعى الەمدىك كوشباسشىلاردىڭ ءبىرى. كومپانيا الەم بويىنشا 78 وندىرىستىك الاڭدى باسقارادى. وندا 20 مىڭنان استام ادام ەڭبەك ەتەدى. ونىمدەرى 170-تەن استام ەلگە ەكسپورتتالادى.
راسىمدە وبلىس اكىمى مەملەكەت باسشىسى قاسىم-جومارت توقاەۆتىڭ ينۆەستيتسيا تارتۋ جانە زاماناۋي ءوندىرىستى دامىتۋ جونىندەگى تاپسىرماسىنا توقتالىپ، وڭىردە قولايلى ينۆەستيتسيالىق احۋال قالىپتاسقانىن اتاپ ءوتتى.
«مەملەكەت باسشىسى «جاڭا ينۆەستيتسيالار ەڭ الدىمەن ەلىمىزدەگى زاماناۋي ونەركاسىپتىڭ نەگىزىن قالىپتاستىرۋعا باعىتتالۋى كەرەك» دەگەن بولاتىن. كەيىنگى جىلدارى ءوڭىرىمىزدىڭ ينۆەستيتسيالىق الەۋەتى ارتىپ، ءىرى جوبالار تابىستى جۇزەگە اسۋدا.ايماق ەكونوميكاسىنا 2,3 ترلن تەڭگەدەن استام ينۆەستيتسيا تارتىلدى. الداعى ءۇش جىلدا 1,9 ترلن تەڭگەگە 48 ينۆەستيتسيالىق جوبانى جۇزەگە اسىرۋ جوسپارلانۋدا. ناتيجەسىندە 10 مىڭنان استام جاڭا جۇمىس ورنى اشىلادى.
بۇگىن ءبىز ەلىمىز ءۇشىن ماڭىزدى، جوعارى تەحنولوگيالىق ءوندىرىس ورنىنىڭ كاپسۋلاسىن سالۋ ءراسىمىنىڭ كۋاسى بولىپ وتىرمىز. وسىنداي اۋقىمدى جوبانى سىر وڭىرىندە جۇزەگە اسىرعانى ءۇشىن يسپاندىق «Roca Group» كومپانياسىنا ريزاشىلىعىمدى بىلدىرەمىن. بۇل باستاما ءوڭىر ەكونوميكاسىنا جاڭا سەرپىن بەرىپ، ەكسپورتتىق الەۋەتتى ارتتىرۋعا جانە جاڭا جۇمىس ورىندارىن اشۋعا مۇمكىندىك بەرەدى. ءبىز وتاندىق جانە شەتەلدىك ينۆەستورلارمەن ءاردايىم اشىق ءارى سەنىمدى قارىم-قاتىناس ورناتىپ، ناتيجەلى جۇمىس ىستەۋگە دايىنبىز، – دەدى مۇرات نالقوجاۇلى.
جيىندا وبلىس پروكۋرورى ريزابەك وجاروۆ پەن «Roca Group» سەرىكتەستىگىنىڭ باس ديرەكتورى دانيەل حۋرادو ەرناندەس ءسوز سويلەپ، ەل اعاسى يبراگيم ابيبۋللاەۆ اق باتاسىن بەردى.
ايتا كەتۋ كەرەك،جوبا «KAZAKH INVEST» ۇك» اق قولداۋىمەن جۇزەگە اسىرىلۋدا.
Roca Group كومپانياسىمەن ىنتىماقتاستىق 2024 جىلدىڭ جەلتوقسان ايىندا سول كەزدەگى ايماق باسشىسى نۇرلىبەك نالىباەۆتىڭ يسپانياعا جۇمىس ساپارى بارىسىندا باستالدى. بىلتىر ماۋسىم ايىندا پرەمەر-مينيستر ولجاس بەكتەنوۆ Roca Group ديرەكتورلار كەڭەسىنىڭ توراعاسى سانتياگو دە گومار روكامەن كەزدەسىپ، قىزىلوردا وبلىسىندا سانتەحنيكالىق زاۋىت سالۋ جوباسىن جۇزەگە اسىرۋ، ينۆەستيتسيالىق ىنتىماقتاستىقتى ودان ءارى نىعايتۋ پەرسپەكتيۆالارىن تالقىلاعان بولاتىن.
كەزدەسۋدە قر ونەركاسىپ جانە قۇرىلىس مينيسترلىگى، قىزىلوردا وبلىسىنىڭ اكىمدىگى جانە Roca Group ينۆەستيتسيالىق جوبانى جۇزەگە اسىرۋ قاعيداتتارى تۋرالى نەگىزدەمەلىك كەلىسىمگە قول قويدى. بۇل قۇجات ارقىلى تاراپتار سانيتارلىق-تەحنيكالىق بۇيىمدار شىعاراتىن زاۋىت جوباسىن بىرلەسىپ جۇزەگە اسىرۋعا نيەتتى ەكەنىن رەسمي دالەلدەدى.
قازان ايىنداعى سىر وڭىرىنە جۇمىس ساپارى بارىسىندا مەملەكەت باسشىسى قاسىم-جومارت كەمەلۇلىنا تانىستىرىلعان ينۆەستيتسيالىق جوبالار قاتارىندا Roca Group كومپانياسىنىڭ سانتەحنيكالىق بۇيىمدار ءوندىرىسى دە بار.
بۇل – قازاقستانداعى ەكولوگيالىق قاۋىپسىزدىكتىڭ حالىقارالىق ستاندارتتارىنا سايكەس كەلەتىن سانيتارلىق-تەحنيكالىق ونىمدەر شىعاراتىن العاشقى ءوندىرىس ورنى.
زاۋىتقا 24 گەكتار جەر تەلىمى ءبولىندى، 44,1 ملرد تەڭگە ينۆەستيتسيا سالىنادى. جىلدىق وندىرىستىك قۋاتى 500 مىڭ بۇيىمعا دەيىن جەتەدى. وندىرىلگەن ءونىم قازاقستاننىڭ ىشكى نارىعىنا جەتكىزىلىپ، ورتالىق ازيا ەلدەرىنە ەكسپورتتالادى.
سونىمەن قاتار 300-گە جۋىق تۇراقتى جۇمىس ورنى اشىلادى، جەرگىلىكتى مامانداردى وقىتۋ جانە ولاردىڭ بىلىكتىلىگىن ارتتىرۋ كوزدەلگەن. كومپانيا جىل سوڭىنا دەيىن سمەسيتەلدەر مەن ينستاللياتسيالىق جۇيەلەردى قۇراستىراتىن ءوندىرىس ورنىن ىسكە قوسۋدى جوسپارلاپ وتىر. ال كومپانيا ونىمدەرى ۇسىنىلاتىن شوۋرۋمدار استانا جانە الماتى قالالارىندا ماۋسىم ايىندا اشىلادى.
