قىزىلوردا وبلىسىندا جىنىستىق ماجبۇرلىكتەن جاپا شەككەن قىزعا مەديتسينالىق جانە پسيحولوگيالىق كومەك كورسەتىلدى. بۇل تۋرالى قىزىلوردا وبلىسىنىڭ بالالار قۇقىقتارى جونىندەگى ۋاكىلى جاقسىگۇل توعانوۆا الەۋمەتتىك جەلىدەگى جازباسىندا مالىمدەدى، دەپ حابارلايدى “ادىرنا” ۇلتتىق پورتالى.
توعانوۆانىڭ ايتۋىنشا، وقيعا تۋرالى اقپارات تۇسكەننەن كەيىن ول بىردەن جابىرلەنگەن قىزبەن جانە ونىڭ اناسىمەن كەزدەسكەن. كەزدەسۋدەن كەيىن قىزعا ءۇش رەت پسيحولوگپەن كەڭەس ۇيىمداستىرىلىپ، وبلىستىق دەنساۋلىق ساقتاۋ دەپارتامەنتىنىڭ قولداۋىمەن تولىق مەديتسينالىق تەكسەرۋ جۇرگىزىلگەن.
قىزدىڭ جاعدايىن ەسكەرە وتىرىپ، دارىگەرلەر ونى اۋرۋحاناعا جاتقىزۋدى ۇسىنعانىمەن، اناسى بۇل ۇسىنىستان باس تارتتى. وسىعان بايلانىستى، مەديتسينالىق كومەك ءۇي جاعدايىندا كورسەتىلۋدە.
”تەكسەرۋلەردەن كەيىن دە جاسوسپىرىمگە بىرنەشە رەت پسيحولوگيالىق قولداۋ كومەكتەرى كورسەتىلدى. اناسىنىڭ ايتۋى بويىنشا، ۋاقىتىلى العان كومەكتىڭ ناتيجەسىندە بالانىڭ جاعدايىندا وڭ وزگەرىستەر بار. بالانىڭ قاۋىپسىزدىگىن ساقتاۋ ماقساتىندا پوليتسيا دەپارتامەنتى ارقىلى تاۋلىك بويى ءۇيىنىڭ اۋماعىنا كۇزەت قىزمەتى قويىلدى. ارينە، بارلىق ءىس-ارەكەتتەر مەن كومەكتەر اناسىنىڭ كەلىسىمىنە جانە بالانىڭ قالاۋىنا سايكەس جاسالادى. الداعى كەزەڭدە دە مۇددەلى مەملەكەتتىك ورگاندار تاراپىنان بارلىق كومەكتەر ۋاقىتىلى جاسالاتىن بولادى،” - دەلىنگەن حابارلامادا.
