الەمگە ايگىلى قازاقستاندىق ءانشى ديماش قۇدايبەرگەن العاش رەت يسپانيانىڭ Olimpic Arena Badalona ستاديونىندا جەكە كونتسەرتىن وتكىزدى، دەپ حابارلايدى “ادىرنا”.
ءانشىنىڭ رەسمي سايتى حابارلاعانداي، بادالونا مۋنيتسيپالدىق سپورت كەشەنى 1992 جىلعى جازعى وليمپيادا ويىندارى كەزىندە باسكەتبول ءتۋرنيرىن وتكىزۋ ءۇشىن ارنايى سالىنعان ارەنا. بۇل الاڭدا الەمگە تانىمال ارتىستەر — برۋنو مارس، لەنني كراۆيتس، اليسيا كيز، مەريلين مەنسون، اناستەيشا، مارك ەنتوني، Coldplay, Arctic Monkeys, Green Day جانە Muse ونەر كورسەتكەن.
كونتسەرت بارىسىندا جانكۇيەرلەر ەرەكشە اكتسيا ۇيىمداستىرىپ، ديماشتىڭ «The Story of One Sky» ءانى كەزىندە اق قولعاپتاردى كيىپ، قولدارىن كوتەردى. بۇل اكتسيانىڭ باستى ماقساتى — بەيبىتشىلىك پەن ءومىردى تاڭداۋ يدەيالارىن جەتكىزۋ. يسپانياداعى رەسمي فان-كلۋب ۇيىمداستىرعان اكتسياعا «Elegimos la Vida» ء(«بىز ءومىردى تاڭدايمىز») دەگەن اتاۋ بەرىلدى.
جانكۇيەرلەردىڭ ايتۋىنشا، Dears قاۋىمداستىعى ديماشقا تەك كورەرمەن رەتىندە ەمەس، رۋحاني جاقىندىق رەتىندە قولداۋ كورسەتكەن. اق قولعاپتار ارقىلى بەيبىتشىلىك، ال پلاكاتتار ارقىلى ء«بىز ءومىردى تاڭدايمىز» دەگەن حابارلاما جەتكىزىلدى.
«بۇل ءان ءبىزدى العاش تىڭداعان ساتتەن باۋرادى. ديماشتىڭ ونەرى تەك مۋزىكامەن شەكتەلمەيدى، ول داۋسى مەن شىعارماشىلىعىمەن الەمگە بەيبىتشىلىك پەن ماحاببات تۋرالى ماڭىزدى حابار جەتكىزەدى»، — دەدى فان-كلۋب مۇشەلەرى.
كونتسەرتتىڭ اسەرى مەن ۇيىمداستىرىلعان اكتسياسى جانكۇيەرلەرگە عانا ەمەس، ساحنادا ونەر كورسەتكەن انشىگە دە ەرەكشە رۋحاني بايلانىس سىيلادى.
