مەملەكەت باسشىسى قاسىم-جومارت توقاەۆ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىققا قول قويدى، دەپ حابارلايدى «ادىرنا» ءتىلشىسى.
جاڭا قۇجات اياسىندا كىتاپحانالاردى جاڭعىرتۋ، تسيفرلىق كىتاپ پلاتفورماسىن قۇرۋ، ۇلتتىق ادەبيەتتى قولداۋ جانە جاستار اراسىندا كىتاپ وقۋدى ناسيحاتتاۋ جۇمىستارى كۇشەيتىلەدى.
قۇجات كىتاپ وقۋ مادەنيەتىن نىعايتۋعا، ءبىلىم مەن يننوۆاتسيانى دامىتۋعا باعىتتالعان جاڭا باستامالاردى قامتيدى. نەگىزگى باعىتتار:
- زاماناۋي كىتاپحانالار مەن تسيفرلىق قوعامدىق كەڭىستىكتەر اشىلادى;
- وتاندىق اۆتورلار مەن ۇلتتىق قۇندىلىقتاردى ناسيحاتتايتىن شىعارمالارعا قولداۋ كۇشەيەدى;
- 2026 جىلدان باستاپ «جىلدىڭ 10 وقىرمانى» رەسپۋبليكالىق جوباسى ىسكە قوسىلادى;
- 2027-2031 جىلدارعا ارنالعان «زەردەلى ۇلت» تۇجىرىمداماسى قابىلدانادى;
- «كىتاپحانا جانە كىتاپ شىعارۋ ءىسى تۋرالى» جاڭا زاڭ ازىرلەنەدى;
- بىرىڭعاي ۇلتتىق تسيفرلىق كىتاپحانا پلاتفورماسى قۇرىلادى;
- قازاق ادەبيەتىن حالىقارالىق دەڭگەيدە ناسيحاتتاۋ جۇمىسى ارتادى;
- باسپاگەرلەر مەن كىتاپ تاراتۋ سالاسىنا مەملەكەتتىك قولداۋ كورسەتىلەدى.
پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ ايتۋىنشا، بۇل قۇجات – ەلدىڭ ينتەللەكتۋالدىق الەۋەتىن ارتتىرۋعا جانە كىتاپ وقۋ مادەنيەتىن مەملەكەتتىك ساياساتتىڭ باسىم باعىتى رەتىندە جاڭا دەڭگەيگە كوتەرۋگە باعىتتالعان ماڭىزدى ستراتەگيالىق شەشىم.
«پرەزيدەنتىمىز كىتاپ پەن ءبىلىمنىڭ ادام ومىرىندەگى، ۇلت دامۋىنداعى ايرىقشا ءرولىن ۇنەمى ايتىپ كەلەدى. وسى جارلىق ارقىلى كىتاپ وقۋ مادەنيەتىن دامىتۋ مەملەكەتتىك ساياساتتىڭ ماڭىزدى باعىتتارىنىڭ ءبىرى رەتىندە جاڭا دەڭگەيگە كوتەرىلىپ وتىر. بۇگىندە ەلىمىزدە 12 مىڭنان استام كىتاپحانا جۇمىس ىستەيدى. ولاردىڭ قىزمەتىن جىل سايىن ميلليونداعان ازامات پايدالانادى. كەيىنگى جىلدارى كىتاپحانالاردىڭ تسيفرلىق مۇمكىندىكتەرى دە ارتىپ كەلەدى. ەلەكتروندى كىتاپحانا رەسۋرستارىن پايدالانۋشىلار سانى 30 پايىز ءوسىپ، 718 مىڭ ادامعا جەتتى. ال كەيىنگى بەس جىلدا ەلەكتروندى فورماتتاعى كىتاپتاردى 9 ميلليوننان استام ادام پايدالانعان.
ەڭ باستىسى، قوعامدا كىتاپقا دەگەن قىزىعۋشىلىق ارتىپ كەلە جاتقانى ءبارىمىزدى قۋانتادى. اسىرەسە بالالار ادەبيەتىنە سۇرانىس ەسەلەنە ءتۇستى. تەك سوڭعى جىلدىڭ وزىندە بۇل كورسەتكىش 75 پايىز ءوستى. قازاق كلاسسيكاسىنا جانە قازاق تىلىنە اۋدارىلعان الەم ادەبيەتىنىڭ تاڭداۋلى تۋىندىلارىنا دەگەن سۇرانىس تا 50 پايىز ءوستى»،-دەدى ول.
مينيستر بۇل باستامالار قازاقستاندا كىتاپ وقيتىن، ويلى ءارى ءبىلىمدى ۇلت قالىپتاستىرۋعا سەرپىن بەرەتىنىن اتاپ ءوتتى.
