مادەنيەت جانە اقپارات ءمينيسترى ايدا بالاەۆانىڭ ايتۋىنشا، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا تۇرمىستىق زورلىق-زومبىلىقپەن كۇرەسۋدىڭ كەشەندى جوسپارىن ازىرلەۋگە كىرىستى. بۇل تۋرالى «ادىرنا» ۇلتتىق پورتالى حابارلايدى.
«وزدەرىڭىز بىلەتىندەي، ەل پرەزيدەنتى: «ءبىزدىڭ قوعامداعى ەڭ باستى يدەولوگيا — بۇل زاڭ مەن ءتارتىپتىڭ ۇستەمدىگى دەگەن بولاتىن. بۇل ءبىرىنشى كەزەكتە قوعامنىڭ قارىم-قاتىناسىنا عانا ەمەس، تۇرمىستىق ماسەلەلەرگە دە قاتىستى ايتىلعان قاعيدا. اسىرەسە، قازىر ءبىز ءۇشىن تۇرمىستىق زورلىق-زومبىلىق ماسەلەلەرى الدىڭعى ورىندا تۇر. مۇنداي قىلمىستار ءۇشىن جاۋاپكەرشىلىك 2023 جىلدىڭ 1 شىلدەسىنەن ەداۋىر كۇشەيتىلگەن بولاتىن. سودان بەرى جاۋاپقا تارتىلعان اگرەسسورلار سانى 2 ەسە كوبەيگەن. دالىرەك ايتقاندا، وسى جىلدىڭ ءىى-توقسانىندا 7 مىڭ ادام جاۋاپقا تارتىلسا، ءىىى-توقساندا ولاردىڭ سانى 27 مىڭ ادامعا جەتكەن. ودان باسقا تاعى 60 مىڭ قۇقىق بۇزۋشى اكىمشىلىك جاۋاپكەرشىلىككە تارتىلدى. ولارعا قاتىستى 70 مىڭ ەسكەرتۋ جاسالدى. قۇقىق بۇزۋشىلاردىڭ مىنەز-قۇلقىن تۇزەتۋ ءۇشىن سوت ارقىلى 12 مىڭ تالاپ قويىلدى»، — دەپ Facebook جەلىسىنە بەينەۇندەۋ جاريالادى.
ءمينيستردىڭ مالىمەتىنشە، قابىلدانعان شارالاردىڭ ناتيجەسى، 10 ايدا وتباسىلىق-تۇرمىستىق قۇقىق بۇزۋشىلىقتار تۋرالى حابارلامالاردى تىركەۋ 20 پايىزعا، ونىڭ ىشىندە قىلمىستىق قۇقىق بۇزۋشىلىقتار 4,2 پايىزعا، اۋىر قىلمىستار 12 پايىزعا تومەندەگەن.
«وكىنىشكە قاراي، كەيىنگى جاعدايلار بۇل ماسەلەنىڭ ءالى دە كۇن تارتىبىنەن تۇسپەگەنىن جانە وزەكتى ەكەنىن كورسەتىپ تۇر. باستى سەبەپ — ازاماتتاردىڭ زاڭدى قۇقىعىن قۇرمەتتەمەۋ. وسىدان تۋىندايتىن سانانىڭ بۇزىلۋى، جالپى قۇقىقتىق نەگيليزم قازىرگى قوعامعا ءتان ەكەنىن كورسەتىپ وتىر. ءبىز اتا-انا رەتىندە بالالارعا ۇيدە بولسىن، سىرتتا بولسىن كەلەڭسىز قۇبىلىستارمەن كۇرەسۋ مادەنيەتىن قالىپتاستىرۋىمىز قاجەت. قوعام زاڭ بۇزۋشىلىققا، زورلىق-زومبىلىق پەن دورەكىلىككە توزبەۋى ءتيىس. ونىڭ ىشىندە تۇرمىستىق زورلىق-زومبىلىقتان، بۇزاقىلىقتان، دورەكىلىكتەن جانە ۆانداليزمنەن مۇلدەم باس تارتۋ اتموسفەراسىن قالىپتاستىرۋىمىز ماڭىزدى. بارشا ادام بالاسىنا دەگەن قۇرمەت، ەر-ازاماتتاردىڭ ايەل مەن قىزدارعا دەگەن سىيلاستىعىن بالا كەزدەن بويىنا ءسىڭىرۋ قاجەت. ءوزىمىز بەن اينالاداعى ادامداردىڭ تاعدىرى مەن ءومىرى بىزگە بايلانىستى ەكەنىن ارقاشان ەستە ۇستاۋىمىز كەرەك. ءدال قازىر پرەزيدەنت جانىنداعى ايەلدەر جانە وتباسى ساياساتى جونىندەگى ۇلتتىق كوميسسيا تۇرمىستىق زورلىق-زومبىلىقپەن كۇرەسۋدىڭ كەشەندى جوسپارىن ازىرلەۋگە كىرىستى. سوندىقتان ساراپشىلاردى، ازاماتتىق سەكتور وكىلدەرىن بەلسەندى بولۋعا، ءتيىستى ۇسىنىستاردى جولداۋعا شاقىرامىن»، — دەدى ايدا بالاەۆا.
«ادىرنا» ۇلتتىق پورتالى
