Memleket basşysy Qasym-Jomart Toqaev «Kıtap oqu mädenietın damytu jäne zerdelı ūlt qalyptastyru jönındegı şaralar turaly» jarlyqqa qol qoidy, dep habarlaidy «Adyrna» tılşısı.
Jaŋa qūjat aiasynda kıtaphanalardy jaŋǧyrtu, sifrlyq kıtap platformasyn qūru, ūlttyq ädebiettı qoldau jäne jastar arasynda kıtap oqudy nasihattau jūmystary küşeitıledı.
Qūjat kıtap oqu mädenietın nyǧaituǧa, bılım men innovasiiany damytuǧa baǧyttalǧan jaŋa bastamalardy qamtidy. Negızgı baǧyttar:
- Zamanaui kıtaphanalar men sifrlyq qoǧamdyq keŋıstıkter aşylady;
- Otandyq avtorlar men ūlttyq qūndylyqtardy nasihattaityn şyǧarmalarǧa qoldau küşeiedı;
- 2026 jyldan bastap «Jyldyŋ 10 oqyrmany» respublikalyq jobasy ıske qosylady;
- 2027-2031 jyldarǧa arnalǧan «Zerdelı ūlt» tūjyrymdamasy qabyldanady;
- «Kıtaphana jäne kıtap şyǧaru ısı turaly» jaŋa zaŋ äzırlenedı;
- Bıryŋǧai Ūlttyq sifrlyq kıtaphana platformasy qūrylady;
- Qazaq ädebietın halyqaralyq deŋgeide nasihattau jūmysy artady;
- Baspagerler men kıtap taratu salasyna memlekettık qoldau körsetıledı.
Premer-ministrdıŋ orynbasary – mädeniet jäne aqparat ministrı Aida Balaevanyŋ aituynşa, būl qūjat – eldıŋ intellektualdyq äleuetın arttyruǧa jäne kıtap oqu mädenietın memlekettık saiasattyŋ basym baǧyty retınde jaŋa deŋgeige köteruge baǧyttalǧan maŋyzdy strategiialyq şeşım.
«Prezidentımız kıtap pen bılımnıŋ adam ömırındegı, ūlt damuyndaǧy airyqşa rölın ünemı aityp keledı. Osy jarlyq arqyly kıtap oqu mädenietın damytu memlekettık saiasattyŋ maŋyzdy baǧyttarynyŋ bırı retınde jaŋa deŋgeige köterılıp otyr. Bügınde elımızde 12 myŋnan astam kıtaphana jūmys ısteidı. Olardyŋ qyzmetın jyl saiyn milliondaǧan azamat paidalanady. Keiıngı jyldary kıtaphanalardyŋ sifrlyq mümkındıkterı de artyp keledı. Elektrondy kıtaphana resurstaryn paidalanuşylar sany 30 paiyz ösıp, 718 myŋ adamǧa jettı. Al keiıngı bes jylda elektrondy formattaǧy kıtaptardy 9 millionnan astam adam paidalanǧan.
Eŋ bastysy, qoǧamda kıtapqa degen qyzyǧuşylyq artyp kele jatqany bärımızdı quantady. Äsırese balalar ädebietıne sūranys eselene tüstı. Tek soŋǧy jyldyŋ özınde būl körsetkış 75 paiyz östı. Qazaq klassikasyna jäne qazaq tılıne audarylǧan älem ädebietınıŋ taŋdauly tuyndylaryna degen sūranys ta 50 paiyz östı»,-dedı ol.
Ministr būl bastamalar Qazaqstanda kıtap oqityn, oily ärı bılımdı ūlt qalyptastyruǧa serpın beretının atap öttı.
