الماتىدا دارىگەرلەر اورتاسى جارىلعان يتاليا ازاماتىن امان الىپ قالدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستاننىڭ دەنساۋلىق ساقتاۋ مينيسترلىگى مالىمدەدى.
ۆەدومستۆو مالىمەتىنشە، يتاليادان كەلگەن تۋريست الماتىعا ساياحات ماقساتىندا كەلگەن. الايدا ەلگە كەلگەننەن كەيىن ءۇشىنشى كۇنى ەر ادامنىڭ جاعدايى كۇرت ناشارلاپ، ءىشىنىڭ قاتتى اۋىرعانىنا بايلانىستى جەدەل تۇردە اۋرۋحاناعا جەتكىزىلگەن. تەكسەرۋ بارىسىندا دارىگەرلەر كونتراستپەن كومپيۋتەرلىك توموگرافيا جاساپ، ناۋقاستان اورتانىڭ ينفرارەنالدى بولىگىندەگى انەۆريزمانىڭ جارىلۋىن انىقتاعان. مامانداردىڭ ايتۋىنشا، مۇنداي دياگنوز ادام ومىرىنە تىكەلەي قاۋىپ توندىرەدى، سەبەبى ول اۋىر ىشكى قان كەتۋمەن قاتار جۇرەدى.
دارىگەرلەر شۇعىل تۇردە وتا جاساۋ تۋرالى شەشىم قابىلداپ، وپەراتسيا شامامەن ءتورت ساعاتقا سوزىلعان. حيرۋرگتەر وتا بارىسىندا انەۆريزمانىڭ جارىلعانىن راستادى جانە ناۋقاسقا جاساندى قانتامىر پروتەزىن ورناتقان.
قازىرگى ۋاقىتتا يتاليا ازاماتىنىڭ جاعدايى تۇراقتى دەپ باعالانىپ وتىر. ول امبۋلاتوريالىق ەم قابىلداۋعا دايىندالۋدا.
