Sony Pictures كومپانياسىنىڭ «ورمەكشى ادام: جاڭا كۇن» ءفيلمى قازاقستان مەن وزبەكستاندا كاسسالىق تابىس بويىنشا رەكورد ورناتتى، دەپ حابارلايدى «ادىرنا» ءتىلشىسى.
Vlast.kz مالىمەتىنشە، فيلم قازاقستاندا پروكاتتىڭ العاشقى ءۇش كۇنىندە 1,37 ملرد تەڭگە (2,94 ملن دوللار) جيناعان. وسىلايشا، كارتينا 1 ملرد تەڭگە مەجەسىنە ەڭ جىلدام جەتكەن فيلم اتاندى. بۇعان دەيىن بۇل رەكورد «اۆاتار: سۋ جولى» مەن «زۆەروپوليس 2» فيلمدەرىنە تيەسىلى بولىپ، ولار اتالعان كورسەتكىشكە التى كۇندە جەتكەن ەدى. العاشقى دەمالىس كۇندەرىندەگى جالپى ءتۇسىمنىڭ 5,6 پايىزى قازاق تىلىندەگى نۇسقانىڭ ۇلەسىنە تيەسىلى بولعان.
وزبەكستاندا فيلم كەڭ پروكاتقا 6 تامىزدا شىققان. Afisha.uz حابارلاۋىنشا، كارتينا العاشقى كۇنى-اق 1,07 ملرد سۋم (90,2 مىڭ دوللار) جيناپ، ەلدىڭ كينو پروكاتى تاريحىنداعى ابسوليۋتتىك رەكوردتى جاڭارتقان. ءفيلمدى 15 838 كورەرمەن تاماشالاعان. وزبەك تىلىندەگى دۋبلياج العاشقى كۇنگى كاسسالىق ءتۇسىمنىڭ 11,5 پايىزىن قامتاماسىز ەتكەن.
Vlast.kz مالىمەتىنشە، العاشقى دەمالىس كۇندەرىنىڭ قورىتىندىسى بويىنشا ءفيلمنىڭ قازاقستان، وزبەكستان، قىرعىزستان، ارمەنيا جانە تاجىكستانداعى جيىنتىق ءتۇسىمى 1,67 ملرد تەڭگەگە (3,58 ملن دوللار) جەتكەن.
بۇل سومانىڭ ىشىندە قازاقستاننىڭ ۇلەسى – 1,3 ملرد تەڭگە (77,8%), وزبەكستاننىڭ ۇلەسى – 167 ملن تەڭگە (10%), قىرعىزستاننىڭ ۇلەسى – 109,1 ملن تەڭگە (6,5%), ارمەنيانىڭ ۇلەسى – 81,5 ملن تەڭگە (4,9%), ال تاجىكستاننىڭ ۇلەسى – 31,8 ملن تەڭگە (1,9%).
