رەسەيدىڭ ومبى قالاسىندا قازاقستان ازاماتى ءىرى كولەمدەگى تەمەكى ونىمدەرىن زاڭسىز تاسىمالدادى دەگەن كۇدىكپەن ۇستالدى، دەپ حابارلايدى “ادىرنا”.
كتك ارناسىنىڭ مالىمەتىنشە، تاركىلەنگەن تاۋاردىڭ قۇنى شامامەن 27 ميلليون تەڭگەگە باعالانعان.
تەرگەۋ مالىمەتىنشە، تەمەكى ونىمدەرى پاۆلودار قالاسىنان جەتكىزىلگەن. جولاۋشىلار اۆتوبۋسىن باسقارعان جۇرگىزۋشى جۇكتى جاسىرۋ ءۇشىن كولىكتىڭ باگاج بولىگىندە ارنايى ورىن ازىرلەگەن. ول تەمەكىلەردى پاۆلوداردا اتى-ءجونى انىقتالماعان ادامداردان ساتىپ العان.
قۇقىق قورعاۋ ورگاندارى كۇدىكتىنى تاۋاردى انگاردا ءتۇسىرۋ كەزىندە انىقتاعان. ءتىنتۋ بارىسىندا 37 مىڭنان استام قوراپ تەمەكى تاركىلەندى. الدىن الا مالىمەت بويىنشا، ءونىمنىڭ جالپى قۇنى شامامەن 27 ميلليون تەڭگەنى قۇرايدى.
جاۋاپ الۋ كەزىندە جۇرگىزۋشى بۇل ارەكەتكە قارجىلىق قيىندىقتارعا بايلانىستى بارعانىن ايتىپ، وكىنىش بىلدىرگەن. قازىر وعان ۇيقاماق تۇرىندەگى بۇلتارتپاۋ شاراسى قولدانىلعان.
