1 ماۋسىم بالالار كۇنىنە وراي استانا قالاسىندا “كوكجيەك” بالالاردى دامىتۋ ورتالىعىنىڭ سالتاناتتى اشىلۋى ءوتتى، دەپ حابارلايدى “ادىرنا” ۇلتتىق پورتالى.
“كوكجيەك” بالالاردى دامىتۋ ورتالىعى – بالالاردىڭ جان-جاقتى ءبىلىم الىپ، شىعارماشىلىق قابىلەتىن دامىتۋىنا باعىتتالعان زاماناۋي وقۋ ورتالىعى. مۇندا مەكتەپكە دەيىنگى دايىندىق، ساۋات اشۋ، اعىلشىن ءتىلى، لوگيكالىق ويلاۋ، شىعارماشىلىق جانە تانىمدىق باعىتتاعى ساباقتار وتكىزىلەدى. ورتالىقتا بالالاردىڭ بىلىممەن قاتار ۇلتتىق قۇندىلىقتاردى بويىنا سىڭىرۋىنە دە ەرەكشە كوڭىل بولىنگەن.
سونىمەن قاتار، ورتالىق ىشىندە قازاق رۋحانياتى مەن مادەنيەتىنە ۇلەس قوسقان تۇلعالارعا ارنالعان ارنايى تانىمدىق بولمەلەر جاساقتالعان. اتاپ ايتقاندا، اقىن تولەگەن ايبەرگەنوۆ, سازگەر ءشامشى قالداياقوۆ جانە اقىن-جازۋشى مۇحتار شاحانوۆ ەسىمدەرى بەرىلگەن بولمەلەر اشىلعان. بۇل بولمەلەر ارقىلى بالالار قازاق ادەبيەتى مەن مادەنيەتىن تەرەڭىرەك تانىپ، رۋحاني تاربيە الادى.
ءىس-شارا بارىسىندا وقۋ ورتالىعىنىڭ جەتەكشىسى ءارى “ادىرنا” ۇلتتىق پورتالى ديرەكتورى ارمان اۋباكىر ءسوز سويلەپ، ورتالىقتىڭ باستى ماقساتى – بالالاردىڭ ساپالى ءبىلىم الىپ، قابىلەتىن جان-جاقتى دامىتۋىنا مۇمكىندىك جاساۋ ەكەنىن اتاپ ءوتتى. ونىڭ ايتۋىنشا، ءار بالاعا جەكە كوڭىل ءبولىنىپ، ولاردىڭ قىزىعۋشىلىعىنا ساي باعىتتار ۇسىنىلادى.
سونداي-اق، جيىندا “Astana” الەۋمەتتىك-كاسىپكەرلىك كورپوراتسياسى اق باسقارما توراعاسىنىڭ ورىنباسارى جۇماشوۆ گامالي ماۋلەيۇلى ءسوز سويلەپ، بالالاردىڭ ساپالى ءبىلىم مەن تاربيە الۋىنا ارنالعان مۇنداي ورتالىقتاردىڭ قوعام ءۇشىن ماڭىزى جوعارى ەكەنىن ايتتى.
سالتاناتتى اشىلۋعا اتا-انالار مەن بالالار قاتىسىپ، ورتالىقتىڭ مۇمكىندىكتەرىمەن تانىستى. سونىمەن قاتار، بۇلدىرشىندەرگە ارنالعان مەرەكەلىك ءىس-شارا ۇيىمداستىرىلىپ، ويىن-ساۋىق باعدارلامالارى ۇسىنىلدى. كەش سوڭىندا قوناقتارعا ارنايى فۋرشەت داستارحانى جايىلىپ، مەرەكەلىك كوڭىل-كۇي سىيلاندى.
