1 mausym balalar künıne orai Astana qalasynda “Kökjiek” balalardy damytu ortalyǧynyŋ saltanatty aşyluy öttı, dep habarlaidy “Adyrna” ūlttyq portaly.
“Kökjiek” balalardy damytu ortalyǧy – balalardyŋ jan-jaqty bılım alyp, şyǧarmaşylyq qabıletın damytuyna baǧyttalǧan zamanaui oqu ortalyǧy. Mūnda mektepke deiıngı daiyndyq, sauat aşu, aǧylşyn tılı, logikalyq oilau, şyǧarmaşylyq jäne tanymdyq baǧyttaǧy sabaqtar ötkızıledı. Ortalyqta balalardyŋ bılımmen qatar ūlttyq qūndylyqtardy boiyna sıŋıruıne de erekşe köŋıl bölıngen.
Sonymen qatar, ortalyq ışınde qazaq ruhaniiaty men mädenietıne üles qosqan tūlǧalarǧa arnalǧan arnaiy tanymdyq bölmeler jasaqtalǧan. Atap aitqanda, aqyn Tölegen Aibergenov, sazger Şämşı Qaldaiaqov jäne aqyn-jazuşy Mūhtar Şahanov esımderı berılgen bölmeler aşylǧan. Būl bölmeler arqyly balalar qazaq ädebietı men mädenietın tereŋırek tanyp, ruhani tärbie alady.
Is-şara barysynda oqu ortalyǧynyŋ jetekşısı ärı “Adyrna” ūlttyq portaly direktory Arman Äubäkır söz söilep, ortalyqtyŋ basty maqsaty – balalardyŋ sapaly bılım alyp, qabıletın jan-jaqty damytuyna mümkındık jasau ekenın atap öttı. Onyŋ aituynşa, är balaǧa jeke köŋıl bölınıp, olardyŋ qyzyǧuşylyǧyna sai baǧyttar ūsynylady.
Sondai-aq, jiynda “Astana” Äleumettık-käsıpkerlık korporasiiasy AQ Basqarma töraǧasynyŋ orynbasary Jūmaşov Gamali Mäuleiūly söz söilep, balalardyŋ sapaly bılım men tärbie aluyna arnalǧan mūndai ortalyqtardyŋ qoǧam üşın maŋyzy joǧary ekenın aitty.
Saltanatty aşyluǧa ata-analar men balalar qatysyp, ortalyqtyŋ mümkındıkterımen tanysty. Sonymen qatar, büldırşınderge arnalǧan merekelık ıs-şara ūiymdastyrylyp, oiyn-sauyq baǧdarlamalary ūsynyldy. Keş soŋynda qonaqtarǧa arnaiy furşet dastarhany jaiylyp, merekelık köŋıl-küi syilandy.
