«قاراڭعى قازاق كوگىنە، ورمەلەپ شىعىپ، كۇن بولام!» دەپ جىرلاعان سۇلتانماحمۇت تورايعىروۆ مۇراسىن تەمىرقازىق ەتكەن «Sun Study» بالالاردى دامىتۋ ورتالىعى ەلوردادا ءوز قىزمەت اياسىن كەڭەيتىپ، ەكىنشى فيليالىن رەسمي تۇردە ىسكە قوستى.
اشىلۋ سالتاناتى ەرەكشە مازمۇندا ءوتىپ، وعان قوعام قايراتكەرلەرى، جۋرناليستەر، زيالى قاۋىم وكىلدەرى مەن اتا-انالار قاتىستى. ءىس-شارا بارىسىندا اقساقال جانگەلدى شىمشىقوۆ اق باتاسىن بەرىپ، ورتالىق جۇمىسىنا ساتتىلىك تىلەدى.
سالتاناتتى جيىندا ءسوز سويلەگەندەر قاتارىندا قر پارلامەنتى ءماجىلىسىنىڭ دەپۋتاتى سامات نۇرتازا، تەلەجۋرناليست، PR جانە كوممۋنيكاتسيا مامانى رينات كەرتاەۆ، سونداي-اق قازاق كۇش ونەرىن زەرتتەۋشى، مادەنيەتتانۋشى ابىلايحان قالنازاروۆ بولدى. ولار ءوز سوزدەرىندە جاس ۇرپاق تاربيەسى مەن ساپالى ءبىلىم بەرۋدىڭ ماڭىزدىلىعىنا توقتالدى.
جوباعا اقپاراتتىق جانە قوعامدىق قولداۋ بىلدىرگەن تۇلعالار قاتارىندا “ساداق مەديا” جوباسىنىڭ نەگىزىن قالاۋشى داۋرەن داريابەك، Kznews.kz پورتالىنىڭ باس رەداكتورى اسقار بەكوۆ، الاشتانۋشى عالىم ۇشقىن سايدراحمان، “الاش وردا” ۇلتتىق پورتالىنىڭ باس رەداكتورى سەرىك جولداسباي، “سامۇرىق-قازىنا” قورىنا قاراستى الەۋمەتتىك ءوزارا ىقپالداستىق جانە كوممۋنيكاتسيا ورتالىعىنىڭ باس ديرەكتورى ەلدوس ومىرزاقۇلى، بەلگىلى جۋرناليست ادىلبەك جاپاق جانە “رۋح جاڭعىرىعى” قوعامدىق قورىنىڭ ديرەكتورى ايدار حاميت بار.
ورتالىقتىڭ اشىلۋ راسىمىندە لەنتانى جانگەلدى شىمشىقوۆ، سامات نۇرتازا جانە رينات كەرتاەۆ قيىپ، جاڭا ءبىلىم ورداسىنىڭ ەسىگىن ايقارا اشتى.
سالتاناتتى شارا بارىسىندا اتا-انالار اراسىندا ءتۇرلى ويىندار ۇيىمداستىرىلىپ، بەلسەندى قاتىسۋشىلارعا ورتالىقتىڭ وقۋ اقىسىنا جەڭىلدىكتەر ۇسىنىلدى. سونىمەن قاتار، بالالارعا ارنالعان ويىن-ساۋىق باعدارلامالارى وتكىزىلىپ، مەرەكەلىك كوڭىل-كۇي قالىپتاستى. قوناقتارعا ارنايى فۋرشەت ۇسىنىلىپ، كەلگەندەردىڭ بارلىعى دامنەن اۋىز ءتيىپ، ەركىن فورماتتا پىكىر الماسۋعا مۇمكىندىك الدى.
ورتالىقتىڭ باستى ەرەكشەلىكتەرىنىڭ ءبىرى – ونىڭ وقۋ-تاربيە ۇدەرىسى الاش قوزعالىسى قايراتكەرلەرىنىڭ ويلارى مەن يدەيالارىنا نەگىزدەلۋى. ياعني، مۇندا ءبىلىم بەرۋ تەك اكادەميالىق باعىتپەن شەكتەلمەي، ۇلتتىڭ رۋحاني قۇندىلىقتارىن، جاۋاپكەرشىلىك پەن ازاماتتىق ۇستانىمدى قالىپتاستىرۋعا باعىتتالعان. اسىرەسە ءاليحان بوكەيحان، احمەت بايتۇرسىنۇلى، مىرجاقىپ دۋلاتۇلى، ماعجان جۇماباي سىندى تۇلعالاردىڭ مۇراسى ارقىلى بالالاردىڭ ساناسىنا ەلگە قىزمەت ەتۋ، بىلىمگە ۇمتىلۋ، ۇلتتىق سانا سەكىلدى قۇندىلىقتار سىڭىرىلەدى.
سونىمەن قاتار، ورتالىقتا بالالاردىڭ جان-جاقتى دامۋىنا باعىتتالعان ءتۇرلى ۇيىرمەلەر جۇمىس ىستەيدى. اتاپ ايتقاندا، قىش ونەرىنە ارنالعان (گونچارنىي) ۇيىرمە، وراتورلىق شەبەرلىك، شاحمات، اعىلشىن ءتىلى، دومبىرا، اكتەرلىك شەبەرلىك، سۋرەت سالۋ جانە ۆوكال باعىتتارى قامتىلعان. بۇل باعىتتار بالالاردىڭ شىعارماشىلىق، زياتكەرلىك جانە كوممۋنيكاتيۆتىك قابىلەتتەرىن قاتار دامىتۋعا مۇمكىندىك بەرەدى.
جالپى، «Sun Study» ورتالىعىنىڭ ەكىنشى فيليالىنىڭ اشىلۋى – ەلورداداعى ءبىلىم بەرۋ كەڭىستىگىن كەڭەيتىپ قانا قويماي، جاس ۇرپاقتىڭ جان-جاقتى دامۋىنا، ۇلتتىق رۋحتا تاربيەلەنۋىنە باعىتتالعان ماڭىزدى قادام بولىپ وتىر.
