حالىقارالىق وتباسى كۇنىنە وراي ساتباەۆ قالاسىندا باسپانا كەزەگىندە تۇرعان ازاماتتارعا جاڭا تۇرعىن ءۇيدىڭ كىلتى تابىستالدى. جالپى اۋدانى 2000 شارشى مەترگە جۋىق بولاتىن بەس قاباتتى 30 پاتەرلى تۇرعىن ءۇي ەل يگىلىگىنە بەرىلدى.
قونىس يەلەرىن قۇتتىقتاعان ۇلىتاۋ وبلىسىنىڭ اكىمى داستان رىسپەكوۆ وڭىردە حالىقتى جايلى باسپانامەن قامتاماسىز ەتۋ باعىتىنداعى جۇمىستار جۇيەلى تۇردە جالعاسىپ جاتقانىن اتاپ ءوتتى. سونداي-اق تۇرعىن ءۇي قۇرىلىسىنا جەرگىلىكتى بيۋدجەتپەن قاتار ينۆەستيتسيالىق مۇمكىندىكتەر دە كەڭىنەن تارتىلىپ جاتقانىن جەتكىزدى.
«وبلىسىمىز قۇرىلعان ۋاقىتتان بەرى 365 مىڭ شارشى مەترگە جۋىق تۇرعىن ءۇي پايدالانۋعا بەرىلدى. ال بيىل 100 مىڭ شارشى مەترگە جۋىق باسپانانىڭ قۇرىلىسى اياقتالادى دەپ كۇتىلۋدە. بۇل تاعى 800-دەن استام وتباسىنىڭ جاڭا قونىسقا يە بولۋىنا مۇمكىندىك بەرەدى. وسىنداي اۋقىمدى جۇمىستاردىڭ ناتيجەسىندە ءوڭىرىمىز بيىلعى قاڭتار-ناۋرىز ايلارىنداعى رەسپۋبليكالىق كورسەتكىش بويىنشا قۇرىلىس كولەمىنىڭ ءوسىمى جونىنەن كوشباسشىلار قاتارىنان كورىندى»، – دەدى ءوڭىر باسشىسى.
جاڭا باسپانالى بولعان وتباسىلار قۋانىشتارىن ءبولىسىپ، كورسەتىلىپ جاتقان قولداۋ ءۇشىن ريزاشىلىقتارىن ءبىلدىردى.
ء«وز باسپانامىز بولسا دەپ ارمانداپ كەلە جاتقانىمىزعا وسىمەن 16 جىل بولعان. ءوز الدىمىزعا وبلىس بولعالى باسپانا كەزەگى جىلجىپ جاتقانىن بايقاپ، ۇمىتتەنىپ جۇرەتىنبىز. بۇگىن مىنە، قول جەتكىزدىك. اكىمدىككە العىس»،-دەيدى ساتباەۆتىق جاۋھار احمەتوۆا.
ايتا كەتەيىك، ءساۋىردىڭ باسىندا ۇلىتاۋ وبلىسى اكىمى مەن بىرقاتار دەلەگاتسيا مۇشەسى قىتاي حالىق رەسپۋبليكاسىنا بارىپ، قۇنى 12.5 ملرد. تەڭگەلىك كەلىسىمشارتقا قول جەتكىزگەن بولاتىن. اتالعان ينۆەستيتسيالىق قاراجات جەزقازعان، ساتباەۆ، قاراجال قالالارىنداعى تۇرعىن ءۇي قورىن جاڭارتۋ، اپاتتى ۇيلەردىڭ ورنىنا جاڭا باسپانالار سالۋعا باعىتتالۋدا.
جالپى العاندا وڭىردە تۇرعىن ءۇي قۇرىلىسىنىڭ قارقىنى جىل سايىن ارتىپ كەلەدى. بۇل حالىقتىڭ ءال-اۋقاتىن جاقسارتۋعا جانە الەۋمەتتىك ماسەلەلەردى كەزەڭ-كەزەڭىمەن شەشۋگە باعىتتالعان ماڭىزدى قادامداردىڭ ءبىرى.
