استانادا اۆتوبۋس اپاتىنان زارداپ شەككەن سەگىز جاستاعى الۋا بەكەننىڭ وتباسى اكىمدىكتەن پاتەر الادى. بۇل تۋرالى قالا اكىمى جەڭىس قاسىمبەك مالىمدەدى، دەپ حابارلايدى “ادىرنا”.
بۇعان قوسا، وقۋشى قىزدىڭ وتباسىنا 29,6 ملن تەڭگە كولەمىندە وتەماقى بەرىلەدى. جول اپاتىنان زارداپ شەككەن تاعى ەكى ازاماتقا دا كومەك كورسەتىلەدى. اۋرۋحانادا جاتقان بۇل ەكەۋى ساقتاندىرۋ تولەمىن الادى.
استانا اكىمدىگى الۋاعا كومەك كورسەتەتىنىن ءبىر كۇن بۇرىن بالا قۇقىعى جونىندەگى ۋاكىل دينارا زاكيەۆا دا جازعان. ونىڭ ايتۋىنشا، وقۋشى قىز دالاعا شىعىپ، اۋلاداعى بالالارمەن ويناعىسى كەلەدى.
ەستەرىڭىزگە سالا كەتەيىك، 2 ماۋسىمدا استانا قالاسىنداعى رەسپۋبليكا داڭعىلىندا جولاۋشى اۆتوبۋسى اقپاراتتىق تاقتا تىرەۋىنە سوعىلعان. جول اپاتىنان 15 ادام زارداپ شەككەن. ءۇش جولاۋشى اۋرۋحاناعا تۇسكەن. دارىگەرلەر ءبىر ايدان سوڭ 8 جاسقا تولاتىن الۋا بەكەننىڭ ەكى اياعىن كەسۋگە ءماجبۇر بولعان.
استاناداعى ءىرى جول اپاتىنان كەيىن قىلمىستىق ءىس قوزعالدى. اۆتوبۋس جۇرگىزۋشىسى قاماۋعا الىندى.
ۇقساس جاڭالىقتار
