اقتاۋ گارنيزونىندا وتكەن اسكەري وقۋ-جاتتىعۋ كەزىندە اسكەري قىزمەتكەرلەردىڭ قازا بولۋىنا بايلانىستى قىلمىستىق ءىس قوزعالىپ، تەرگەۋ باستالدى. بۇل تۋرالى باس پروكۋراتۋرا جازدى، دەپ حابارلايدى «ادىرنا» ءتىلشىسى.
ۆەدومستۆو مالىمەتىنشە، وقيعانىڭ سەبەپتەرى مەن ءمان-جايلارىن انىقتاۋ ءۇشىن جەدەل-تەرگەۋ توبى قۇرىلعان. وقيعا ورنىندا ىشكى ىستەر مينيسترلىگى، توتەنشە جاعدايلار مينيسترلىگى جانە پروكۋراتۋرا قىزمەتكەرلەرى جۇمىس جۇرگىزىپ جاتىر.
«قازىرگى ۋاقىتتا بارلىق جاعدايدى جان-جاقتى، تولىق ءارى وبەكتيۆتى انىقتاۋعا باعىتتالعان تەرگەۋ امالدارى جۇرگىزىلۋدە. قاجەتتى سوت ساراپتامالارى تاعايىندالعان»،– دەلىنگەن حابارلامادا.
باس پروكۋراتۋرا تەرگەۋ بارىسى ەرەكشە باقىلاۋعا الىنعانىن مالىمدەدى.
بۇعان دەيىن كاسپي جاعالاۋىنداعى وقۋ-جاتتىعۋ كەزىندە توعىز اسكەري قىزمەتكەر قازا تاپقانىن جازعان ەدىك.
